విశాఖ వీధుల్లో శర్వానంద్ బైక్ ర్యాలీ: 'బైకర్' ప్రమోషన్లలో సందడి
నటుడు శర్వానంద్ తన రాబోయే చిత్రం 'బైకర్' ప్రమోషన్లలో భాగంగా మంగళవారం విశాఖపట్నంలో సందడి చేశారు. నగర వీధుల్లో అభిమానులు, నిజమైన బైకర్లతో కలిసి ఆయన భారీ బైక్ ర్యాలీ నిర్వహించారు. ఈ సందర్భంగా శర్వానంద్ స్వయంగా బైక్ నడుపుతూ అభిమానులను ఉత్సాహపరిచారు.
ర్యాలీలో భాగంగా శర్వానంద్ ఎన్ఎస్ఆర్ఐటీ కళాశాల వద్ద ఒక అభిమానిని ప్రత్యేకంగా కలిశారు. ఆ అభిమాని రూపొందించిన చిత్రం చూసి అభినందించడమే కాకుండా, దానిపై తన సంతకాన్ని చేసి సంతోషపెట్టారు. 'బైకర్' సినిమాపై ఇప్పటికే భారీ అంచనాలు నెలకొన్నాయి. దీనికి ప్రధాన కారణం, ఇది భారతదేశపు మొట్టమొదటి మోటోక్రాస్ నేపథ్య చిత్రమని చిత్ర యూనిట్ పేర్కొనడం. మోటోక్రాస్ రేసింగ్లోని సాహసాలు, వేగం థ్రిల్లింగ్ అంశాలను ఈ సినిమాలో అద్భుతంగా చూపించబోతున్నట్లు ప్రమోషన్ల ద్వారా తెలుస్తోంది.
విశాఖ తీరప్రాంతంలో జరిగిన ఈ ర్యాలీతో సినిమా ప్రమోషన్లు నెక్స్ట్ లెవల్కు చేరుకున్నాయి. యువతలో మంచి క్రేజ్ ఉన్న శర్వానంద్, ఈ విభిన్నమైన స్పోర్ట్స్ డ్రామాతో మరో హిట్ కొట్టాలని ప్లాన్ చేస్తున్నారు. శర్వానంద్ 'బైకర్' చిత్రంలో మాళవికా నాయర్ హీరోయిన్ కాగా, డా. రాజశేఖర్ తండ్రి-గురువుగా కీలక పాత్ర పోషించారు. తండ్రీకొడుకుల మధ్య భావోద్వేగ సంఘర్షణతో, టాప్ నాచ్ విజువల్స్తో సాగే ఈ మోటోక్రాస్ డ్రామా ఏప్రిల్ 3న విడుదల కానుంది. చాలా కాలం తర్వాత రాజశేఖర్ ఇంటెన్స్ రోల్లో కనిపిస్తుండటం విశేషం. ట్రైలర్ ఇప్పటికే భారీ అంచనాలను పెంచేసింది.