ఏపీలో నాలుగు కరోనా నమూనాల్లో ‘ఒమిక్రాన్ ఆర్ఎఫ్.5’ వేరియంట్ గుర్తింపు

ఆంధ్రప్రదేశ్‌లో కరోనా వైరస్‌కు చెందిన ఒమిక్రాన్ ఉప వేరియంట్ ఆర్ఎఫ్.5 నాలుగు కోవిడ్-19 పాజిటివ్ నమూనాల్లో గుర్తించినట్లు రాష్ట్ర వైద్య ఆరోగ్య శాఖ మంత్రి సత్యకుమార్ యాదవ్ తెలిపారు. కడప జిల్లాలో నమోదైన నాలుగు కరోనా కేసుల నమూనాలను జన్యు విశ్లేషణ (జీనోమ్ సీక్వెన్సింగ్) కోసం పుణెలోని వైరాలజీ ప్రయోగశాలకు పంపగా, వాటిలో ఒమిక్రాన్ ఆర్ఎఫ్.5 ఉప వేరియంట్ ఉన్నట్లు నిర్ధారణ అయినట్లు శనివారం రాత్రి విడుదల చేసిన అధికారిక ప్రకటనలో వెల్లడించారు.

ఈ నివేదికలు అందిన వెంటనే ఆరోగ్య శాఖ ఉన్నతాధికారులతో మంత్రి సత్యకుమార్ యాదవ్ టెలిఫోన్ ద్వారా సమీక్ష నిర్వహించారు. రాష్ట్రంలో ప్రస్తుత కరోనా పరిస్థితి, కొత్త వేరియంట్‌కు సంబంధించిన వివరాలు, ముందస్తు చర్యలపై అధికారులతో చర్చించినట్లు తెలిపారు.

ఆరోగ్య శాఖ వివరాల ప్రకారం, ఆర్ఎఫ్.5 అనేది కరోనా వైరస్‌లోని ఒమిక్రాన్ వేరియంట్‌కు చెందిన ఒక ఉప వేరియంట్. ప్రపంచవ్యాప్తంగా గుర్తించబడిన పలు ఒమిక్రాన్ ఉప వేరియంట్లలో ఇది కూడా ఒకటి. ప్రస్తుతం ప్రపంచ ఆరోగ్య సంస్థ ఈ వేరియంట్‌ను సాధారణ జన్యు నిఘా కార్యక్రమంలో భాగంగా పర్యవేక్షిస్తోంది. ముఖ్యంగా సింగపూర్‌తో పాటు ఆగ్నేయాసియా దేశాల్లో ఈ వేరియంట్‌కు సంబంధించిన కేసులు ఎక్కువగా నమోదైనట్లు అధికారులు తెలిపారు. వైద్య విద్య సంచాలకుడు డాక్టర్ విష్ణువర్ధన్ మాట్లాడుతూ, ప్రస్తుతం అందుబాటులో ఉన్న శాస్త్రీయ ఆధారాల ప్రకారం ఆర్ఎఫ్.5 వేరియంట్ ఇతర ఒమిక్రాన్ ఉప వేరియంట్ల కంటే ప్రమాదకరమని ఎలాంటి ఆధారాలు లేవన్నారు. ప్రజలు భయాందోళనలకు గురికావాల్సిన అవసరం లేదని, అయితే అప్రమత్తంగా ఉండటం మాత్రం అవసరమని సూచించారు.

అధికారుల ప్రకారం ఆర్ఎఫ్.5 అనేది సహజంగా పరిణామం చెందిన ఒమిక్రాన్ ఉప వేరియంట్. ఇది జేఎన్.1 వేరియంట్ నుంచి ఎల్ఎఫ్.7, పీవై.1.1.1 శాఖల ద్వారా అభివృద్ధి చెందినదని తెలిపారు. ఇది రెండు వేరియంట్లు కలిసిన రీకాంబినెంట్ వేరియంట్ కాదని, సాధారణ జన్యు పర్యవేక్షణలో భాగంగా ప్రపంచ ఆరోగ్య సంస్థ నిరంతరం దీనిని పరిశీలిస్తోందని వివరించారు. ఆర్ఎఫ్.5 వేరియంట్ లక్షణాలు ఇతర ఒమిక్రాన్ ఉప వేరియంట్ల మాదిరిగానే ఉంటాయని వైద్య నిపుణులు పేర్కొన్నారు. గొంతు నొప్పి, దగ్గు, జ్వరం, తలనొప్పి, శరీర నొప్పులు వంటి లక్షణాలు కనిపించే అవకాశం ఉందన్నారు.

రాష్ట్రంలో కరోనా పరిస్థితి ప్రస్తుతం అదుపులోనే ఉందని మంత్రి సత్యకుమార్ యాదవ్ స్పష్టం చేశారు. కరోనా కేసులు అక్కడక్కడా మాత్రమే నమోదవుతున్నాయని తెలిపారు. అయినప్పటికీ ముందస్తు చర్యల్లో భాగంగా బోధనాసుపత్రుల్లో ప్రత్యేక కోవిడ్ వార్డులను సిద్ధం చేస్తున్నామని, పరీక్షల కోసం అవసరమైన కోవిడ్ టెస్టింగ్ కిట్లు, ఇతర వైద్య సదుపాయాలను అందుబాటులో ఉంచుతున్నామని చెప్పారు.

ఆరోగ్య శాఖ గణాంకాల ప్రకారం రాష్ట్రంలో ఇప్పటివరకు మొత్తం 16 కరోనా కేసులు నమోదయ్యాయి. వీటిలో జూలై 16 నాటికి 12 కేసులు నమోదైనట్లు అధికారులు వెల్లడించారు. పరిస్థితిని ఎప్పటికప్పుడు పర్యవేక్షిస్తూ అవసరమైన అన్ని జాగ్రత్త చర్యలు తీసుకుంటున్నామని ఆరోగ్య శాఖ స్పష్టం చేసింది.