మున్సిపల్ ఎన్నికల నామినేషన్లపై ఎస్‌ఈసీకి వైఎస్‌ జగన్‌ ఫిర్యాదు
ఆంధ్రప్రదేశ్‌లో జరుగుతున్న మున్సిపల్ ఎన్నికల నామినేషన్ల ప్రక్రియలో అక్రమాలు, బెదిరింపులు, ప్రతిపక్ష అభ్యర్థులపై దాడులు జరుగుతున్నాయని వైఎస్సార్‌ కాంగ్రెస్‌ పార్టీ అధ్యక్షుడు, మాజీ ముఖ్యమంత్రి వైఎస్‌ జగన్‌మోహన్‌రెడ్డి ఆరోపించారు. ఎన్నికలు స్వేచ్ఛగా, నిష్పక్షపాతంగా జరిగేలా చర్యలు తీసుకోవాలని రాష్ట్ర ఎన్నికల సంఘం (ఎస్‌ఈసీ) కమిషనర్‌ అనిల్‌ చంద్ర పునేఠాను కోరారు. ఈ మేరకు ఆదివారం విజయవాడలోని రాష్ట్ర ఎన్నికల సంఘం కార్యాలయంలో ఆయన కమిషనర్‌ను కలిసి పలు అంశాలపై ఫిర్యాదు చేశారు.
సమావేశం అనంతరం జగన్‌ మాట్లాడుతూ.. నామినేషన్ల దాఖలుకు అభ్యర్థులు ఎదుర్కొంటున్న ఇబ్బందులను ఎస్‌ఈసీ దృష్టికి తీసుకెళ్లినట్లు తెలిపారు. గతంలో తాను ప్రస్తావించిన సమస్యలనే మరోసారి వివరించానన్నారు. అభ్యర్థులు నామినేషన్లు దాఖలు చేయకుండా అడ్డుకుంటే రాష్ట్ర ఎన్నికల సంఘం విశ్వసనీయత దెబ్బతింటుందని పేర్కొన్నారు. ప్రజాస్వామ్య ప్రక్రియలో భాగమైన నామినేషన్లను అడ్డుకునే చర్యల్లో ఎస్‌ఈసీ భాగస్వామి కాకూడదని సూచించినట్లు చెప్పారు.
నామినేషన్‌ దాఖలు చేయాలనుకునే ప్రతి అభ్యర్థికి ఆ అవకాశం కల్పించాలని కమిషనర్‌ను కోరినట్లు జగన్‌ వెల్లడించారు. అభ్యర్థులకు రక్షణ కల్పించేందుకు పోలీసు ఎస్కార్ట్‌ ఏర్పాటు చేయాలని, పోలీసు ఉన్నతాధికారుల పర్యవేక్షణలో వారిని నామినేషన్‌ కేంద్రాలకు తీసుకెళ్లి, పత్రాలు స్వీకరించేలా చూడాలని విజ్ఞప్తి చేసినట్లు తెలిపారు. నామినేషన్ల దశలోనే ఇన్ని అడ్డంకులు ఎదురైతే, ఎన్నికల్లో ఓటు వేసేందుకు వచ్చే అభ్యర్థులు, సాధారణ ప్రజల పరిస్థితి ఎలా ఉంటుందో అర్థం చేసుకోవచ్చని వ్యాఖ్యానించారు.
కేంద్ర బలగాలతో ఎన్నికలు నిర్వహించాలి
ఎన్నికల నిర్వహణలో కేంద్ర ప్రభుత్వ బలగాలు, పారామిలటరీ దళాలను వినియోగించాలని జగన్‌ కోరారు. ఈ విషయంపై కేంద్రంతో మరోసారి మాట్లాడి అవసరమైన బలగాలను పంపించేలా ఒత్తిడి తీసుకురావాలని ఎస్‌ఈసీకి సూచించినట్లు తెలిపారు. ఈ అంశంపై గవర్నర్‌ను కూడా కలిసి, కేంద్రం నుంచి పారామిలటరీ బలగాలను రప్పించేలా విజ్ఞప్తి చేయనున్నట్లు చెప్పారు. కేంద్ర బలగాల పర్యవేక్షణలో ఎన్నికలు నిర్వహిస్తే ఓటర్లు స్వేచ్ఛగా తమ ఓటు హక్కును వినియోగించుకునే అవకాశం ఉంటుందని అభిప్రాయపడ్డారు.
పోలింగ్‌, కౌంటింగ్‌ కేంద్రాల్లో ప్రత్యక్ష ప్రసారాలు
పోలింగ్‌ ప్రక్రియ పారదర్శకంగా సాగేందుకు పోలింగ్‌ కేంద్రాల లోపల, బయట సీసీటీవీ కెమెరాలు ఏర్పాటు చేయడంతోపాటు వాటి ప్రత్యక్ష ప్రసారాలను ప్రజలకు అందుబాటులో ఉంచాలని జగన్‌ కోరారు. ఓటింగ్‌ ప్రక్రియను ప్రతి ఒక్కరూ వీక్షించే అవకాశం కల్పించాలని సూచించినట్లు తెలిపారు. బ్యాలెట్‌ బాక్సులు భద్రపరిచే స్ట్రాంగ్‌రూమ్‌ల వద్ద కూడా ప్రత్యక్ష సీసీటీవీ ప్రసారాలు ఏర్పాటు చేయాలని కోరారు. బ్యాలెట్‌ బాక్సుల భద్రతపై తమకు అనుమానాలు ఉన్నాయని, వాటి పరిస్థితిని రాష్ట్ర ప్రజలు ఎప్పటికప్పుడు వీక్షించేలా చర్యలు తీసుకోవాలని విజ్ఞప్తి చేసినట్లు చెప్పారు.
ఓట్ల లెక్కింపు కేంద్రాల్లోనూ సీసీటీవీ ప్రత్యక్ష ప్రసారాలు ఉండాలని, కౌంటింగ్‌ సమయంలో చేపట్టే ప్రక్రియలన్నీ కెమెరాల పర్యవేక్షణలో జరగాలని కోరినట్లు వివరించారు. ఫారం-17సీ వివరాలను సైతం సీసీటీవీ పర్యవేక్షణలో సక్రమంగా పరిశీలించాలని విజ్ఞప్తి చేసినట్లు తెలిపారు. ఎన్నికల పారదర్శకతకు సంబంధించి ఈ డిమాండ్లను తమ పార్టీ గత కొంతకాలంగా ప్రస్తావిస్తోందని జగన్‌ పేర్కొన్నారు. ప్రజాస్వామ్యబద్ధంగా ఎన్నికలు జరిగేలా అవసరమైన చర్యలు తీసుకోవాలనే ఉద్దేశంతోనే మరోసారి రాష్ట్ర ఎన్నికల సంఘం కమిషనర్‌ను కలిసి తమ అభ్యర్థనలను వివరించినట్లు చెప్పారు.