ఆంధ్రప్రదేశ్ ఎఫ్సీవీ పొగాకు మార్కెటింగ్ పై కేంద్ర వాణిజ్య శాఖ కీలక సమీక్ష
ఆంధ్రప్రదేశ్లో కొనసాగుతున్న 2025-26 ఫ్లూ క్యూర్డ్ వర్జీనియా (ఎఫ్సీవీ) పొగాకు మార్కెటింగ్ సీజన్పై కేంద్ర వాణిజ్య శాఖ సమగ్ర సమీక్ష నిర్వహించింది. పొగాకు రైతుల ప్రయోజనాల పరిరక్షణతో పాటు ఎగుమతుల విస్తరణ, మార్కెటింగ్ వ్యవస్థ బలోపేతంపై ప్రత్యేక దృష్టి సారించినట్లు వాణిజ్య, పరిశ్రమల మంత్రిత్వ శాఖ వెల్లడించింది.
వాణిజ్య శాఖ అదనపు కార్యదర్శి నితిన్ కుమార్ యాదవ్ నేతృత్వంలోని ఉన్నతాధికారుల బృందం హైదరాబాద్లో ఉన్నతస్థాయి సమీక్ష సమావేశం నిర్వహించింది. ఈ సమావేశంలో పొగాకు రైతులు, తయారీదారులు, ఎగుమతిదారులు, డీలర్లు, వ్యాపార సంఘాల ప్రతినిధులు, పొగాకు బోర్డు అధికారులు పాల్గొన్నారు. ప్రస్తుతం మార్కెట్ పరిస్థితులు, కొనుగోలు ప్రక్రియ పురోగతి, ఎగుమతి అవకాశాలు, రంగంలో అవసరమైన నిర్మాణాత్మక సంస్కరణలపై విస్తృతంగా చర్చించారు.
ఎఫ్సీవీ పొగాకు కొనుగోళ్లను వేగవంతం చేయడం, అంతర్జాతీయ మార్కెట్లకు ఎగుమతులను సులభతరం చేయడం, మార్కెటింగ్ వ్యవస్థను మరింత సమర్థవంతంగా మార్చేందుకు తీసుకోవాల్సిన చర్యలను సమావేశంలో పరిశీలించారు. వివిధ దేశాల్లో ఎగుమతి అవకాశాలను విస్తరించేందుకు అనుసరించాల్సిన వ్యూహాలపై కూడా చర్చ జరిగింది. అదే సమయంలో అనుకూల ప్రాంతాల్లో పంటల వైవిధ్యీకరణను ప్రోత్సహించడం ద్వారా రైతులకు ప్రత్యామ్నాయ ఆదాయ వనరులు కల్పించే అంశాన్ని అధికారులు ప్రస్తావించారు.
రంగ ఆధునికీకరణకు సంబంధించిన పలు కార్యక్రమాలు కూడా సమీక్షలో ప్రధానాంశాలుగా నిలిచాయి. పొగాకు బోర్డు పునర్వ్యవస్థీకరణ, రైతుల సంక్షేమ నిధి (గ్రోవర్స్ వెల్ఫేర్ ఫండ్) కింద అందించే ప్రయోజనాల పెంపు, నమోదు ప్రక్రియల సరళీకరణ వంటి సంస్కరణలను అధికారులు పరిశీలించారు. అలాగే డిజిటల్ సేవల విస్తరణ, కృత్రిమ మేధస్సు (ఏఐ) ఆధారిత గ్రేడింగ్ వ్యవస్థల అమలు ద్వారా వ్యాపార కార్యకలాపాలను మరింత పారదర్శకంగా, వేగవంతంగా మార్చే చర్యలపై చర్చించారు.
ఎఫ్సీవీ పొగాకు రంగం బలోపేతానికి రైతులకు నిరంతర మద్దతు అందించడంతో పాటు భారతదేశ ఎగుమతి పోటీతత్వాన్ని పెంచడం అవసరమని వాణిజ్య శాఖ పేర్కొంది. వేగవంతమైన కొనుగోళ్లు, ఎగుమతుల ప్రోత్సాహం, దీర్ఘకాలిక రంగాభివృద్ధి కోసం అన్ని వర్గాల భాగస్వామ్యంతో సమన్వయ చర్యలు కొనసాగుతాయని స్పష్టం చేసింది.
సమీక్ష అనంతరం మాట్లాడిన అదనపు కార్యదర్శి నితిన్ కుమార్ యాదవ్, అన్ని భాగస్వామ్య వర్గాల సమిష్టి కృషితో భారత ఎఫ్సీవీ పొగాకు రంగం మరింత స్థిరత్వాన్ని సాధించి, ప్రపంచ మార్కెట్లో పోటీతత్వాన్ని పెంచుకుంటుందని ఆశాభావం వ్యక్తం చేశారు. రంగంలో చేపడుతున్న సంస్కరణలు దీర్ఘకాలిక అభివృద్ధికి కీలకంగా నిలుస్తాయని ఆయన పేర్కొన్నారు.