రష్యా చమురు డీల్పై కేంద్రాన్ని నిలదీసిన కాంగ్రెస్
రష్యా నుంచి చమురు కొనుగోలు చేయడానికి భారతదేశానికి అమెరికా ఇచ్చిన 30 రోజుల తాత్కాలిక మినహాయింపు అంశంపై కాంగ్రెస్ పార్టీ కేంద్ర ప్రభుత్వాన్ని తీవ్రంగా విమర్శించింది. కాంగ్రెస్ సీనియర్ నాయకుడు, రాజ్యసభ సభ్యుడు జైరాం రమేష్ ఈ నిర్ణయాన్ని భారతదేశ సార్వభౌమాధికారంపై దాడిగా అభివర్ణించారు. భారతదేశం ఎక్కడి నుంచి, ఎప్పుడు, ఎంత చమురు కొనాలి అనే నిర్ణయం పూర్తిగా దేశ ప్రభుత్వానికి చెందుతుందని, దానిపై అమెరికా ఇలా మినహాయింపులు ప్రకటించడం అభ్యంతరకరమని ఆయన అన్నారు.
మీడియాతో మాట్లాడిన జైరాం రమేష్, అమెరికా ట్రెజరీ కార్యదర్శి స్కాట్ బెసెంట్ చేసిన ప్రకటనపై తీవ్ర అసంతృప్తి వ్యక్తం చేశారు. భారత్ రష్యా నుంచి చమురు కొనుగోలు చేయడానికి అమెరికా “అనుమతి” లేదా “వేవర్” ఇవ్వడం సరైన విధానం కాదని, ఇలాంటి భాష సాధారణంగా ఆంక్షలు ఎదుర్కొంటున్న దేశాలకు మాత్రమే ఉపయోగిస్తారని ఆయన విమర్శించారు. ఈ అంశంపై ప్రధాని నరేంద్ర మోడీ, విదేశాంగ మంత్రి, పెట్రోలియం మంత్రి ఎందుకు స్పందించడం లేదని కూడా ఆయన ప్రశ్నించారు. ఈ అంశాన్ని ఇండియా–అమెరికా వాణిజ్య ఒప్పందంతో పాటు పార్లమెంట్లో తప్పకుండా లేవనెత్తుతామని కాంగ్రెస్ పార్టీ ప్రకటించింది.
ఇదే విషయంపై కాంగ్రెస్ అధ్యక్షుడు మల్లికార్జున ఖర్గే కూడా కేంద్ర ప్రభుత్వాన్ని విమర్శించారు. భారతదేశ వ్యూహాత్మక స్వాతంత్ర౦, జాతీయ సార్వభౌమాధికారం ప్రస్తుతం ప్రమాదంలో ఉన్నాయని ఆయన పేర్కొన్నారు. అమెరికా భారతదేశానికి రష్యా చమురు కొనుగోలుకు “అనుమతి” ఇచ్చినట్లు ప్రకటించడం, భారతదేశం అంతర్జాతీయ వేదికపై సమాన భాగస్వామి అనే స్థానాన్ని దెబ్బతీస్తుందని ఆయన అన్నారు. ఎన్నికల సమయంలో ప్రధాని మోడీ చెప్పిన “దేశం వంగనివ్వను” అనే నినాదం ఇప్పుడు ఖాళీ మాటలుగా మారిందని కూడా ఖర్గే విమర్శించారు.
ఇక అమెరికా మాత్రం పశ్చిమ ఆసియాలో కొనసాగుతున్న ఉద్రిక్త పరిస్థితుల నేపథ్యంలో ఈ 30 రోజుల తాత్కాలిక మినహాయింపును ప్రకటించింది. గల్ఫ్ ప్రాంతంలో కొనసాగుతున్న ఘర్షణల కారణంగా చమురు సరఫరా వ్యవస్థపై ప్రభావం పడుతున్న నేపథ్యంలో ఈ చర్య తీసుకున్నట్లు అమెరికా తెలిపింది. ఈ సమయంలో భారతదేశం అమెరికా నుంచి చమురు కొనుగోళ్లు పెంచాలని కూడా వాషింగ్టన్ ఆశిస్తున్నట్లు సమాచారం.
ప్రస్తుతం పశ్చిమ ఆసియాలో పరిస్థితులు మరింత ఉద్రిక్తంగా మారాయి. ఫిబ్రవరి 28న అమెరికా, ఇజ్రాయెల్ సంయుక్తంగా ఇరాన్పై నిర్వహించిన దాడుల్లో ఇరాన్ సుప్రీం లీడర్ అయతుల్లా అలీ ఖామెనీ సహా పలువురు కీలక నేతలు మరణించారు. దీనికి ప్రతిగా ఇరాన్ అమెరికా సైనిక స్థావరాలు, ఇజ్రాయెల్ లక్ష్యాలపై ప్రతిదాడులు చేపట్టింది. దీంతో ఆ ప్రాంతంలో యుద్ధ వాతావరణం కొనసాగుతోంది.
ఈ ఘర్షణల ప్రభావం ప్రపంచ చమురు సరఫరాలపై కూడా పడుతోంది. భారతదేశం తన చమురు దిగుమతుల్లో దాదాపు 40 శాతం గల్ఫ్ దేశాల నుంచే పొందుతోంది. ముఖ్యంగా హోర్ముజ్ జలసంధి ద్వారా వచ్చే సరఫరాలు కీలకంగా ఉంటాయి. ఈ మార్గం ప్రభావితమైతే భారత్లోని సెరామిక్, ఎరువులు, పరిశ్రమలు సహా పలు రంగాలపై ప్రభావం పడే అవకాశం ఉందని నిపుణులు హెచ్చరిస్తున్నారు. ఈ నేపథ్యంలో రష్యా నుంచి చమురు కొనుగోలు అంశం దేశ రాజకీయాల్లో కూడా ప్రధాన చర్చగా మారింది.