వికారాబాద్కు జాతీయ స్థాయి గుర్తింపు.. ఎయిడ్స్ నియంత్రణలో ‘సాక్ష్యం’ సర్టిఫికెట్
హెచ్ఐవీ/ఎయిడ్స్ నివారణ, నియంత్రణ, చికిత్సలో వికారాబాద్ జిల్లా జాతీయ స్థాయిలో అరుదైన గుర్తింపును సాధించింది. జాతీయ ఎయిడ్స్ నియంత్రణ సంస్థ నిర్దేశించిన కఠినమైన మార్గదర్శకాలను విజయవంతంగా పూర్తి చేసి, ఉత్తమ పనితీరు కనబరిచినందుకు గాను కేంద్ర ప్రభుత్వం అందించే ప్రతిష్టాత్మక ‘సాక్ష్యం’ అప్రిసియేషన్ సర్టిఫికెట్ను వికారాబాద్ జిల్లా దక్కించుకుంది.
దేశవ్యాప్తంగా కేవలం 70 జిల్లాలు మాత్రమే ఈ లక్ష్యాలను సాధించగా, అందులో వికారాబాద్ చోటు దక్కడం జిల్లాకు గర్వకారణమని అధికారులు తెలిపారు. జిల్లా కలెక్టర్ దీపక్ తివారి మార్గదర్శకత్వంలో జిల్లా వైద్య ఆరోగ్య శాఖ అధికారి డాక్టర్ కె. సుధాకర్ లాల్, వైద్య సిబ్బంది నిరంతర కృషి వల్లనే ఈ అవార్డు సాధ్యమైందన్నారు. నిర్దేశిత లక్ష్యాలలో భాగంగా జిల్లాలో హెచ్ఐవీ తో జీవిస్తున్న వ్యక్తుల్లో కనీసం 95 శాతం మందిని ముందస్తుగా గుర్తించారు. జిల్లాలో మొత్తం 4,536 మంది హెచ్ఐవీ బాధితులను గుర్తించి, వారందరికీ హెచ్ఐవీ నియంత్రణకు అవసరమైన యాంటీ రెట్రో వైరల్ థెరపీ చికిత్సను తక్షణమే ప్రారంభించారు.
హెచ్ఐవీ నిర్ధారణ అయిన వెంటనే ‘టెస్ట్ అండ్ ట్రీట్’ విధానంలో చికిత్స అందించడం, మందులు నిరంతరం వాడేలా కౌన్సిలింగ్ ఇవ్వడం, రెగ్యులర్ ఫాలో-అప్ సేవలు అందించడం ద్వారా ఈ విజయం లభించిందని అధికారులు పేర్కొన్నారు. క్రమం తప్పకుండా ఏఆర్టీ మందులు తీసుకోవడం వల్ల బాధితులలో ‘వైరల్ లోడ్’ గణనీయంగా తగ్గి, వారు ఆరోగ్యకరమైన జీవితం గడపడమే కాకుండా ఇతరులకు ఈ వ్యాధి సంక్రమించే ప్రమాదం కూడా తగ్గుతుందన్నారు. ఈ జాతీయ స్థాయి గుర్తింపు సాధించడంలో జిల్లా వైద్య ఆరోగ్య శాఖతో పాటు రాష్ట్ర, జాతీయ ఎయిడ్స్ నియంత్రణ సంస్థలు, ఏఆర్టీ పరీక్షా కేంద్రాలు, ఆశా కార్యకర్తలు, స్వచ్ఛంద సంస్థల ప్రతినిధులు కీలక పాత్ర పోషించారు.
సమాజంలో హెచ్ఐవీపై ఉన్న అపోహలు, భయాలు వివక్షను వీడాలని కలెక్టర్ దీపక్ తివారి కోరారు. అనుమానం ఉన్నవారు సమీప ప్రభుత్వ ఆసుపత్రి లేదా ఐసిటిసి కేంద్రంలో ఉచితంగా పరీక్షలు చేయించుకోవాలని పిలుపునిచ్చారు. ఈ సందర్భంగా జిల్లాకు జాతీయ గుర్తింపు లభించేలా సహకరించిన ముఖ్యమంత్రికి, వైద్య ఆరోగ్య శాఖ మంత్రికి, స్పీకర్కు, ప్రజాప్రతినిధులకు వైద్య సిబ్బందికి కలెక్టర్ కృతజ్ఞతలు తెలియజేశారు.