విజయవాడలో జాతీయ సరస్‌ మేళాకు విశేష స్పందన
విజయవాడలో తొలిసారిగా నిర్వహిస్తున్న జాతీయ సరస్‌ మేళాకు ప్రజల నుంచి విశేష స్పందన లభిస్తోందని జాతీయ గ్రామీణాభివృద్ధి సంస్థ (ఎన్‌ఐఆర్‌డీ) అదనపు సంచాలకుడు సుధీర్‌ కుమార్‌ తెలిపారు. గ్రామీణ ప్రాంతాల్లో స్వయం సహాయక సంఘాల (ఎస్‌హెచ్‌జీ) మహిళలు తయారు చేసిన ఉత్పత్తులకు జాతీయ స్థాయిలో మార్కెటింగ్‌ అవకాశాలు కల్పించడం, మహిళా పారిశ్రామికవేత్తలను ప్రోత్సహించడం ఈ మేళా ప్రధాన ఉద్దేశమని పేర్కొన్నారు.
విజయవాడలోని పున్నమి ఘాట్‌ వద్ద ఏర్పాటు చేసిన సరస్‌ ప్రదర్శన ప్రాంగణంలో శనివారం ఆయన మీడియా సమావేశంలో మాట్లాడారు. కేంద్ర గ్రామీణాభివృద్ధి మంత్రిత్వ శాఖ ఆధ్వర్యంలో, ఆంధ్రప్రదేశ్‌ సొసైటీ ఫర్‌ ఎలిమినేషన్‌ ఆఫ్‌ రూరల్‌ పావర్టీ (సెర్ప్‌) సహకారంతో ఈ మేళాను నిర్వహిస్తున్నట్లు వివరించారు. గ్రామీణ మహిళలు తయారు చేస్తున్న ఉత్పత్తులకు విస్తృత ప్రచారం కల్పించడంతోపాటు, వాటిని దేశవ్యాప్తంగా విక్రయించేందుకు అవసరమైన వేదికను ఈ ప్రదర్శన అందిస్తోందని చెప్పారు.
మేళాలో సుమారు 600 స్టాళ్లను ఏర్పాటు చేసినట్లు సుధీర్‌ కుమార్‌ తెలిపారు. వీటిలో చేనేత వస్త్రాలు, హస్తకళా ఉత్పత్తులు, సహజసిద్ధమైన ఆహార పదార్థాలు సహా వివిధ రకాల వస్తువులను ప్రదర్శనకు ఉంచినట్లు పేర్కొన్నారు. వివిధ రాష్ట్రాలకు చెందిన సంప్రదాయ వంటకాలను సందర్శకులకు అందించేందుకు 50 ప్రత్యక్ష ఆహార స్టాళ్లతో ప్రత్యేక ఫుడ్‌ కోర్టును ఏర్పాటు చేసినట్లు వెల్లడించారు. దేశంలోని రాష్ట్రాలు, కేంద్రపాలిత ప్రాంతాల నుంచి సుమారు 1,500 మంది మహిళా పారిశ్రామికవేత్తలు ఈ కార్యక్రమంలో పాల్గొంటూ తమ ఉత్పత్తులను ప్రదర్శిస్తున్నారని తెలిపారు.
సందర్శకులు, పాల్గొనే మహిళలకు సౌకర్యవంతమైన వాతావరణం కల్పించేందుకు ప్రదర్శన ప్రాంగణంలో ప్రత్యేక పెవిలియన్లను ఏర్పాటు చేశారు. వివిధ ప్రభుత్వ శాఖలు అమలు చేస్తున్న పథకాలు, కార్యక్రమాలపై స్వయం సహాయక సంఘాల సభ్యులకు అవగాహన కల్పించేందుకు కన్వర్జెన్స్‌ పెవిలియన్‌ను అందుబాటులోకి తీసుకొచ్చారు. మహిళా వ్యాపారవేత్తలకు ప్రభుత్వం అందిస్తున్న సహకారం, అందుబాటులో ఉన్న అవకాశాల వివరాలను కూడా ఇక్కడ తెలియజేస్తున్నారు.
మహిళలు తయారు చేస్తున్న ఉత్పత్తులను నాణ్యమైన బ్రాండ్లుగా తీర్చిదిద్ది, జాతీయ, అంతర్జాతీయ మార్కెట్లకు పరిచయం చేసేందుకు ప్రత్యేక శిక్షణ కార్యక్రమాలను నిర్వహిస్తున్నట్లు ఆయన వివరించారు. మీట్‌ అండ్‌ గ్రీట్‌ పెవిలియన్‌లో ఎన్‌ఐఆర్‌డీ, పంచాయతీరాజ్‌ సంస్థల నిపుణులతోపాటు ఇతర రంగాల నిపుణులు ఈ శిక్షణ అందిస్తున్నారు. బ్రాండింగ్‌, ప్యాకేజింగ్‌, ఎగుమతి మార్కెటింగ్‌, విలువ ఆధారిత సరఫరా వ్యవస్థల నిర్వహణ వంటి అంశాలపై అవగాహన కల్పిస్తున్నారు.
మరోవైపు, మహిళా పారిశ్రామికవేత్తల విజయగాథలు, వ్యాపార నైపుణ్యాలు, ప్రత్యేక ఉత్పత్తులను పరిచయం చేసేందుకు లఖ్‌పతి దీదీ పెవిలియన్‌ను ఏర్పాటు చేశారు. భారతీయ సంస్కృతి, సంప్రదాయాలకు అద్దం పట్టేలా చేనేత వస్త్రాలు, హస్తకళలు, సహజ ఆహార ఉత్పత్తులు, సంప్రదాయ కళారూపాలను ఈ మేళాలో ప్రదర్శిస్తున్నట్లు సుధీర్‌ కుమార్‌ తెలిపారు.