గత రెండేళ్లలో రూ.68 వేల‌ కోట్లకు పైగా సంక్షేమ పింఛన్లు పంపిణీ చేశాం: సీఎం చంద్రబాబు

ఆంధ్రప్రదేశ్‌లో కూటమి ప్రభుత్వం అధికారంలోకి వచ్చిన నాటి నుంచి ఇప్పటివరకు రూ.68,000 కోట్లకు పైగా నిధులను సంక్షేమ పింఛన్ల రూపంలో పంపిణీ చేసిందని ముఖ్యమంత్రి నారా చంద్రబాబు నాయుడు వెల్లడించారు. బుధవారం నెల్లూరు జిల్లా చిల్లాకూరు మండలంలోని పున్నపువారిపాలెం గ్రామంలో జరిగిన బహిరంగ సభలో ఆయన మాట్లాడారు. ప్రస్తుతం తమ ప్రజా ప్రభుత్వం ప్రతి నెలా 62.2 లక్షల మంది లబ్ధిదారులకు రూ. 2,712 కోట్ల చొప్పున పింఛన్లను నేరుగా అందజేస్తోందని, ఇప్పటివరకు మొత్తం రూ. 68,598 కోట్లను పింఛన్ల కోసమే ఖర్చు చేశామని సీఎం స్పష్టం చేశారు.

గత రెండేళ్ల కాలంలో తమ ప్రభుత్వం రాష్ట్రాన్ని పునర్నిర్మించిందని, గత పాలనలో దెబ్బతిన్న అన్ని వ్యవస్థలను మళ్లీ బలోపేతం చేశామని చంద్రబాబు పేర్కొన్నారు. కేంద్ర ప్రభుత్వ సహకారంతోనే రాష్ట్రంలో సంక్షేమ, అభివృద్ధి పథకాలను సమర్థవంతంగా అమలు చేయగలుగుతున్నామని.. రాబోయే రోజుల్లో అభివృద్ధి, సంపద సృష్టిలో నెల్లూరు జిల్లా దేశంలోనే నంబర్ వన్‌గా ఎదుగుతుందని ధీమా వ్యక్తం చేశారు.

సీఎం చంద్రబాబు నెల్లూరు జిల్లా గూడూరు నియోజకవర్గం పున్నపువారిపాలెం గ్రామంలో పేదల సేవలో కార్యక్రమంలో పాల్గొని ఎన్టీఆర్ భరోసా పింఛన్లను పంపిణీ చేశారు. గ్రామంలోని ఎస్సీ కాలనీకి వెళ్లి పద్మమ్మకు వితంతు పింఛను రూ.4 వేలు, దివ్యాంగురాలు తులశమ్మకు రూ.15,000 అందించారు. అనంతరం వారి కుటుంబ సభ్యులతో సమావేశమై ఇబ్బందులను అడిగి తెలుసుకున్నారు.

నెల్లూరు జిల్లా పారిశ్రామిక, సాగునీటి ప్రగతి

జిల్లాకు వస్తున్న భారీ పెట్టుబడులు, మౌలిక వసతుల కల్పనపై ముఖ్యమంత్రి కీలక వివరాలను వెల్లడించారు. రామాయపట్నం సమీపంలో బీపీసీఎల్ సంస్థ రూ. 1 లక్షల కోట్ల భారీ వ్యయంతో ఒక అత్యాధునిక రిఫైనరీని ఏర్పాటు చేస్తోందని తెలిపారు. జాతీయ రహదారుల విస్తరణ, రైల్వే మౌలిక వసతులు, ఓడరేవు (పోర్ట్) కనెక్టివిటీ ద్వారా నెల్లూరు జిల్లా త్వరలోనే ఒక ప్రధాన లాజిస్టిక్స్ హబ్‌గా మారబోతోందన్నారు. సాగునీటి రంగానికి తమ ప్రభుత్వం అత్యంత ప్రాధాన్యతనిస్తోందని, రాష్ట్రంలోని 36 ప్రాజెక్టులను పూర్తి చేయడానికి ప్రత్యేక క్యాలెండర్‌ను విడుదల చేశామన్నారు. ఇప్పటివరకు నీటిపారుదల రంగానికి రూ. 24,000 కోట్లు ఖర్చు చేశామని, నెల్లూరు జిల్లాకు తాగు, సాగునీరు అందించే కీలకమైన వెలిగొండ ప్రాజెక్టును త్వరలోనే పూర్తి చేస్తామని హామీ ఇచ్చారు.

ప్రస్తుతం 'ఎల్ నినో' ప్రభావం వల్ల వర్షాలు తగ్గి నదుల్లో ప్రవాహాలు తగ్గినప్పటికీ.. గత ఏడాది కృష్ణా, గోదావరి నదులకు వచ్చిన వరద నీటి వల్ల రాష్ట్రంలోని జలాశయాలలో ప్రస్తుతం 65 శాతం నీటి నిల్వలు ఉన్నాయని సీఎం తెలిపారు. నీటి కొరతను అధిగమించడానికి గోదావరి - కావేరి నదుల అనుసంధానాన్ని పరిశీలిస్తున్నామని, ఇది దిగువ రాష్ట్రాలకు ఎంతో మేలు చేస్తుందన్నారు. అలాగే, పశ్చిమ ఆసియా ఉద్రిక్తతల వల్ల పెరుగుతున్న ఇంధన ధరలకు ప్రత్యామ్నాయంగా ఇథనాల్ వాడకాన్ని ప్రోత్సహిస్తున్నామని, ఇథనాల్ ఉత్పత్తికి ఉపయోగపడే మొక్కజొన్న వంటి పంటలను రైతులు సాగు చేయాలని పిలుపునిచ్చారు.

పరిశ్రమల స్థాపన

కడప జిల్లాలో నేడు (గురువారం) రాయలసీమ స్టీల్ ప్లాంట్‌కు శంకుస్థాపన చేయబోతున్నామని, 2028 నాటికి అక్కడ ఉక్కు ఉత్పత్తి ప్రారంభమవుతుందని సీఎం ప్రకటించారు. గత వైసీపీ ప్రభుత్వం పరిశ్రమలను రాష్ట్రం నుంచి వెళ్లగొడితే.. తాము 'హీరో మోటార్స్' సంస్థ కర్ణాటకకు వెళ్లకుండా అడ్డుకుని, ఆంధ్రప్రదేశ్‌లోనే మోటార్ సైకిళ్ల తయారీ జరిగేలా చర్యలు తీసుకుంటున్నామని చెప్పారు.

వైసీపీ అధినేత వైఎస్ జగన్ మోహన్ రెడ్డి పేరు ఎత్తకుండానే సీఎం ఘాటు విమర్శలు చేశారు. తప్పు చేసిన వారిపై క్షణాల్లో చర్యలు తీసుకోవడం తమకు పెద్ద పనికాదని, కానీ తమ ప్రభుత్వం ఎప్పుడూ 'కక్షసాధింపు రాజకీయాలకు' పాల్పడదని స్పష్టం చేశారు. అయితే సమాజంలో, ప్రాంతాల మధ్య విభేదాలు సృష్టించడానికి తప్పుడు ప్రచారాలు చేస్తున్న వైసీపీ వంటి పార్టీల పట్ల ప్రజలు ఎల్లప్పుడూ జాగ్రత్తగా ఉండాలని చంద్రబాబు హితవు పలికారు.