వియత్నాం పడవ ప్రమాదం.. బాధితుల సహాయంపై సీఎం చంద్రబాబు ఆరా

వియత్నాంలో జరిగిన ఘోర పడవ ప్రమాద బాధితులకు అందుతున్న సహాయక చర్యలపై ఆంధ్రప్రదేశ్ ముఖ్యమంత్రి నారా చంద్రబాబు నాయుడు ఆదివారం అధికారులతో ఉన్నత స్థాయి సమీక్ష నిర్వహించారు. ప్రమాదంలో చిక్కుకున్న పర్యాటకులను వీలైనంత త్వరగా సురక్షితంగా స్వదేశానికి తీసుకురావడానికి తక్షణ ఏర్పాట్లు చేయాలని ఆయన అధికారులను ఆదేశించారు.

వియత్నాంలోని పూ క్వోక్ ద్వీపం సమీపంలో శనివారం 32 మంది భారతీయ పర్యాటకులు, ముగ్గురు సిబ్బంది, ఒక అటెండెంట్‌తో ప్రయాణిస్తున్న టూరిస్ట్ స్పీడ్‌బోట్ బోల్తా పడిన సంగతి తెలిసిందే. ఈ ప్రమాదంలో 15 మంది భారతీయ పర్యాటకులు ప్రాణాలు కోల్పోగా, 21 మంది సురక్షితంగా బయటపడ్డారు. వీరిలో ఇద్దరి పరిస్థితి ఇంకా విషమంగానే ఉంది.

ఈ ప్రమాదంలో తీవ్రంగా గాయపడిన గెల్లె కిషోర్ అనే పర్యాటకుడు ప్రస్తుతం వియత్నాం ప్రభుత్వ ఆసుపత్రిలో చికిత్స పొందుతున్నారని, అతని ఆరోగ్యం క్రమంగా మెరుగుపడుతోందని తెలిపారు. అతనికి మరింత మెరుగైన వైద్యం అందించడం కోసం పూ క్వోక్ ద్వీపం నుంచి హో చి మిన్ సిటీకి తరలించారని, చికిత్సకు సానుకూలంగా స్పందిస్తున్నారని వివరించారు. ఈ క్రమంలో 'సన్ ఫార్మా' సంస్థ అతనికి వైద్య సహాయం అందిస్తోందని పేర్కొన్నారు. మృతదేహాలను వారి స్వగ్రామాలకు తరలించే ప్రక్రియను సులభతరం చేయడానికి వియత్నాంలోని భారత రాయబార కార్యాలయం ఒక ప్రత్యేక ఏజెన్సీని నియమించిందని అధికారులు తెలిపారు. ఇప్పటికే మృతదేహాలను అప్పగించే, తరలించే ప్రక్రియ ప్రారంభమైందని చెప్పారు.

ప్రమాదం నుంచి ప్రాణాలతో బయటపడిన తెలుగు పర్యాటకులను ఆదివారం వారి స్వగ్రామాలకు చేర్చడానికి ఏర్పాట్లు పూర్తయ్యాయి. ఒక ప్రముఖ మొబైల్ సేవా సంస్థ తన వ్యాపార భాగస్వాములకు ఈ విహార యాత్రను స్పాన్సర్ చేయగా.. సదరు మొబైల్ కంపెనీయే బతికి ఉన్న పర్యాటకులందరికీ విమాన టిక్కెట్లను ఏర్పాటు చేసింది. 15 మంది తెలుగు పర్యాటకులు ఇప్పటికే పూ క్వోక్ విమానాశ్రయానికి చేరుకున్నారని, వారు వియత్నాం ఎయిర్‌లైన్స్ విమానం (VN985) ద్వారా హనోయి మీదుగా హైదరాబాద్‌కు రానున్నారని అధికారులు సీఎంకు వివరించారు.

బాధితులంతా సురక్షితంగా భారతదేశానికి తిరిగి వచ్చే వరకు, అలాగే మృతుల మృతదేహాల తరలింపు పూర్తయ్యే వరకు ఏపీ భవన్ అధికారులు అన్ని విధాలా అవసరమైన సహాయాన్ని అందించాలని ముఖ్యమంత్రి చంద్రబాబు ఆదేశించారు. గాయపడిన కిషోర్ కుటుంబ సభ్యులు హో చి మిన్ సిటీకి వెళ్లేందుకు ఏపీ భవన్ తగిన ఏర్పాట్లు చేస్తోందని ప్రభుత్వ వర్గాలు తెలిపాయి. వియత్నాంలోని భారత రాయబార కార్యాలయంతో నిరంతరం సమన్వయం చేసుకుంటూ ఈ రప్పించే ప్రక్రియను వేగవంతం చేయాలని అధికారులను సీఎం చంద్రబాబు నాయుడు ఆదేశించారు.