మార్చి 31 నాటికి దేశం మావోయిస్టు రహితంగా మారుతుంది: అమిత్ షా
ఒడిశా రాష్ట్రంలోని కటక్ జిల్లాలోని ముండలిలో జరిగిన కార్యక్రమంలో కేంద్ర హోంమంత్రి అమిత్ షా దేశంలో మావోయిస్టు కార్యకలాపాలు ముగింపు దశకు చేరుకున్నాయని ప్రకటించారు. ఈ నెల 31 నాటికి భారత్ పూర్తిగా మావోయిస్టు రహిత దేశంగా మారుతుందని ఆయన విశ్వాసం వ్యక్తం చేశారు. ఆంధ్రప్రదేశ్లోని తిరుపతి నుంచి నేపాల్లోని పశుపతినాథ్ వరకు “రెడ్ కారిడార్” ఏర్పరచాలని మావోయిస్టులు కలలు కంటున్నా, భద్రతా దళాలు వారి ప్రయత్నాలను పూర్తిగా అడ్డుకుంటాయని తెలిపారు. దేశ భద్రతా బలగాలు గత కొన్ని సంవత్సరాల్లో సమన్వయంతో చేపట్టిన ఆపరేషన్ల వల్ల మావోయిస్టు ప్రభావం గణనీయంగా తగ్గిందని ఆయన పేర్కొన్నారు.
కటక్ జిల్లా ముండలిలో నిర్వహించిన సెంట్రల్ ఇండస్ట్రియల్ సెక్యూరిటీ ఫోర్స్ (సిఐఎస్ఎఫ్) 57వ స్థాపన దినోత్సవ కార్యక్రమంలో మాట్లాడుతూ, దేశ అభివృద్ధికి అంతర్గత భద్రత కీలకమని అమిత్ షా అన్నారు. ప్రధానమంత్రి నరేంద్ర మోడీ నాయకత్వంలో దేశ భద్రతా వ్యవస్థ మరింత బలోపేతమైందని ఆయన పేర్కొన్నారు. 2047 నాటికి భారత్ను “వికసిత భారత్”గా తీర్చిదిద్దాలన్న లక్ష్యానికి అంతర్గత శాంతి, భద్రత అత్యంత ముఖ్యమైన అంశమని ఆయన వివరించారు. దేశంలోని పారిశ్రామిక సంస్థలు, జలాశయాలు, ఎయిర్పోర్టులు, పార్లమెంట్ వంటి కీలక ప్రదేశాలకు భద్రత కల్పిస్తూ సిఐఎస్ఎఫ్ దేశ ఆర్థికాభివృద్ధికి ప్రేరణగా నిలుస్తోందని తెలిపారు.
శాంతి వాతావరణం ఉన్నప్పుడే పారిశ్రామిక అభివృద్ధి సాధ్యమవుతుందని ఈ సందర్భంగా అమిత్ షా అన్నారు. దేశాన్ని ప్రపంచంలో అతిపెద్ద ఆర్థిక వ్యవస్థలలో ఒకటిగా నిలపాలంటే పరిశ్రమలకు భద్రత కల్పించడం అత్యవసరమని చెప్పారు. పారిశ్రామిక భద్రత రంగంలో సిఐఎస్ఎఫ్ తన అంకితభావం, ధైర్యం, త్యాగంతో అత్యున్నత స్థాయికి చేరుకుందని ఆయన ప్రశంసించారు. భారతదేశ చరిత్రలోని గొప్ప సంప్రదాయాలను అనుసరించి, ఆధునిక ఆయుధాలు, సాంకేతికతను ఉపయోగిస్తూ సిఐఎస్ఎఫ్ అన్ని సవాళ్లను ఎదుర్కొనే సామర్థ్యాన్ని నిరూపించిందని అన్నారు.
ఇటీవల కేంద్ర హోంశాఖ అన్ని పోర్టుల భద్రతను సిఐఎస్ఎఫ్కి అప్పగించే నిర్ణయం తీసుకున్నట్లు షా వెల్లడించారు. రాబోయే రోజుల్లో ప్రైవేట్ పరిశ్రమలకు కూడా హైబ్రిడ్ విధానంలో సిఐఎస్ఎఫ్ భద్రత అందించే ప్రణాళిక ఉందని చెప్పారు. అలాగే రూ. 890 కోట్ల వ్యయంతో రెండు నివాస ప్రాజెక్టులను ప్రారంభించి, మూడు రిజర్వ్ బెటాలియన్ కేంద్రాల నిర్మాణానికి వర్చువల్ విధానంలో శంకుస్థాపన చేశారు.
ఆపరేషన్ ఖగార్
ఆపరేషన్ ఖగార్ అనేది భారత ప్రభుత్వం, భద్రతా దళాలు మావోయిస్టు కార్యకలాపాలను పూర్తిగా అణిచివేయడానికి చేపట్టిన ఒక పెద్ద స్థాయి సమన్వయ ఆపరేషన్. కేంద్ర హోంశాఖ ఆధ్వర్యంలో సిఆర్పీఎఫ్, రాష్ట్ర పోలీస్ దళాలు, ప్రత్యేక కమాండో బలగాలు కలిసి ఈ ఆపరేషన్ను అమలు చేస్తున్నాయి. ముఖ్యంగా ఛత్తీస్గఢ్, ఒడిశా, మహారాష్ట్ర, తెలంగాణ, ఆంధ్రప్రదేశ్ వంటి మావోయిస్టు ప్రభావిత ప్రాంతాల్లో ఈ ఆపరేషన్ తీవ్రంగా కొనసాగుతోంది. అడవుల్లో దాగి ఉన్న మావోయిస్టు నాయకత్వాన్ని లక్ష్యంగా చేసుకుని ఇంటెలిజెన్స్ ఆధారంగా దాడులు, కూంబింగ్ ఆపరేషన్లు చేపడుతున్నారు.
ఈ ఆపరేషన్ ప్రధాన లక్ష్యం మావోయిస్టుల ప్రభావాన్ని పూర్తిగా నిర్మూలించడం, “రెడ్ కారిడార్”గా పిలిచే ప్రాంతాన్ని ముగించడం. రోడ్లు, కమ్యూనికేషన్ నెట్వర్క్లు, భద్రతా శిబిరాల విస్తరణ ద్వారా మావోయిస్టులకు లాజిస్టిక్ మద్దతును తగ్గించడం కూడా ఇందులో భాగం. కేంద్ర ప్రభుత్వం 2026 నాటికి దేశాన్ని మావోయిస్టు రహితంగా మార్చాలనే లక్ష్యంతో ఈ ఆపరేషన్ను మరింత వేగంగా కొనసాగిస్తోంది.
ఇందులో భాగంగా, ఆపరేషన్ ఖగార్ ద్వారా దేశవ్యాప్తంగా మావోయిస్టులపై భారీ స్థాయిలో చర్యలు కొనసాగుతున్నాయి. 2024 నుంచి కొనసాగుతున్న ఈ ఆపరేషన్లో ఇప్పటివరకు సుమారు 400కు పైగా మావోయిస్టులు ఎన్కౌంటర్లలో మృతి చెందగా, 1,000 మందికి పైగా మావోయిస్టులు లొంగిపోయారు. భద్రతా దళాల కంబింగ్ ఆపరేషన్లు, ఇంటెలిజెన్స్ ఆధారిత దాడులు, అలాగే ప్రభుత్వ పునరావాస పథకాల కారణంగా అనేక మంది మావోయిస్టులు ఆయుధాలు వదిలి ప్రధాన ప్రవాహంలోకి వస్తున్నారు. ఈ చర్యల వల్ల ఛత్తీస్గఢ్, ఒడిశా, మహారాష్ట్ర, తెలంగాణ, ఆంధ్రప్రదేశ్ వంటి “రెడ్ కారిడార్” ప్రాంతాల్లో మావోయిస్టుల ప్రభావం గణనీయంగా తగ్గిందని భద్రతా సంస్థలు చెబుతున్నాయి.
ఈ సందర్భంగా ఒడిశా రాష్ట్రంలోని కటక్ జిల్లాలోని ముండలిలో జరిగిన కార్యక్రమంలో కేంద్ర హోంమంత్రి అమిత్ షా దేశంలో మావోయిస్టు కార్యకలాపాలు ముగింపు దశకు చేరుకున్నాయని ఈ నెల 31 నాటికి భారత్ పూర్తిగా మావోయిస్టు రహిత దేశంగా మారుతుందని విశ్వాసం వ్యక్తం చేశారు
ఈ పర్యటనలో భాగంగా కేంద్ర హోంమంత్రి అమిత్ షా ఒడిశా రాష్ట్రంలోని జగత్సింగ్పూర్ జిల్లాలో ఉన్న పరాదీప్లో ఇండియన్ ఫార్మర్స్ ఫెర్టిలైజర్ కోఆపరేటివ్ లిమిటెడ్ సంస్థకు చెందిన సల్ఫ్యూరిక్ యాసిడ్ ప్లాంట్ను ప్రారంభించారు. ఎరువుల ఉత్పత్తి సామర్థ్యాన్ని పెంచే లక్ష్యంతో ఈ కొత్త ప్లాంట్ను ఏర్పాటు చేశారు.
పరాదీప్లో ఏర్పాటు చేసిన ఈ ప్లాంట్ ద్వారా ఐఎఫ్ఎఫ్సీఓ ఎరువుల ఉత్పత్తి సామర్థ్యం మరింత పెరుగుతుందని, అలాగే ఆత్మనిర్భర్ భారత్ లక్ష్య సాధనకు ఇది సహాయపడుతుందని అధికారులు తెలిపారు.
ఈ కార్యక్రమంలో ఒడిశా ముఖ్యమంత్రి మోహన్ చరణ్ మజ్హీ, అసెంబ్లీ స్పీకర్ సురమా పాధి కేంద్ర విద్యాశాఖ మంత్రి ధర్మేంద్ర ప్రధాన్, సహా పలువురు ప్రముఖులు పాల్గొన్నారు.