దేశ ఆత్మను కాపాడేందుకే డీలిమిటేషన్ బిల్లును ఓడించాం: రాహుల్ గాంధీ

కాంగ్రెస్ అగ్రనేత రాహుల్ గాంధీ శనివారం తమిళనాడులో జరిగిన ఎన్నికల ప్రచార సభలో పాల్గొన్నారు. ఈ సందర్భంగా రాహుల్ గాంధీ మాట్లాడుతూ, పార్లమెంటులో ఇటీవల ప్రవేశపెట్టిన డీలిమిటేషన్ (నియోజకవర్గాల పునర్విభజన) బిల్లును ప్రతిపక్షాలు కలిసికట్టుగా ఓడించాయని ప్రకటించారు. ఈ బిల్లును అడ్డుకోవడం అంటే కేవలం ఒక చట్టాన్ని ఆపడం కాదని, భారతదేశ మూల సిద్ధాంతాన్ని ( ఐడియా ఆఫ్ ఇండియా ) కాపాడటమేనని ఆయన స్పష్టం చేశారు. మహిళా రిజర్వేషన్ బిల్లు వెనుక డెలిమిటేషన్ అంశాన్ని దాచిపెట్టి, దక్షిణాది రాష్ట్రాల ప్రాతినిధ్యాన్ని తగ్గించేందుకు బీజేపీ కుట్ర పన్నిందని ఆయన ఆరోపించారు. ముఖ్యంగా తమిళనాడు వంటి రాష్ట్రాల గొంతును నొక్కేందుకే ఈ ప్రయత్నం జరిగిందని, దానిని తాము విజయవంతంగా తిప్పికొట్టామని ఆయన పేర్కొన్నారు.

దక్షిణాది రాష్ట్రాల శక్తిని బలహీనపరిచే కుట్ర

బీజేపీ ప్రభుత్వం తీసుకువచ్చిన ఈ బిల్లు వల్ల తమిళనాడుతో పాటు ఈశాన్య రాష్ట్రాలు ఇతర చిన్న రాష్ట్రాల ప్రాతినిధ్యం కేంద్రంలో తగ్గిపోతుందని రాహుల్ ఆందోళన వ్యక్తం చేశారు. భారతదేశం అంటే రాష్ట్రాల సమాహారమని, ప్రతి రాష్ట్రానికి సమానమైన గౌరవం, స్వేచ్ఛా గొంతుక ఉండాలని ఆయన ఉద్ఘాటించారు. జనాభా ప్రాతిపదికన సీట్ల కేటాయింపు మార్పుల ద్వారా దక్షిణాది రాష్ట్రాల రాజకీయ బలాన్ని తగ్గించాలని కేంద్రం చూస్తోందని, ఇది రాజ్యాంగ విరుద్ధమని ఆయన విమర్శించారు.

ప్రస్తుత ఎన్నికలను రాహుల్ గాంధీ ఒక సాధారణ రాజకీయ పోరాటంగా కాకుండా, రెండు విభిన్న సిద్ధాంతాల మధ్య జరుగుతున్న యుద్ధంగా అభివర్ణించారు. ఇది ఏకాభిప్రాయం అలాగే బలవంతపు చర్యల మధ్య జరుగుతున్న పోరాటమని అన్నారు. బీజేపీ దేశంలోని అన్ని వ్యవస్థలను కేవలం రెండు మూడు కార్పొరేట్ కంపెనీల చేతుల్లో పెట్టాలని చూస్తోందని, సామాజిక న్యాయం కోసం పోరాడిన పెరియార్ వంటి మహనీయుల ఆశయాలను అణచివేయాలని ప్రయత్నిస్తోందని ఆయన మండిపడ్డారు.

ఏఐఏడీఎంకే "బీజేపీ ముసుగులో ఉన్న పార్టీ"

తమిళనాడులోని ప్రధాన ప్రతిపక్షం ఏఐఏడీఎంకే పై రాహుల్ ఘాటైన విమర్శలు చేశారు. ప్రస్తుత ఏఐఏడీఎంకే పాత పార్టీ కాదని, అది కేవలం ఒక "డొల్ల" అని వ్యాఖ్యానించారు. అవినీతి కేసుల భయంతో ఆ పార్టీ నాయకులు ప్రధాని మోడీ, అమిత్ షా చేతుల్లో కీలుబొమ్మలుగా మారారని ఆరోపించారు. "మీరు ఏఐఏడీఎంకే జెండాను చూసినప్పుడు, దాని వెనుక ఉన్నది మోడీ , అమిత్ షా అని గుర్తుంచుకోండి" అని ప్రజలకు పిలుపునిచ్చారు. తమిళనాడు ప్రజల ప్రయోజనాలను ఆ పార్టీ ఢిల్లీకి తాకట్టు పెట్టిందని ఆయన విమర్శించారు.

తమిళ భాష, సంస్కృతి పరిరక్షణ

తమిళ భాష కేవలం ఒక సంభాషణా మాధ్యమం కాదని, అది వేల సంవత్సరాల చరిత్ర, అనుభవాల సారం అని రాహుల్ కొనియాడారు. "ఒకే దేశం, ఒకే నాయకుడు, ఒకే భాష" అనే నినాదంతో మోడీ భారత రాజ్యాంగంపై దాడి చేస్తున్నారని ఆగ్రహం వ్యక్తం చేశారు. తమిళ సంస్కృతిని, చరిత్రను వక్రీకరించాలని చూసే శక్తులను తాము ఎట్టి పరిస్థితుల్లోనూ అనుమతించబోమని, తమిళనాడును ఢిల్లీ నుండి పాలించాలనే మోడీ కల నెరవేరదని ఆయన స్పష్టం చేశారు.

బీజేపీ తన మిత్రపక్షాలను అణచివేస్తుంటే, కాంగ్రెస్ పార్టీ తన భాగస్వాములను ఎప్పుడూ గౌరవిస్తుందని రాహుల్ పేర్కొన్నారు. తాము ఏనాడూ విచారణ సంస్థలను ఉపయోగించి మిత్రపక్షాలను భయపెట్టలేదని, సమానత్వమే తమ సిద్ధాంతమని చెప్పారు. రాబోయే అసెంబ్లీ ఎన్నికల్లో ఆర్‌ఎస్‌ఎస్-బీజేపీ భావజాలాన్ని ఓడించి, తమిళనాడు ఆత్మగౌరవాన్ని కాపాడుకోవాలని ఆయన ప్రజలను కోరారు. సామాజిక న్యాయం, రాష్ట్రాల స్వయంప్రతిపత్తిని కాపాడటమే తమ ప్రధాన లక్ష్యమని ఆయన పునరుద్ఘాటించారు.