హైదరాబాద్కు ‘ఎమిరేట్స్ ఎయిర్బస్ ఏ380’ సర్వీసులు?సీఎం రేవంత్తో వైస్ ప్రెసిడెంట్ భేటీ
తెలంగాణలో విమానయాన రంగ విస్తరణకు మరో కీలక ముందడుగు పడింది. ప్రముఖ అంతర్జాతీయ విమానయాన సంస్థ ‘ఎమిరేట్స్’ హైదరాబాద్ నుంచి తమ ప్రతిష్టాత్మక ‘ఎయిర్బస్ ఏ380’ సర్వీసులను ప్రారంభించేందుకు సానుకూలత వ్యక్తం చేసింది. ఎమిరేట్స్ సంస్థ భారత దేశంలో తన 25 ఏళ్ల సుదీర్ఘ ప్రయాణాన్ని పూర్తి చేసుకున్న సందర్భంగా.. తెలంగాణ ముఖ్యమంత్రి ఎ. రేవంత్ రెడ్డితో ఎమిరేట్స్ ఇండియా & నేపాల్ వైస్ ప్రెసిడెంట్ మిస్టర్ మహ్మద్ సర్హాన్ ప్రత్యేకంగా సమావేశమయ్యారు.
ఈ సందర్భంగా ముఖ్యమంత్రి రేవంత్ రెడ్డి మాట్లాడుతూ.. హైదరాబాద్లో ఎమిరేట్స్ సంస్థ తన నెట్వర్క్ను మరింత విస్తరించాలని, అందులో భాగంగానే ప్రపంచంలోనే అతిపెద్ద ప్రయాణీకుల విమానమైన ఏ380 సర్వీసులను ఇక్కడి నుంచి ప్రవేశపెట్టాలని, విమాన సర్వీసుల సంఖ్యను పెంచాలని కోరారు. అలాగే తెలంగాణలో వేగంగా వృద్ధి చెందుతున్న ఏవియేషన్ (విమానయాన) రంగాన్ని ఆయన ఈ సందర్భంగా ప్రముఖంగా ప్రస్తావించారు. రాష్ట్రంలో రాబోయే వరంగల్, ఆదిలాబాద్ విమానాశ్రయాల గురించి వివరిస్తూ.. తెలంగాణలో మెయింటెనెన్స్, రిపేర్ & ఓవర్హాల్ కార్యకలాపాలను స్థాపించి విస్తరించాలని ఎమిరేట్స్ సంస్థను సీఎం ఆహ్వానించారు. ఇందుకు ప్రభుత్వం తరపున పూర్తి మద్దతు ఉంటుందని ఆయన హామీ ఇచ్చారు.
విమానయాన రంగంతో పాటు, తెలంగాణ క్రీడా రంగానికి కూడా అండగా నిలవాలని సీఎం రేవంత్ రెడ్డి ఎమిరేట్స్కు విజ్ఞప్తి చేశారు. గచ్చిబౌలి స్పోర్ట్స్ యూనివర్సిటీలో అథ్లెట్ల శిక్షణా కార్యక్రమాలకు స్పాన్సర్షిప్ అందించడం ద్వారా భాగస్వామ్యం కావాలని కోరారు.
ముఖ్యమంత్రి ప్రతిపాదనలపై ఎమిరేట్స్ వైస్ ప్రెసిడెంట్ మహ్మద్ సర్హాన్ సానుకూలంగా స్పందించారు. హైదరాబాద్ నుంచి ఏ380 విమాన కార్యకలాపాలను ప్రారంభించే అవకాశాలను పరిశీలిస్తామని చెప్పారు. అదేవిధంగా, స్పాన్సర్షిప్ కార్యక్రమాల ద్వారా తెలంగాణలో క్రీడల అభివృద్ధికి తమ మద్దతును అందించే అంశాన్ని కూడా పరిశీలిస్తామని వెల్లడించారు. తెలంగాణ యొక్క అంతర్జాతీయ అనుసంధానాన్ని విమానయాన పర్యావరణ వ్యవస్థను మరింత బలోపేతం చేయడంలో ఈ సమావేశం ఒక కీలక అడుగుగా నిలిచింది.