రైతుల పట్ల కూటమి ప్రభుత్వం నిర్లక్ష్యం: ఎమ్మెల్యే విరూపాక్షి

రాష్ట్రంలో రైతుల పరిస్థితి రోజురోజుకూ దయనీయంగా మారుతోందని, రైతుల సంక్షేమం పేరుతో ప్రచారం చేసుకుంటున్న కూటమి ప్రభుత్వం వారికి ఎలాంటి భరోసా కల్పించడం లేదని ఆలూరు ఎమ్మెల్యే బుసినే విరూపాక్షి విమర్శించారు. శుక్రవారం ఆర్‌అండ్‌బీ గెస్ట్ హౌస్‌లో నిర్వహించిన సమావేశంలో ఆయన మాట్లాడారు.

రైతుల పక్షపాతినని ముఖ్యమంత్రి చంద్రబాబు నాయుడు చెప్పుకుంటున్నప్పటికీ, రైతులకు ప్రయోజనం చేకూరే విధంగా ఒక్క కీలక నిర్ణయం కూడా తీసుకోలేదని ఆరోపించారు. గత ఏడాది రాష్ట్రంలోని అనేక ప్రాంతాల్లో అతివృష్టి, అనావృష్టి కారణంగా పంటలు దెబ్బతిన్నప్పటికీ నష్టపోయిన రైతులకు ప్రభుత్వం సరైన పరిహారం అందించలేదని అన్నారు. రైతులు తీవ్ర ఇబ్బందులు ఎదుర్కొంటున్న సమయంలో ప్రభుత్వం స్పందించకపోవడం బాధాకరమని పేర్కొన్నారు.

వైఎస్సార్ కాంగ్రెస్ పార్టీ ప్రభుత్వ హయాంలో రైతు సంక్షేమానికి అత్యంత ప్రాధాన్యత ఇచ్చారని విరూపాక్షి గుర్తుచేశారు. అప్పటి ముఖ్యమంత్రి వైఎస్ జగన్‌మోహన్ రెడ్డి ఆధ్వర్యంలో కేవలం ఒక రూపాయి ప్రీమియంతో పంటల బీమా అందించడంతో పాటు ప్రకృతి వైపరీత్యాల వల్ల నష్టపోయిన రైతులకు పరిహారం చెల్లించారని తెలిపారు. ప్రస్తుతం రైతులు వేల రూపాయలు బీమా ప్రీమియం చెల్లిస్తున్నప్పటికీ, పంట నష్టం సంభవించినప్పుడు సరైన పరిహారం అందడం లేదని విమర్శించారు.

ఇన్సూరెన్స్ పేరుతో రైతుల నుంచి వసూలు చేస్తున్న నిధులు రైతులకు ఉపయోగపడకుండా ఇతర అవసరాలకు మళ్లిస్తున్నారనే అనుమానాలు ప్రజల్లో వ్యక్తమవుతున్నాయని అన్నారు. పంటలకు బీమా కట్టుకోవాలని టీడీపీ నాయకులు సూచిస్తుండగా, నష్టం వచ్చినప్పుడు పరిహారం అందకపోతే ఆ బీమా వల్ల రైతులకు ప్రయోజనం ఏమిటని ప్రశ్నించారు. ఆలూరు నియోజకవర్గంలో అధిక శాతం ప్రజలు వ్యవసాయంపై ఆధారపడి జీవిస్తున్నారని, ఈ ఏడాది వర్షాభావ పరిస్థితుల కారణంగా పలువురు వలసలు వెళ్లాల్సిన పరిస్థితి ఏర్పడిందని చెప్పారు. రైతుల హక్కులు, సంక్షేమం కోసం వైఎస్సార్ కాంగ్రెస్ పార్టీ ఎప్పటికీ పోరాటం కొనసాగిస్తుందని ఆయన స్పష్టం చేశారు.