ఏపీలో న్యాయమూర్తులు, న్యాయాధికారులకు డీఏ పెంపు

రాష్ట్రంలోని న్యాయమూర్తులు, న్యాయాధికారులకు రాష్ట్ర ప్రభుత్వం తీపికబురు అందించింది. వారికి ఇచ్చే కరువు భత్యం (డీఏ)ను 55 శాతం నుండి 58 శాతానికి పెంచుతూ రాష్ట్ర న్యాయ శాఖ గురువారం ఉత్తర్వులు జారీ చేసింది. రాష్ట్ర న్యాయ, మైనారిటీ సంక్షేమ శాఖ మంత్రి ఎన్ఎండి ఫరూక్ ఈ విషయాన్ని ఒక ప్రకటనలో వెల్లడించారు. కేంద్ర న్యాయశాఖ నుండి అందిన లేఖలను అనుసరించి ఈ నిర్ణయం తీసుకున్నట్లు ఆయన తెలిపారు. హైకోర్టు న్యాయమూర్తులు, న్యాయాధికారులు (వివిధ కోర్టులలో పనిచేసే జడ్జిలు), పదవీ విరమణ చేసిన న్యాయమూర్తులు, న్యాయాధికారులు, కుటుంబ పింఛనుదారులకు ఈ పెంపు వర్తిస్తుంది. మంత్రి ఫరూక్ తెలిపిన వివరాల ప్రకారం, ఈ డీఏ పెంపు 2025 జూలై 1 నుండి అమలులోకి వస్తుంది.

సాధారణంగా ఉద్యోగుల జీతాలు, పింఛన్లపై ధరల పెరుగుదల ప్రభావాన్ని తగ్గించడానికి కరువు భత్యం (డీఏ) పెంచుతుంటారు. ఈ పెంపు కేవలం ప్రస్తుతం విధుల్లో ఉన్నవారికే కాకుండా, పదవీ విరమణ చేసిన పింఛనుదారులకు, కుటుంబ పింఛనుదారులకు కూడా వర్తింపజేయడం వలన వారికి ఆర్థికంగా పెద్ద ఊరట లభిస్తుంది. కేంద్ర న్యాయశాఖ ఇచ్చిన మార్గదర్శకాలకు అనుగుణంగా రాష్ట్ర న్యాయశాఖ తక్షణమే స్పందించి ఈ ఉత్తర్వులను జారీ చేసినట్లు మంత్రి ఫరూక్ తన ప్రకటనలో వివరించారు.

డీఏ పెంపుతో జీతాలు పెరగనున్నాయ్ ఇలా..

ముఖ్యంగా, ఈ 3 శాతం పెంపు వలన ఏపీలో హైకోర్టు చీఫ్ జస్టిస్‌కు నెలకు రూ.7,500 అదనంగా వస్తుంది. సాధారణ హైకోర్టు న్యాయమూర్తికి నెలకు రూ.6,750, డిస్ట్రిక్ట్ కోర్టు న్యాయాధికారులకు వారి హోదాను బట్టి నెలకు రూ.4,200 నుండి రూ.6,000 వరకు అదనంగా లభిస్తుంది. ఈ పెంపు 2025 జూలై నుండి అమలులోకి వస్తుంది కాబట్టి, జూలై నుండి డిసెంబర్ వరకు అంటే 6 నెలల బకాయిలు కూడా ఒకేసారి చెల్లించనున్నారు.

ఈ బకాయిల రూపంలో హైకోర్టు న్యాయమూర్తికి రూ.40,000- రూ.45,000 వరకు, అలాగే డిస్ట్రిక్ట్ జడ్జిలకు రూ.25,000-రూ.36,000 వరకు ఒకేసారి చేతికి అందనుంది. ఈ 3 శాతం డీఏ పెంపు ద్వారా ప్రతి న్యాయమూర్తి, న్యాయాధికారి నెలకు రూ.4,000 నుండి రూ.7,500 వరకు అదనంగా పొందనున్నారు. అంతేకాకుండా పింఛనుదారులు, కుటుంబ పింఛనుదారులు కూడా ఈ పెంపు ప్రయోజనాన్ని పొందుతారు. జనవరి 2026 నుండి ప్రతి నెలా కొత్త డీఏతో పెరిగిన జీతం అందుతుంది.