ద్రాక్షారామంలో అగ్నిప్రమాద బాధితులకు అండగా వైఎస్సార్సీపీ
కోనసీమ జిల్లా రామచంద్రపురం మండలంలోని ద్రాక్షారామం కూరగాయల మార్కెట్లో శుక్రవారం తెల్లవారుజామున జరిగిన అగ్నిప్రమాదంలో దగ్ధమైన దుకాణాలను మాజీ ఎంపీ పిల్లి సుభాష్ చంద్రబోస్, వైఎస్సార్సీపీ రామచంద్రపురం నియోజకవర్గ సమన్వయకర్త పిల్లి సూర్యప్రకాశ్ పార్టీ నాయకులతో కలిసి పరిశీలించారు. అర్ధరాత్రి సమయంలో చోటుచేసుకున్న ఈ ప్రమాదంలో పలువురు చిరు వ్యాపారులు తీవ్రంగా నష్టపోయారు.
ఈ ఘటన స్థలానికి చేరుకున్న నాయకులు బాధిత వ్యాపారులను పరామర్శించి, జరిగిన నష్టంపై వివరాలు అడిగి తెలుసుకున్నారు. ఈ క్లిష్ట సమయంలో ఎలాంటి ఆందోళన చెందాల్సిన అవసరం లేదని, బాధితులకు న్యాయం జరిగే వరకు వైఎస్సార్సీపీ అండగా నిలుస్తుందని భరోసా ఇచ్చారు. వ్యాపారుల జీవనాధారమైన దుకాణాలు అగ్నికి ఆహుతి కావడం బాధాకరమని పేర్కొంటూ, ప్రభుత్వం వెంటనే స్పందించి నష్టాన్ని అంచనా వేసి తక్షణ ఆర్థిక సాయం, తగిన పరిహారం అందించాలని డిమాండ్ చేశారు.
చిరు వ్యాపారుల కష్టాలను ప్రభుత్వం గుర్తించి వారికి అన్ని విధాలుగా అండగా నిలవాల్సిన అవసరం ఉందని వారు అన్నారు. ప్రజలు కష్టాల్లో ఉన్నప్పుడు వారి పక్షాన నిలబడటం వైఎస్సార్సీపీ విధానమని, బాధిత కుటుంబాలకు అవసరమైన సహాయ సహకారాలు అందించేందుకు పార్టీ ఎల్లప్పుడూ సిద్ధంగా ఉంటుందని నాయకులు స్పష్టం చేశారు. ఈ కార్యక్రమంలో వైఎస్సార్సీపీ నాయకులు, కార్యకర్తలు, స్థానిక ప్రజలు పాల్గొని బాధిత వ్యాపారులకు సంఘీభావం తెలిపారు.