సుప్రీంకోర్టుకు ‘తెహల్కా’ మాజీ ఎడిటర్ తరుణ్ తేజ్పాల్
2013 నాటి లైంగిక దాడి కేసులో తనకు విధించిన శిక్షను సవాల్ చేస్తూ జర్నలిస్ట్, ‘తెహల్కా’ మాజీ ఎడిటర్ తరుణ్ తేజ్పాల్ గురువారం సుప్రీంకోర్టును ఆశ్రయించారు. ఆగస్టు 6న బాంబే హైకోర్టు ఇచ్చిన తీర్పును సవాల్ చేస్తూ న్యాయవాది ఆదిత్య సమద్దార్ ద్వారా పిటిషన్ దాఖలు చేశారు. 2013లో గోవాలో ‘తెహల్కా’ మ్యాగజైన్ నిర్వహించిన కార్యక్రమం సందర్భంగా ఓ హోటల్ లిఫ్ట్లో జూనియర్ మహిళా సహోద్యోగిపై అత్యాచారం చేసిన కేసులో తేజ్పాల్కు బాంబే హైకోర్టు 10 ఏళ్ల కఠిన కారాగార శిక్ష విధించింది. ఐదేళ్ల క్రితం ట్రయల్ కోర్టు ఇచ్చిన నిర్దోషిత్వ తీర్పును హైకోర్టు కొట్టివేసి ఆయనను దోషిగా నిర్ధారించింది. తేజ్పాల్ తనపై వచ్చిన ఆరోపణలను గతంలో ఖండిస్తూ.. తాను రాజకీయ కక్షకు బలయ్యానని పేర్కొన్నారు. హైకోర్టు తీర్పు అనంతరం సుప్రీంకోర్టులో సవాల్ చేస్తానని కూడా ఆయన ప్రకటించారు.
శిక్ష పెంచాలంటూ గోవా ప్రభుత్వం పిటిషన్
ఇదే కేసులో తేజ్పాల్కు విధించిన శిక్షను పెంచాలని కోరుతూ గోవా ప్రభుత్వం కూడా సుప్రీంకోర్టును ఆశ్రయించింది. హైకోర్టు విధించిన 10 ఏళ్ల శిక్ష నేర తీవ్రతకు అనుగుణంగా లేదని, ఆయనకు జీవిత ఖైదు విధించాలని ప్రభుత్వం కోరింది. శిక్షను పెంచడంతో పాటు, వేర్వేరు నేరాలకు విధించిన శిక్షలను ఏకకాలంలో కాకుండా వరుసగా అమలు చేయాలని గోవా ప్రభుత్వం తన పిటిషన్లో కోరింది. అయితే తేజ్పాల్ దాఖలు చేసిన పిటిషన్ ప్రధానంగా శిక్ష, దాని అమలుకు సంబంధించిన అంశాలపైనే దృష్టి సారించినట్లు తెలుస్తోంది.
ట్రయల్ కోర్టు తీర్పుపై హైకోర్టు తీవ్ర వ్యాఖ్యలు
2021లో ట్రయల్ కోర్టు ఇచ్చిన నిర్దోషిత్వ తీర్పును బాంబే హైకోర్టు తీవ్రంగా తప్పుబట్టింది. లైంగిక దాడికి గురైన మహిళ ‘పర్ఫెక్ట్ బాధితురాలిగా’ ప్రవర్తించాల్సిన అవసరం ఉందన్న భావనతో ట్రయల్ కోర్టు ప్రభావితమైందని హైకోర్టు వ్యాఖ్యానించింది. 81 పేజీల తీర్పులో బాధితురాలి వ్యక్తిగత జీవితాన్ని విచారణలో ప్రస్తావిస్తూ, ఆమెను ప్రశ్నించిన తీరుపైనా హైకోర్టు అసంతృప్తి వ్యక్తం చేసింది. క్రాస్ ఎగ్జామినేషన్ సమయంలో బాధితురాలిని రక్షించకుండా, ఆమెను అవమానించే విధంగా ప్రశ్నలు అడిగేందుకు రక్షణ పక్షానికి అవకాశం ఇవ్వడంపై కూడా తీవ్ర వ్యాఖ్యలు చేసింది. తేజ్పాల్పై భారతీయ శిక్షాస్మృతిలోని అత్యాచారం, లైంగిక వేధింపులు, దుస్తులు విప్పించే ఉద్దేశంతో దాడి వంటి పలు సెక్షన్ల కింద కేసులు నమోదయ్యాయి. వీటిలో అత్యాచారానికి సంబంధించిన సెక్షన్ కింద గరిష్ఠంగా జీవిత ఖైదు విధించే అవకాశం ఉంది. హైకోర్టు తీర్పు అనంతరం తేజ్పాల్ నాలుగు వారాల్లో లొంగిపోవాలని ఆదేశించింది. ఆయన తరఫు న్యాయవాదుల విజ్ఞప్తితో ఆ గడువును పొడిగించింది.