అమెరికా శాంతి ఒప్పందం.. కొన్ని ప్రతిపాదనలు తిరస్కరించిన రష్యా

ఉక్రెయిన్ యుద్ధాన్ని ముగించేందుకు అమెరికా రాయబారులతో తాను జరిపిన సుదీర్ఘ చర్చలు అవసరమైనవి, ఉపయోగకరమైనవి అయినప్పటికీ, ఇది కష్టంతో కూడుకున్న పని అని రష్యా అధ్యక్షుడు వ్లాదిమిర్ పుతిన్ వ్యాఖ్యానించారు. అమెరికా ప్రతిపాదించిన శాంతి ప్రణాళికలోని కొన్ని అంశాలను క్రెమ్లిన్ (రష్యా ప్రభుత్వం) అంగీకరించలేదని ఆయన స్పష్టం చేశారు.

అమెరికా అధ్యక్షుడు డొనాల్డ్ ట్రంప్ ప్రత్యేక రాయబారి స్టీవ్ విట్‌కాఫ్, ఆయన అల్లుడు జేర్డ్ కుష్నర్ మాస్కోలోని క్రెమ్లిన్‌లో బుధవారం పుతిన్‌తో సుమారు ఐదు గంటల పాటు చర్చలు జరిపారు. దీనిపై స్పందించిన ట్రంప్, చర్చల తర్వాత పుతిన్ యుద్ధాన్ని ముగించాలని గట్టిగా కోరుకుంటున్నారనే నమ్మకం విట్‌కాఫ్, కుష్నర్‌లకు కలిగిందని ట్రంప్ బుధవారం అన్నారు.

చర్చల సమయంలో అమెరికా శాంతి ప్రతిపాదనలోని ప్రతి అంశాన్ని పరిశీలించాల్సి వచ్చిందని, అందుకే ఇంత సమయం పట్టిందని పుతిన్ పేర్కొన్నారు. "ఇది అవసరమైన సంభాషణ, చాలా నిర్దిష్టమైనది" అని ఆయన అన్నారు. అయితే కొన్ని నిబంధనలు చర్చించడానికి సిద్ధంగా ఉన్నామని, మరికొన్నింటికి మాత్రం అంగీకరించలేమని మాస్కో స్పష్టం చేసిందని పుతిన్ తెలిపారు.

శాంతి ప్రణాళికలో రష్యాకు అనుకూలమైన అంశాలు

అమెరికా అధ్యక్షుడు డొనాల్డ్ ట్రంప్ ప్రతిపాదించిన 28 అంశాల శాంతి ప్రణాళికలో రష్యాకు అనుకూలంగా కొన్ని ముఖ్యమైన అంశాలు ఉన్నాయి. ఇందులో ప్రధానంగా, ఉక్రెయిన్ తన సైనిక శక్తి పరిమాణాన్ని పరిమితం చేసుకోవాలి అనే షరతు ఉంది. అలాగే ఉక్రెయిన్ నాటో కూటమిలో చేరే ప్రయత్నాన్ని పూర్తిగా విరమించుకోవాలి అని డిమాండ్ చేసింది. అన్నింటికంటే ముఖ్యంగా రష్యా ఇప్పటికే ఆక్రమించుకున్న డాన్‌బాస్ ప్రాంతంలోని కొన్ని కీలక భూభాగాలను వదులుకోవడానికి కైవ్ అంగీకరించాలని ఈ ప్లాన్ సూచిస్తుంది. ఇవన్నీ రష్యా చాలా కాలంగా కోరుతున్న డిమాండ్లు కావడం వల్ల, ఈ ప్రణాళికపై యూరోపియన్ దేశాలు ఆందోళన వ్యక్తం చేశాయి.

ఉక్రెయిన్ కోరుతున్న ముఖ్య హామీలు

ఈ షరతుల కారణంగా భవిష్యత్తులో రష్యా మళ్లీ దాడి చేయకుండా తమ దేశానికి భద్రత ఉండాలని ఉక్రెయిన్ కోరుతోంది. ఉక్రెయిన్ ప్రధానంగా కోరుతున్న హామీలలో.. రష్యా మళ్లీ దాడి చేస్తే, అమెరికాతో సహా ప్రధాన మిత్రదేశాల నుంచి తక్షణమే సైనిక సహాయం, ఆయుధ సరఫరా అందాలి. నాటోలో చేరకుండా ఉక్రెయిన్ తటస్థంగా ఉండాల్సి వస్తే, దానికి బదులుగా అదే స్థాయిలో పటిష్టమైన భద్రతా కవచం ఉండాలి. శాంతి ఒప్పందం నిజంగా అమలు చేయదగిన శక్తి కలిగి ఉండాలి, కేవలం కాగితంపై సంతకాలకు పరిమితం కాకూడదు. ఈ భద్రతా హామీలు, భూభాగాల అంశంపై స్పష్టత వస్తేనే, శాంతి ఒప్పందాన్ని ఖరారు చేయడానికి సిద్ధంగా ఉన్నామని ఉక్రెయిన్ తెలిపింది.