‘టెర్రరిస్ట్’ వ్యాఖ్యలపై ఈసీకి బదులిచ్చాం: ఖర్గే

ప్రధానమంత్రి నరేంద్ర మోడీపై చేసినట్లుగా చెబుతున్న ‘టెర్రరిస్ట్’ వ్యాఖ్యల వివాదంపై కాంగ్రెస్ జాతీయ అధ్యక్షుడు మల్లికార్జున ఖర్గే స్పందించారు. కేంద్ర ఎన్నికల సంఘం జారీ చేసిన నోటీసులకు తాము ఇప్పటికే సమాధానం ఇచ్చామని ఆయన స్పష్టం చేశారు. శుక్రవారం బెంగళూరులో మీడియా ప్రతినిధులతో మాట్లాడిన ఆయన, ఈ విషయాన్ని పత్రికలు కూడా ప్రచురించాయని గుర్తుచేశారు. తమిళనాడు ఎన్నికల ప్రచారంలో ఖర్గే చేసిన వ్యాఖ్యలు రాజకీయ వర్గాల్లో తీవ్ర దుమారం రేపిన నేపథ్యంలో, ఈసీ వివరణ కోరుతూ నోటీసులు జారీ చేసిన సంగతి తెలిసిందే.

వివరణకు 24 గంటలేనా? కాంగ్రెస్ ఆగ్రహం

ఖర్గేకు నోటీసులు జారీ చేసిన తీరుపై కాంగ్రెస్ పార్టీ తీవ్ర అసహనం వ్యక్తం చేసింది. దీనిపై పార్టీ ఎంపీ జైరాం రమేష్ ఎన్నికల సంఘానికి ఘాటుగా లేఖ రాశారు. దేశవ్యాప్తంగా ఎన్నికల ప్రచారంలో అత్యంత బిజీగా ఉన్న కాంగ్రెస్ అధ్యక్షుడికి సమాధానం ఇవ్వడానికి కేవలం 24 గంటల సమయం మాత్రమే ఇవ్వడం ఆశ్చర్యకరమని ఆయన పేర్కొన్నారు. ఇంత స్వల్ప వ్యవధి సరిపోదని, వివరణ ఇచ్చేందుకు కనీసం ఒక వారం రోజుల గడువు కావాలని ఈసీని కోరారు. అలాగే తమ పార్టీ సీనియర్ ప్రతినిధుల బృందం వ్యక్తిగతంగా కలిసి వివరణ ఇచ్చేందుకు అవకాశం కల్పించాలని లేఖలో విన్నవించారు.

నేను అన్నది అది కాదు: ఖర్గే వివరణ

ప్రధానిని ఉద్దేశించి తాను ‘టెర్రరిస్ట్’ అనే పదాన్ని వాడలేదని మల్లికార్జున ఖర్గే స్పష్టమైన వివరణ ఇచ్చారు. కేంద్రంలోని మోడీ ప్రభుత్వం రాజకీయ ప్రత్యర్థులను వేధిస్తున్న తీరును మాత్రమే తాను ప్రస్తావించానని చెప్పారు. మోడీ ప్రభుత్వం ‘పన్ను ఉగ్రవాదం’ చేస్తోందని, ఈడీ, సీబీఐ, ఐటీ వంటి దర్యాప్తు సంస్థలను అడ్డం పెట్టుకుని విపక్ష నేతలను భయభ్రాంతులకు గురిచేస్తోందని తాను విమర్శించినట్లు పేర్కొన్నారు.

దర్యాప్తు సంస్థలతో భయాందోళనలు

చెన్నైలో తాను చేసిన ప్రసంగంపై వస్తున్న ఆరోపణలను ఖర్గే కొట్టిపారేశారు. “నేను ప్రధానమంత్రిని వ్యక్తిగతంగా ఉగ్రవాది అనలేదు. కానీ ఆయన నాయకత్వంలో దర్యాప్తు సంస్థలు చేస్తున్న దాడులు రాజకీయ నాయకులను, అభ్యర్థులను భయపెడుతున్నాయి. ఎన్నికల్లో ఓడించేందుకు, నోరు మూయించేందుకు ఇలాంటి దాడులను ఆయుధాలుగా వాడుకుంటున్నారు. ఇదే విషయాన్ని నేను చెప్పాను” అని ఆయన మీడియాకు వివరించారు. ఈ పరిణామాలన్నీ ప్రజాస్వామ్యానికి విఘాతమని, దీనినే తాను ‘టెర్రరైజింగ్’ (భయపెట్టడం) అని అన్నట్లు స్పష్టం చేశారు.