ఫ్యామిలీ ఎంటర్టైనర్ ‘కాన్ సిటీ’ టైటిల్ & ఫస్ట్ లుక్ పోస్టర్ విడుదల
ప్రముఖ దర్శకుడు లోకేష్ కనగరాజ్ తాజాగా తమిళ–తెలుగు ద్విభాషా చిత్రం “కాన్ సిటీ” ఫస్ట్ లుక్ను విడుదల చేసి చిత్రబృందానికి శుభాకాంక్షలు తెలిపారు. పవర్ హౌస్ పిక్చర్స్ నిర్మాణంలో, దర్శకుడిగా అరంగేట్రం చేస్తున్న హరీష్ దురైరాజ్ తెరకెక్కిస్తున్న ఈ సినిమా మొదటి చూపుతోనే ప్రేక్షకుల్లో ఆసక్తిని రేపుతోంది. ఫస్ట్ లుక్ పోస్టర్లోని గాఢమైన భావోద్వేగాలు, కథా నేపథ్యం సినిమాపై అంచనాలను పెంచాయి.
టాలీవుడ్, కోలీవుడ్లో తనదైన నటనతో గంభీరమైన గొంతుతో ప్రత్యేక గుర్తింపు తెచ్చుకున్న నటుడు అర్జున్ దాస్. ఆయన కథానాయకుడిగా పవర్ హౌస్ పిక్చర్స్ నిర్మిస్తున్న తాజా చిత్రం ఫస్ట్ లుక్ టైటిల్ను మేకర్స్ అధికారికంగా విడుదల చేశారు. ఈ సినిమాకు 'కాన్ సిటీ' అనే ఆసక్తికరమైన టైటిల్ను ఖరారు చేశారు.
ఈ చిత్రంలో లోకేష్ కనగరాజ్కు తరచూ కలిసి పనిచేసే నటుడు అర్జున్ దాస్ ప్రధాన పాత్రలో నటిస్తున్నారు. ఆయనతో పాటు మలయాళంలో గుర్తింపు పొందిన నటి అన్నా బెన్ ఈ సినిమాతో తమిళంలోకి అడుగుపెడుతున్నారు. అలాగే ప్రముఖ హాస్య నటుడు యోగి బాబు, సీనియర్ నటి వడివుకరసి ముఖ్య పాత్రలు పోషిస్తున్నారు. ఈ సినిమా నిజ జీవిత ఘటన ఆధారంగా తెరకెక్కుతోందన్న ట్యాగ్లైన్ మరింత ఆసక్తిని కలిగిస్తోంది.
పవర్ హౌస్ పిక్చర్స్, మాలి అండ్ మాన్వి , క్లౌట్ స్టూడియోస్ సంయుక్తంగా ఈ చిత్రాన్ని భారీ స్థాయిలో నిర్మిస్తున్నాయి. ఫస్ట్ లుక్ పోస్టర్ సినిమాపై అంచనాలను పెంచుతోంది. ఒక వైవిధ్యమైన కాన్సెప్ట్ లేదా క్రైమ్ డ్రామా నేపథ్యంతో ఈ సినిమా ఉండబోతున్నట్లు టైటిల్ చూస్తే అర్థమవుతోంది. త్వరలోనే ఈ చిత్రానికి సంబంధించిన మరిన్ని వివరాలను వెల్లడించనున్నట్లు చిత్ర యూనిట్ తెలిపింది.
లోకేష్ కనగరాజ్ తన సోషల్ మీడియా వేదికగా అర్జున్ దాస్ను “మచ్చి” అంటూ అభినందించగా, వెంటనే నటీనటులు, సాంకేతిక బృందం కృతజ్ఞతలు తెలియజేశారు. కుటుంబ నేపథ్యంతో కూడిన ఆసక్తికర కథగా ఈ చిత్రం రూపుదిద్దుకుంటోందని సమాచారం. సంగీతాన్ని సీన్ రోల్డన్ అందిస్తున్నారు. ప్రస్తుతం షూటింగ్ కొనసాగుతున్న ఈ సినిమా, బలమైన నటనతో పాటు హృదయాన్ని తాకే కథనంతో ప్రేక్షకులను ఆకట్టుకుంటుందనే విశ్వాసం వ్యక్తమవుతోంది.