ప్రజల జీవన ప్రమాణాల మెరుగుదలే సంక్షేమ లక్ష్యం: సీఎం చంద్రబాబు

ఆంధ్రప్రదేశ్ ఆర్థిక పునర్నిర్మాణం, గ్రామీణాభివృద్ధి దిశగా ఒక భారీ అడుగు పడింది. పల్నాడు జిల్లాలో ప్రభుత్వ రంగ బ్యాంకులు అత్యంత ప్రతిష్టాత్మకంగా ఏర్పాటు చేసిన భారీ క్రెడిట్ అవుట్‌రీచ్ (రుణాల మేళా) కార్యక్రమంలో ముఖ్యమంత్రి నారా చంద్రబాబు నాయుడు, కేంద్ర ఆర్థిక శాఖ మంత్రి నిర్మలా సీతారామన్ పాల్గొన్నారు. ఈ వేదికపై వివిధ కేంద్ర ప్రభుత్వ పథకాల కింద రాష్ట్రవ్యాప్తంగా ఉన్న 1,03,246 మందికి లబ్ధిదారులకు రూ. 3,216 కోట్ల విలువైన రుణాలను వారు పంపిణీ చేశారు. ఈ సందర్భంగా పల్నాడు జిల్లా నరసరావుపేటలో జరిగిన బహిరంగ సభలో ఇరువురు నేతలు ఉమ్మడి ఆంధ్రప్రదేశ్ ఆర్థిక బలోపేతానికి, పేదల సంక్షేమానికి డబుల్ ఇంజిన్ సర్కార్ చేస్తున్న కృషిని వివరించారు.

గ్రామ స్థాయికి బ్యాంకింగ్ సేవలు చేరడమే మోడీ లక్ష్యం: నిర్మలా సీతారామన్

కేంద్ర ఆర్థిక మంత్రి నిర్మలా సీతారామన్ మాట్లాడుతూ, చిన్న వ్యాపారులకు, స్వయం ఉపాధి పొందుతున్న పేదలకు సులభంగా ఆర్థిక సహాయం అందించాలనేది ప్రధానమంత్రి నరేంద్ర మోడీ దూరదృష్టి ఆలోచన అని కొనియాడారు. ముఖ్యంగా 2014 తర్వాత ప్రధాని మోడీ బ్యాంకులు నేరుగా గ్రామాలకే వెళ్లాలని స్పష్టం చేశారు. వ్యవసాయం చేసేవారు, వ్యవసాయ కూలీలు, మత్స్యకారులు లేదా హస్తకళాకారులు.. ఇలా వృత్తి ఏదైనా సరే, ప్రతి ఒక్కరికీ బ్యాంకింగ్ సేవలు వారి ముంగిటకే చేరాలని ఆమె అన్నారు. తోపుడు బండ్లపై వ్యాపారం చేసుకునే వీధి వ్యాపారులు, చిన్న వర్తకులు గతంలో మధ్యవర్తుల వద్ద దారుణమైన వడ్డీలకు అప్పులు తెచ్చుకుని నష్టపోయేవారని, ఆ అప్పుల ఊబి నుంచి వారిని గట్టెక్కించడానికి ఎటువంటి గ్యారెంటీ (హామీ) లేకుండానే అతి తక్కువ వడ్డీకే రుణాలను మోడీ ప్రభుత్వం అందిస్తోందని తెలిపారు. గతంలో రుణాల కోసం ప్రజలే బ్యాంకుల చుట్టూ తిరిగేవారని, ఇప్పుడు బ్యాంకులే ప్రజల వద్దకు వచ్చి రుణాలు అందిస్తున్నాయని ఆయన పేర్కొన్నారు.

యూపీఏ ప్రభుత్వ హయాంలో కేంద్రం నుంచి వచ్చే ఫోన్ కాల్స్ ఆధారంగా కేవలం కొద్దిమందికే రుణాలు ఇవ్వడం వల్ల బ్యాంకులు భారీగా మొండి బకాయిల ఊబిలో కూరుకుపోయాయని ఆరోపించారు. ఎన్డీయే ప్రభుత్వం బ్యాంకింగ్ రంగాన్ని సంస్కరించి, సరైన మార్గంలోకి తెచ్చిందని వివరించారు. లబ్ధిదారులు ఈ రుణాలను సద్వినియోగం చేసుకుని తమ వ్యాపారాలను మరింతగా అభివృద్ధి చేసుకోవాలని పిలుపునిచ్చారు.

అభివృద్ధి, సంక్షేమమే డబుల్ ఇంజిన్ సర్కార్ ధ్యేయం: సీఎం చంద్రబాబు

ముఖ్యమంత్రి చంద్రబాబు నాయుడు మాట్లాడుతూ, ప్రజల జీవన ప్రమాణాలను మెరుగుపరచడమే సంక్షేమ, అభివృద్ధి కార్యక్రమాల ప్రధాన ఉద్దేశమని స్పష్టం చేశారు. గతంలో ప్రజలు రుణాల కోసం బ్యాంకుల చుట్టూ తిరిగేవారు. కానీ నేడు బ్యాంకులే స్వయంగా ప్రజల వద్దకు వచ్చి రుణాలు అందిస్తున్నాయని హర్షం వ్యక్తం చేశారు. సంస్థాగత రుణాలు లభించడం వల్ల రైతులు, యువత, మహిళలు ప్రైవేట్ వడ్డీ వ్యాపారుల దారుణమైన అప్పుల ఉచ్చులో పడకుండా రక్షణ లభిస్తుందన్నారు. కేంద్ర ఆర్థిక మంత్రి నిర్మలా సీతారామన్‌పై సీఎం ప్రశంసలు కురిపించారు. ఆమె మొండి బకాయిలను కఠినంగా అణచివేసి, దేశంలో డిజిటల్ బ్యాంకింగ్ విప్లవాన్ని తీసుకువచ్చారని, జీఎస్టీ శ్లాబుల హేతుబద్ధీకరణ ద్వారా దేశ రాబడిని పెంచారని కొనియాడారు.

ఈ భారీ క్రెడిట్ అవుట్‌రీచ్ ప్రోగ్రామ్‌లో వివిధ రంగాలకు మంజూరైన రుణాల వివరాలను సీఎం చంద్రబాబు వెల్లడించారు. వ్యవసాయ రంగానికి రూ.2,363 కోట్లు, సూక్ష్మ, చిన్న, మధ్య తరహా పరిశ్రమలకు రూ.325 కోట్లు, గృహ నిర్మాణం, విద్య, వాహనాలు, సౌరశక్తి రంగాలకు రూ.624 కోట్ల రుణాలు మంజూరు చేసినట్లు వెల్లడించారు.

రాష్ట్ర ఆర్థిక రికవరీకి కేంద్రం భారీ సహాయం

గత ఐదేళ్ల (2019-2024) వైసీపీ పాలనలో ఆంధ్రప్రదేశ్ తీవ్ర ఆర్థిక సంక్షోభాన్ని ఎదుర్కొందని, ఆ సంక్షోభాం నుంచి రాష్ట్రం కోలుకోవడానికి కేంద్ర ప్రభుత్వం అమరావతి రాజధాని నిర్మాణం, పోలవరం ప్రాజెక్టు, విశాఖపట్నం స్టీల్ ప్లాంట్లకు భారీ ఆర్థిక సహాయాన్ని అందించిందని చంద్రబాబు గుర్తుచేశారు. కేంద్రం సహకారంతో గత ప్రభుత్వం చేసిన అధిక వడ్డీ రుణాలను రీషెడ్యూల్ చేయడం ద్వారా రాష్ట్ర ఖజానాకు రూ.1,538 కోట్ల పొదుపు లభించిందని తెలిపారు. వీబీ-జీ రామ్ కార్యక్రమం కింద ఆంధ్రప్రదేశ్‌కు రూ.7,707 కోట్లు అందనున్నాయని, రాయలసీమను ఉద్యానవన హబ్‌గా అభివృద్ధి చేసేందుకు రూ.40 వేల కోట్ల పెట్టుబడులు సమకూరనున్నాయని తెలిపారు. దీనివల్ల ప్రైవేటు పెట్టుబడులు కూడా ఆకర్షితమవుతాయని ఆశాభావం వ్యక్తం చేశారు.

మహిళా సాధికారత - భవిష్యత్తు విజన్

ఆంధ్రప్రదేశ్‌లోని 10 లక్షల డ్వాక్రా గ్రూపులు రూ.29,000 కోట్ల పొదుపును కలిగి ఉన్నాయని, వారి రుణాల రీపేమెంట్ రేటు అత్యధికంగా 99.5 శాతంగా ఉందని చంద్రబాబు గర్వంగా ప్రకటించారు. నిర్మలా సీతారామన్ మహిళలందరికీ ఒక గొప్ప స్ఫూర్తి అని అభివర్ణించారు. మహిళల్లో వ్యవస్థాపకతను ప్రోత్సహించడానికి తమ ప్రభుత్వం "ఒక కుటుంబం, ఒక పారిశ్రామికవేత్త" అనే వినూత్న కార్యక్రమాన్ని ప్రారంభించిందని తెలిపారు. 2047 నాటికి ఆంధ్రప్రదేశ్‌ను సంపన్న, ఆరోగ్యకరమైన, సంతోషకరమైన సమాజంగా మార్చడమే తన అంతిమ లక్ష్యమని పునరుద్ఘాటించారు.

ఈ కార్యక్రమానికి ముందు, సీఎం చంద్రబాబు, కేంద్ర మంత్రి నిర్మలా సీతారామన్ కలిసి యూనియన్ బ్యాంక్ తమ కార్పొరేట్ సామాజిక బాధ్యత (సీఎస్ఆర్) కింద ఏర్పాటు చేసిన సరికొత్త అంబులెన్స్‌లను ప్రారంభించారు. అలాగే పాఠశాల విద్యార్థినులకు ఉచితంగా సైకిళ్లను పంపిణీ చేశారు. అంతకుముందు, నిర్మలా సీతారామన్ ముఖ్యమంత్రి నివాసానికి చేరుకోగా, సీఎం చంద్రబాబుతో పాటు రాష్ట్ర ఐటీ, ఎలక్ట్రానిక్స్ శాఖ మంత్రి నారా లోకేష్ ఆమెకు ఘన స్వాగతం పలికారు.