చైనాలో భారీ భూకంపం.. 6.2గా తీవ్రత నమోదు

చైనాలోని జిన్‌జియాంగ్ ప్రాంతంలో గురువారం మధ్యాహ్నం భారీ భూకంపం సంభవించింది. నేషనల్ సెంటర్ ఫర్ సీస్మోలజీ నివేదిక ప్రకారం, ఈ భూకంపం రిక్టర్ స్కేలుపై 6.2 తీవ్రతతో నమోదైంది. భూకంపం భారత కాలమానం ప్రకారం మధ్యాహ్నం 1:14 గంటలకు సంభవించింది. భూకంప కేంద్రం భూమి లోపల కేవలం 10 కిలోమీటర్ల లోతులో ఉంది. భూకంప కేంద్రం లోతు చాలా తక్కువగా ఉండటం వల్ల ప్రకంపనల తీవ్రత ఉపరితలంపై బలంగా ఉంటుంది. దీని కారణంగా నిర్మాణాలకు ఎక్కువ నష్టం జరిగే ప్రమాదం ఉంది, ప్రకంపనలు మళ్లీ వచ్చే అవకాశం కూడా ఉందని సమాచారం. డిసెంబర్ 2న కూడా ఇదే ప్రాంతంలో 3.9 తీవ్రతతో భూకంపం సంభవించింది.

చైనా భౌగోళిక స్థానం కారణంగా ఆ దేశం తరచూ భూకంపాల బారిన పడుతుంది. చైనా ప్రధానంగా రెండు అతిపెద్ద భూకంప మండలాలైన పసిఫిక్ ప్లేట్, ఇండియన్ ప్లేట్‌ల మధ్య ఉంది. ఈ ప్లేట్లు ఒత్తిడికి గురవడం వల్ల ఈ ప్రాంతంలో తరచూ భూకంపాలు సంభవిస్తున్నాయి.

చైనాలో భూకంపాల వల్ల జరిగిన నష్టం చాలా ఎక్కువ. 20వ శతాబ్దం ప్రారంభం నుండి చైనాలో 6.0 లేదా అంతకంటే ఎక్కువ తీవ్రతతో 800కు పైగా భూకంపాలు సంభవించాయి. 1900 సంవత్సరం నుండి ఇప్పటివరకు చైనాలో భూకంపాల వల్ల 5,50,000 మందికి పైగా ప్రజలు మరణించారు. ఇది ప్రపంచవ్యాప్తంగా భూకంపాల కారణంగా సంభవించిన మొత్తం మరణాలలో 53 శాతం కావడం గమనార్హం. 1949 తర్వాత కూడా 100కు పైగా విధ్వంసకర భూకంపాలు వచ్చాయి. వీటిలో 2,70,000 మందికి పైగా ప్రజలు ప్రాణాలు కోల్పోయారు. చైనాలో గుయిజౌ, జెజియాంగ్, మరియు హాంగ్ కాంగ్ మినహా దాదాపు అన్ని ప్రావిన్సుల్లో భూకంపాలు సంభవించాయి.

ఆఫ్ఘనిస్తాన్, బంగ్లాదేశ్‌ల‌నూ భూ ప్రకంపనలు

మరోవైపు గురువారం తెల్లవారుజామున ఆఫ్ఘనిస్తాన్, బంగ్లాదేశ్‌లలో కూడా స్వల్ప వ్యవధిలో భూకంపాలు సంభవించాయి. ఈ రెండు చోట్లా 4.1 తీవ్రతతో ప్రకంపనలు నమోదయ్యాయి. ఆఫ్ఘనిస్తాన్‌లో భూకంపం ఉదయం 3:05 గంటలకు 140 కి.మీ. లోతులో సంభవించింది. ఇటీవల నవంబర్ 4న 6.3 తీవ్రతతో సంభవించిన భారీ భూకంపం వల్ల ఆఫ్ఘనిస్తాన్‌లో 27 మంది మరణించారు.

బంగ్లాదేశ్‌లోనూ ఉదయం 5:44 గంటలకు భూమి కంపించింది. ఇక్కడ భూకంప కేంద్రం కేవలం 30 కి.మీ. లోతులో ఉండటం ఆందోళన కలిగించే అంశం. తక్కువ లోతులో భూకంపం వస్తే, ఉపరితలంపై తీవ్రత పెరిగి నష్టం ఎక్కువవుతుంది. బంగ్లాదేశ్ మూడు టెక్టోనిక్ ప్లేట్లు కలిసే చోట ఉంది. అధిక జన సాంద్రత, బలహీన నిర్మాణాల కారణంగా ప్రపంచంలో భూకంపాల వల్ల ప్రమాదంలో ఉన్న 20 నగరాల్లో ఢాకా ఒకటిగా ఉంది.