నేపాల్ ఎన్నికల్లో ‘బాలెన్ షా’ పార్టీ ప్రభంజనం

నేపాల్ రాజకీయాల్లో పెను మార్పు మొదలైంది. గతేడాది యువత (జెన్-జెడ్) చేసిన భారీ పోరాటాల ప్రభావం ఇప్పుడు ఎన్నికల ఫలితాల్లో స్పష్టంగా కనిపిస్తోంది. పాత తరం రాజకీయ పార్టీలను కాదని, ప్రజలు కొత్త దారిని ఎంచుకున్నారు. శుక్రవారం వెల్లడైన ఫలితాల్లో రాపర్, ఇంజనీర్, మాజీ మేయర్ అయిన బాలేంద్ర షా (బాలెన్) తన 'రాష్ట్రీయ స్వతంత్ర పార్టీ'తో క్లీన్ స్వీప్ దిశగా దూసుకెళ్తున్నారు. దశాబ్దాలుగా నేపాల్‌ను ఏలుతున్న నేపాలీ కాంగ్రెస్, సిపిఎన్-యుఎంఎల్ వంటి పెద్ద పార్టీలకు ప్రజలు ఈసారి కోలుకోలేని షాక్ ఇచ్చారు.

ఓలీ కోటలో బాలెన్ పంజా

నేపాల్ మాజీ ప్రధాని, కమ్యూనిస్ట్ దిగ్గజం కె.పి. శర్మ ఓలీకి తన సొంత నియోజకవర్గం ఝాపా-5లో కోలుకోలేని దెబ్బ తగిలింది. ఓలీ తన ప్రత్యర్థి బాలేంద్ర షా కంటే సుమారు 13,000 ఓట్ల వెనుకంజలో ఉండటం గమనార్హం. ఎన్నికల సంఘం శుక్రవారం రాత్రి 10 గంటల వరకు ఇచ్చిన లెక్కల ప్రకారం.. నేపాల్‌లోని మొత్తం 165 స్థానాల్లో బాలేంద్ర షా పార్టీ (ఆర్‌ఎస్‌పీ) ఏకంగా 110 చోట్ల ఆధిక్యంలో ఉంది. దశాబ్దాలుగా అధికారంలో ఉన్న నేపాలీ కాంగ్రెస్ మాత్రం కేవలం 12 స్థానాలకే పరిమితమై కుప్పకూలిపోయింది.

186 సీట్లే లక్ష్యం: ఆర్‌ఎస్‌పీ ధీమా

ఖట్మండు శివార్లలోని ఓ కౌంటింగ్ కేంద్రం వద్ద ఆర్‌ఎస్‌పీ ఉపాధ్యక్షుడు డోల్ ప్రసాద్ ఆర్యల్ మాట్లాడుతూ సంచలన వ్యాఖ్యలు చేశారు. "మేము పార్లమెంటులో స్పష్టమైన రెండొంతుల మెజారిటీని ఆశిస్తున్నాము. మొత్తం 275 స్థానాలకు గాను మా పార్టీ 186 సీట్లు సాధిస్తుందని నమ్ముతున్నాం" అని ధీమా వ్యక్తం చేశారు. ప్రస్తుతం వెల్లడవుతున్న ఆధిక్యాలు చూస్తుంటే నేపాల్ రాజకీయాల్లో ఒకే పార్టీ ఏకచ్ఛత్రాధిపత్యం వహించేలా కనిపిస్తోంది.

రక్తపాతం నుంచి నవోదయం వరకు

గతేడాది సెప్టెంబర్‌లో అవినీతికి వ్యతిరేకంగా జరిగిన యువత పోరాటం నేపాల్‌ను కుదిపేసింది. ఆ నిరసనల్లో పోలీసుల కాల్పుల వల్ల సుమారు 77 మంది విద్యార్థులు, పౌరులు ప్రాణాలు కోల్పోయారు. ఆ రక్తపాతం తర్వాత ఆరు నెలల విరామంతో జరిగిన ఈ ఎన్నికలు నేపాల్‌కు ఒక 'నవోదయం' వంటివని విశ్లేషకులు భావిస్తున్నారు. సుమారు 60 శాతం మంది ఓటర్లు తమ ఓటు హక్కును వినియోగించుకుని పాత వ్యవస్థను తిరస్కరించి, మార్పు వైపు మొగ్గు చూపారు.

నేపాల్ తదుపరి ప్రధానిగా ‘బాలెన్’

35 ఏళ్ల యువ ఇంజనీర్ బాలేంద్ర షా నేపాల్ తదుపరి ప్రధానమంత్రి కావడం దాదాపు ఖాయమైంది. గత 18 ఏళ్లలో నేపాల్ ఏకంగా 14 ప్రభుత్వాలను చూసింది. ఈ రాజకీయ అస్థిరత, అవినీతితో విసిగిపోయిన ప్రజలు.. రవి లామిఛానే 2022లో స్థాపించిన ఆర్‌ఎస్‌పీ వైపు మొగ్గు చూపారు. గతేడాది సెప్టెంబర్‌లో నిరసనల తర్వాత బాలెన్‌ను తాత్కాలిక ప్రధానిగా ఉండాలని యువత కోరినా, ఆయన ప్రజాతీర్పు ద్వారానే అధికారంలోకి వస్తానని ప్రకటించి ఇప్పుడు ఘనవిజయం సాధించారు.

భారత్ ఆసక్తి.. స్థిరమైన ప్రభుత్వంపై ఆశలు

నేపాల్‌లో జరుగుతున్న ఈ మార్పును భారత్ నిశితంగా గమనిస్తోంది. సరిహద్దు దేశంలో స్థిరమైన ప్రభుత్వం ఏర్పడితే రెండు దేశాల మధ్య అభివృద్ధి భాగస్వామ్యం మరింత బలపడుతుందని భారత్ ఆశిస్తోంది. "నేపాల్ కొత్త ప్రభుత్వంతో కలిసి పనిచేసేందుకు మేము సిద్ధంగా ఉన్నాం" అని భారత విదేశీ వ్యవహారాల ప్రతినిధి రణధీర్ జైస్వాల్ ఢిల్లీలో పేర్కొన్నారు. ఈ ఎన్నికల కోసం నేపాల్ కోరిన మేరకు భారత్ అవసరమైన రవాణా సామాగ్రిని కూడా సమకూర్చింది.

ప్రముఖుల గెలుపులు

ఎన్నికల ఫలితాల్లో సిపిఎన్ (మావోయిస్ట్) నేత పుష్ప కమల్ దహల్ ప్రచండ.. రుకుమ్ ఈస్ట్ జిల్లా నుంచి ఘన విజయం సాధించారు. ఆర్‌ఎస్‌పీ అభ్యర్థి రంజు దర్శన ఖట్మండు-1 నుంచి గెలవగా, నేపాలీ కాంగ్రెస్ అభ్యర్థి యోగేష్ గౌచన్ ముస్తాంగ్ నుంచి విజయం సాధించారు. ఆర్‌ఎస్‌పీకి చెందిన బిరాజ్ భక్త శ్రేష్ఠ, శిశిర్ ఖనాల్ కూడా ఖట్మండు స్థానాల నుంచి గెలుపొందారు.

అవినీతి రహిత పాలనే అజెండా

విజయం ఖాయమవడంతో ఆర్‌ఎస్‌పీ తన భవిష్యత్తు ప్రణాళికను ప్రకటించింది. "ప్రపంచ దేశాలన్నీ నేపాల్ అంటే అవినీతికి నిలయమని చర్చించుకుంటున్నాయి. ఆ మచ్చను చెరిపివేసి, అవినీతిని సున్నా స్థాయికి తీసుకురావడమే మా ప్రధాన అజెండా" అని పార్టీ ప్రతినిధులు స్పష్టం చేశారు. కేవలం వాగ్దానాలు మాత్రమే కాకుండా అభివృద్ధిని నేరుగా ప్రజల వద్దకు చేర్చడమే బాలెన్ లక్ష్యమని పేర్కొన్నారు.

వారంలో పూర్తి స్థాయి ఫలితాలు

ప్రత్యక్ష ఎన్నికలు జరుగుతున్న 165 స్థానాలతో పాటు, దామాషా పద్ధతిలో ఎన్నికయ్యే మరో 110 స్థానాల ఫలితాలు కూడా మరో వారం రోజుల్లో పూర్తిగా వెలువడనున్నాయి. అప్పటికి బాలెన్ నేతృత్వంలో కొత్త ప్రభుత్వం కొలువుదీరడం లాంఛనమే కానుంది. ఈ విజయంతో నేపాల్ వీధులన్నీ ఆ పార్టీ మద్దతుదారుల పాటలు, డ్యాన్సులతో మార్మోగిపోతున్నాయి. తమ పార్టీ గుర్తు అయిన 'గంట'ను మోగిస్తూ ప్రజలు సంబరాలు చేసుకుంటున్నారు.