బోనాల సందర్భంగా కులవృత్తుల మేళాకు విశేష స్పందన: మంత్రి పొన్నం ప్రభాకర్

ఆషాఢ మాస బోనాల ఉత్సవాల సందర్భంగా ఖైరతాబాద్‌లోని హెచ్‌ఎండీఏ గ్రౌండ్స్‌లో ఏర్పాటు చేసిన కులవృత్తుల మేళాకు నగర ప్రజల నుంచి విశేష స్పందన లభిస్తున్నట్లు బీసీ సంక్షేమ, రవాణా శాఖ మంత్రి పొన్నం ప్రభాకర్ తెలిపారు. ఈ మేరకు ఆయన సామాజిక మాధ్యమం ఎక్స్ వేదికగా స్పందిస్తూ, ఆదివారం సెలవు దినాన్ని సద్వినియోగం చేసుకుని కుటుంబ సమేతంగా మేళాను సందర్శించాలని ప్రజలకు విజ్ఞప్తి చేశారు.

బోనాల పండుగకు అవసరమైన కుండలు, బుట్టలు, మట్టి పాత్రలు తదితర సంప్రదాయ వస్తువులను ప్రజలు పెద్ద ఎత్తున కొనుగోలు చేస్తుండటం ఆనందదాయకమని మంత్రి పేర్కొన్నారు. మొత్తం 60 స్టాళ్లతో 15 రోజుల పాటు నిర్వహిస్తున్న ఈ ప్రదర్శనలో బీసీ వర్గాలకు చెందిన కళాకారులు తయారు చేసిన ఉత్పత్తులు ప్రజలకు అందుబాటులో ఉన్నాయని తెలిపారు.

ముఖ్యమంత్రి రేవంత్ రెడ్డి, ఉప ముఖ్యమంత్రి భట్టి విక్రమార్క నాయకత్వంలో రాష్ట్ర ప్రభుత్వం సంప్రదాయ కులవృత్తులకు నూతన ప్రోత్సాహం అందిస్తోందని మంత్రి చెప్పారు. కళాకారులు తమ ఉత్పత్తులను నేరుగా వినియోగదారులకు విక్రయించుకునే అవకాశాన్ని కల్పించేందుకు ప్రత్యేక స్టాళ్లను ఏర్పాటు చేసినట్లు వెల్లడించారు. ఈ కార్యక్రమం ద్వారా సంప్రదాయ వృత్తులకు ఆదరణ పెరగడంతో పాటు వేలాది మంది కళాకారుల జీవనోపాధికి భరోసా కలుగుతుందన్నారు.

ప్రదర్శనలో టెర్రకోట ఉత్పత్తులు, మట్టి పాత్రలు, మేదర బుట్టలు, జనపనార వస్తువులు, గద్వాల్ చీరలు, పోచంపల్లి ఇకత్ చేనేత వస్త్రాలు, నిర్మల్ బొమ్మలు, వెండి ఫిలిగ్రీ కళాఖండాలు, వరంగల్ దుర్రీలు, పెంబర్తి ఇత్తడి కళాఖండాలు, సేంద్రీయ ఆహార ఉత్పత్తులు, పర్యావరణహిత మట్టి వినాయక విగ్రహాలు తదితర వస్తువులు అందుబాటులో ఉన్నాయని తెలిపారు. తెలంగాణ సంస్కృతి, సంప్రదాయాలకు ప్రతీకలైన కులవృత్తులను పరిరక్షించడంలో ఇటువంటి మేళాలు కీలక పాత్ర పోషిస్తాయని మంత్రి పొన్నం ప్రభాకర్ పేర్కొన్నారు. స్థానిక కళాకారుల ఉత్పత్తులను కొనుగోలు చేయడం ద్వారా వారి కుటుంబాలకు ఆర్థికంగా అండగా నిలవాలని ప్రజలను కోరారు.