చిన్నారి జ్ఞానేశ్వరి ఆచూకీ ఎక్కడ? 12వ రోజుకూ కొనసాగుతున్న గాలింపు

కాకినాడ జిల్లాలో రెండు సంవత్సరాల వయస్సు గల చిన్నారి (జ్ఞానేశ్వరి) అదృశ్యమైన ఘటన తెలుగు రాష్ట్రాల్లో తీవ్ర సంచలనం రేకెత్తిస్తోంది. బాలిక అదృశ్యమై నిన్న‌టికి 12 రోజులు గడుస్తున్నా ఇప్పటివరకు ఆమె జాడ లభించలేదు. దీంతో బుధవారం కూడా పోలీసులు తమ గాలింపు చర్యలను ముమ్మరంగా కొనసాగించారు. ఈ కేసు దర్యాప్తులో కిడ్నాప్, క్రూర జంతువుల దాడి, లేదా కుటుంబ కలహాలు.. ఇలా సాధ్యమైన అన్ని కోణాల్లోనూ ఇన్వెస్టిగేషన్ బృందాలు విచారణ జరుపుతున్నాయి.

ఈ చిన్నారి జూన్ 6న కాకినాడ జిల్లాలోని చింతల అగ్రహారం గ్రామం నుంచి అకస్మాత్తుగా అదృశ్యమైంది. దీనితో రంగంలోకి దిగిన స్థానిక పోలీసులు.. నేషనల్ డిజాస్టర్ రెస్పాన్స్ ఫోర్స్ (ఎన్డీఆర్ఎఫ్), స్టేట్ డిజాస్టర్ రెస్పాన్స్ ఫోర్స్ (ఎస్డీఆర్ఎఫ్), డాగ్ స్క్వాడ్స్, సాంకేతిక విభాగాలు, అటవీ శాఖ, ఇతర ప్రభుత్వ శాఖల అధికారులతో కలిసి ఒక భారీ ఉమ్మడి శోధన ఆపరేషన్‌ను చేపట్టారు.

మంగళవారం రాత్రి ఒక ఉన్నతాధికారి మీడియాతో మాట్లాడుతూ.. మేము కిడ్నాప్, వన్యప్రాణుల దాడి, కుటుంబ సంబంధిత వివాదాల వంటి ప్రతి ఒక్క అవకాశాన్ని నిశితంగా పరిశీలిస్తున్నాము. ఎలాంటి చిన్న క్లూ లభించినా దాని ఆధారంగా ముందుకు వెళ్తున్నాము. కొండలు, దట్టమైన అడవులు, నీటి వనరులు, చుట్టుపక్కల ప్రాంతాలలో మా బృందాలు గాలింపు చర్యలు కొనసాగిస్తున్నాయని తెలిపారు.

అసలేం జరిగింది?

పోలీసుల కథనం ప్రకారం.. సంఘటన జరిగిన రోజు ఆ చిన్నారి తన పెంపుడు కుక్కతో కలిసి గ్రామానికి సమీపంలో ఉన్న జీడిమామిడి తోట వైపు వెళ్ళింది. ఆ తోట సరిహద్దున ఉన్న ఫెన్సింగ్ (కంచె) లైన్ వద్ద బాలిక చివరిసారిగా కనిపించింది, ఆ తర్వాతే ఆమె అదృశ్యమైంది. తోట సమీపంలో ఒంటరిగా ఉన్న ఆ చిన్నారిని గమనించిన ఒక గ్రామస్థుడు.. ఆ విషయాన్ని ఆమె తల్లిదండ్రులకు చెప్పడానికి ప్రయత్నించాడు. అయితే, అతడు పాప దగ్గరకు వెళ్లబోగా వారి పెంపుడు కుక్క అతనిపై దాడి చేసింది. ఆ తర్వాత కుటుంబ సభ్యులు, గ్రామస్థులు కలిసి ఆ ప్రదేశానికి చేరుకునేసరికి దాదాపు 35 నిమిషాల సమయం పట్టింది. అప్పటికే అక్కడ పాప కనిపించకుండా పోయిందని పోలీసులు తెలిపారు. వెంటనే స్పందించిన బృందాలు తొలుత ఆ పరిసర ప్రాంతాల్లో వెతికి, ఆపై పక్కనే ఉన్న కొండ ప్రాంతాలకు తమ చర్యలను విస్తరించాయి.

గ్రామం చుట్టుపక్కల ఉన్న అన్ని మార్గాల్లోని సీసీటీవీ ఫుటేజీలను పోలీసులు క్షుణ్ణంగా పరిశీలించారు. ఆ సమయంలో ఆ మార్గాల్లో తిరిగిన ఆటో రిక్షాలు, వ్యాన్లు, ఇతర రవాణా వాహనాల డ్రైవర్లను పిలిపించి.. పాపను ఎవరైనా వాహనంలో తీసుకెళ్లారా అనే కోణంలో నిలదీశారు. అంతేకాకుండా, ఘటన జరిగిన సమయంలో ఆ ప్రాంతంలో యాక్టివ్‌గా ఉన్న మొబైల్ సిగ్నల్ డేటాను విశ్లేషించి దాదాపు 170 మొబైల్ నంబర్లను గుర్తించారు. ఈ నంబర్లను నిశితంగా పరిశీలించడానికి, అలాగే సంఘటనకు ముందు అక్కడ ఉండి, ఆ తర్వాత ఆ ప్రదేశాన్ని విడిచిపెట్టి వెళ్లిన వారి కదలికలను ధృవీకరించడానికి నాలుగు ప్రత్యేక బృందాలను రంగంలోకి దించారు.

మరోవైపు, పోలీసులు గ్రామంలోని మొత్తం 470 ఇళ్లలోనూ సర్వే నిర్వహించి, సుమారు 150 మంది నివాసితులను ప్రశ్నించారు. ముఖ్యంగా జీడిమామిడి పంట కాలంలో ఆ ప్రాంతానికి వచ్చే వలస కూలీలు, సంచార జాతుల కదలికలను అధికారులు విచారణ చేస్తున్నారు. ఘటనకు కొన్ని రోజుల ముందు కుక్కలతో కలిసి ఆ ప్రాంతంలో తాత్కాలికంగా విడిది చేసిన ఒక బృందాన్ని కూడా గుర్తించి విచారించే ప్రయత్నాలు జరుగుతున్నాయి.

ప్రారంభంలో ఒక స్థానిక వ్యక్తిపై అనుమానం వచ్చింది. అతనిని నాలుగు వేర్వేరు బృందాలు పలుమార్లు విడివిడిగా విచారించాయి. అయితే అతను ప్రతిసారీ ఒకే సమాధానం ఇచ్చాడు. మేము అతనిని కానీ, మరెవరినీ కానీ నిర్బంధించలేదు. బాలిక అదృశ్యంతో అతనికి సంబంధం ఉన్నట్లు ఎలాంటి ఆధారాలు లభించలేదని పేర్కొంటూ, స్థానికుడిపై వస్తున్న వదంతులను అధికారి కొట్టిపారేశారు.

జంతువుల దాడి కోణం..

పాపపై ఏదైనా అడవి జంతువు దాడి చేసి ఉండవచ్చనే కోణాన్ని కూడా దర్యాప్తు అధికారులు సమాంతరంగా పరిశీలిస్తున్నారు. ఈ అనుమానాన్ని నివృత్తి చేసుకోవడం కోసం పోలీసులు, అటవీ శాఖ అధికారులు కలిసి ఒక వినూత్న ప్రయోగాన్ని చేశారు. జూన్ 6వ తేదీన మధ్యాహ్నం వేళ పాప ఎక్కడైతే చివరిసారిగా కనిపించిందో, సరిగ్గా అదే స్థలంలో మాంసం ముక్కలు ఉంచిన ఒక బొమ్మను ఉంచి నాటి పరిస్థితులను పునఃసృష్టి చేశారు. ఆ మాంసం వాసనకు ఏదైనా క్రూర జంతువు ఆకర్షితురాలై ఆ బొమ్మను ఎత్తుకెళ్తుందా అని పర్యవేక్షించడానికి అక్కడ స్పై కెమెరాలు, ట్రాప్ కెమెరాలను అమర్చారు. అయితే, ఈ ప్రక్రియ కేవలం శాస్త్రీయమైన పరిశోధన మాత్రమేనని.. దీనిని అమావాస్య నమ్మకాలతో లేదా మూఢనమ్మకాలతో ముడిపెట్టవద్దని అధికారి స్పష్టం చేశారు.

గ్రామానికి సమీపంలో దాదాపు 500 ఎకరాల విస్తీర్ణంలో ఉన్న అటవీ కొండల్లో నక్కలు, అడవి కుక్కలు, అడవి పందులు, కొండచిలువలు ఉన్నాయని, అవి అప్పుడప్పుడు జనవాసాల్లోకి వస్తుంటాయని స్థానికులు అధికారులకు తెలిపారు. ఈ నేపథ్యంలో కొండచిలువ దాడి చేసి ఉండే అవకాశంపై కూడా అటవీ శాఖ స్వతంత్రంగా అంచనా వేస్తోంది. ఒకవేళ కొండచిలువ పాపను మింగేసి ఉంటే, అది సాధారణంగా వేటను తిన్న తర్వాత ఎక్కువ దూరం లేదా వేగంగా కదలలేదు కాబట్టి, ఆ పరిసరాల్లోనే ఎక్కడో ఒకచోట ఉండిపోయేదని అధికారి వివరించారు.

కీలకంగా మారిన పెంపుడు కుక్క ఉదంతం

ఈ కేసు దర్యాప్తులో కుటుంబానికి చెందిన పెంపుడు కుక్క ప్రవర్తన అత్యంత ప్రాధాన్యత సంతరించుకుంది. పాప అదృశ్యమైన సమయంలోనే ఆ కుక్క కూడా కనిపించకుండా పోయింది. కానీ, నాలుగు రోజుల తర్వాత అది తీవ్రమైన ఒత్తిడి, భయాందోళనలతో ఒంటరిగా ఇంటికి తిరిగి వచ్చింది. ఇంటికి వచ్చిన తర్వాత అది చాలా దూకుడుగా ప్రవర్తించిందని, చివరికి తన యజమానులను కూడా కరిచిందని పోలీసులు తెలిపారు. ఆ పాపతో ఎంతో అనుబంధం ఉన్న ఆ కుక్కకు పశువైద్యులతో చికిత్స చేయించి, ఆ తర్వాత దానికి ఒక జీపీఎస్ ట్రాకర్‌ను అమర్చారు. ఆ జీపీఎస్ డేటాను విశ్లేషించగా, గతంలో పోలీసు డాగ్ స్క్వాడ్ గుర్తించిన మార్గంలోనే ఈ కుక్క కూడా దాదాపు 8 కిలోమీటర్ల మేర ప్రయాణించినట్లు తేలింది. ట్రాకింగ్ ద్వారా లభించిన ఆయా ప్రాంతాల్లో పోలీసులు మళ్లీ వెతికినప్పటికీ ఎలాంటి ఆధారాలు దొరకలేదు. ఆ తర్వాత ఆ కుక్క అనారోగ్యంతో మరణించగా, దానికి పోస్టుమార్టం కూడా నిర్వహించారు.

కుటుంబ వివాదాలు – విస్తరించిన గాలింపు

కిడ్నాప్, జంతువుల దాడి కోణాలతో పాటు.. కుటుంబంలో ఏవైనా ఆర్థిక వివాదాలు, వ్యక్తిగత శత్రుత్వాలు లేదా బంధుత్వాల సమస్యలు ఈ ఘటనకు కారణమా అనే కోణంలోనూ దర్యాప్తు సాగుతోంది. దాదాపు ఆరు నెలల క్రితం ఆ కుటుంబానికి వాహన కొనుగోలు విషయంలో ఉన్న ఒక వివాదాన్ని పోలీసులు ఇప్పటికే పూర్తిగా విచారించి, దానికి దీనితో సంబంధం లేదని తేల్చేశారు. కిడ్నాప్ సిద్ధాంతానికి సంబంధించి ఇప్పటివరకు బలమైన ఆధారాలు లభించనప్పటికీ, దర్యాప్తు అధికారులు ఆ అవకాశాన్ని పూర్తిగా తోసిపుచ్చడం లేదు. వలస కార్మికులను విచారించడానికి రెండు ప్రత్యేక బృందాలు పని చేస్తున్నాయి.

ప్రారంభంలో 6 కిలోమీటర్ల పరిధిలో సాగిన ఈ శోధన కార్యకలాపాలను, ఇప్పుడు ఎన్డీఆర్ఎఫ్ సహాయంతో దాదాపు 10 కిలోమీటర్ల మేర విస్తరించారు. ప్రాంతంలోని చెరువులు, కుంటలు, బహిరంగ బావులు, ఇతర నీటి వనరులను బృందాలు జల్లెడ పడుతున్నాయి. నక్కపల్లి, యలమంచిలి వైపు విస్తరించి ఉన్న 11 పరస్పర అనుసంధానిత కొండలలో ఎన్డీఆర్ఎఫ్ గాలింపు చర్యలు చేపడుతోంది. ఇందులో ఇప్పటికే 4 కొండలను విస్తృతంగా గాలింపు చేపట్టారు. అయితే పాప అదృశ్యమైన కొద్దిసేపటికే కురిసిన భారీ వర్షం వల్ల ప్రాథమిక ఆధారాల సేకరణకు, తొలిరోజుల గాలింపు చర్యలకు తీవ్ర ఆటంకం కలిగిందని.. ఘటన జరిగిన 90 నిమిషాల వ్యవధిలోనే దాదాపు మూడు గంటల పాటు ఎడతెరిపి లేకుండా వర్షం కురవడం దర్యాప్తును కాస్త క్లిష్టతరం చేసిందని అధికారి పేర్కొన్నారు.