తమిళనాడులో విజయ్ హాసం... బెంగాల్‌లో కమల వికాసం

ఏప్రిల్ 10 నుంచి 30 వరకు వివిధ దశల్లో జరిగిన ఐదు రాష్ట్రాల (అస్సాం, కేరళ, పుదుచ్చేరి, తమిళనాడు, పశ్చిమ బెంగాల్) అసెంబ్లీ ఎన్నికల ఫలితాలు భారత రాజకీయ చిత్రపటాన్ని పూర్తిగా మార్చేశాయి. ఈ ఎన్నికలు కేవలం కొత్త ప్రభుత్వాలను అందించడమే కాకుండా, దశాబ్దాల నాటి రాజకీయ ఆధిపత్యాలను కూలదోసి, సరికొత్త సమీకరణాలకు తెరలేపాయి. ఓటర్ల జాబితా సవరణ (స‌ర్) వల్ల పెరిగిన పారదర్శకతతో దాదాపు 90 శాతం ఓటింగ్ నమోదవ్వడం విశేషం.

ఈ ఎన్నికల ఫలితాల్లో అత్యంత కీలకమైన అంశం ఏమిటంటే.. భారతదేశంలో కమ్యూనిస్ట్ పార్టీ (సీపీఎం) పాలన పూర్తిగా తుడిచిపెట్టుకుపోవడం. పినరయి విజయన్ నేతృత్వంలోని కేరళ కోట కూలిపోవడంతో, దేశంలో ఎక్కడా ఎడమపక్ష ప్రభుత్వం లేని పరిస్థితి ఏర్పడింది. పశ్చిమ బెంగాల్‌లో కూడా లెఫ్ట్ ఓటు బ్యాంక్ బీజేపీ వైపు మళ్లడం ఈ చారిత్రాత్మక మార్పుకు ప్రధాన కారణంగా విశ్లేషకులు భావిస్తున్నారు.

తమిళనాడులో 'విజయ్' హాసం

అత్యంత సంచలనాత్మక ఫలితం తమిళనాడులో కనిపించింది. నటుడు విజయ్ నాయకత్వంలోని తమిళగ వెట్రి కళగం 105 స్థానాలు గెలుచుకుని అతిపెద్ద పార్టీగా అవతరించింది. డీఎంకే, ఏఐఏడీఎంకే దశాబ్దాల ఆధిపత్యానికి ఇది పెద్ద సవాలుగా మారింది. యువత, తొలి ఓటర్లు, పట్టణ ప్రాంతాల్లో విజయ్‌కు లభించిన ఆదరణ ఈ ఫలితాల్లో స్పష్టంగా కనిపించింది. అయితే ప్రభుత్వం ఏర్పాటు చేయడానికి అవసరమైన 118 స్థానాలకు ఇంకా 13 స్థానాలు తక్కువగా ఉండటంతో, పొత్తుల దిశగా సాగుతారా లేక స్వతంత్రంగా మద్దతు కూడగడతారా అన్నది ఇప్పుడు ప్రధాన చర్చగా మారింది.

బెంగాల్‌లో కమల వికాసం

పశ్చిమ బెంగాల్‌లో బీజేపీ చారిత్రాత్మక విజయాన్ని నమోదు చేసింది. పార్టీ 204 స్థానాలు గెలుచుకుని స్పష్టమైన మెజారిటీ సాధించగా, తృణమూల్ కాంగ్రెస్ 75 స్థానాలకు పరిమితమైంది. ఎడమపక్ష ఓట్లలో కొంత భాగం బీజేపీకి మళ్లడం, ప్రభుత్వ వ్యతిరేకత, బలమైన సంస్థాగత విస్తరణ ఈ విజయానికి కారణమయ్యాయి. మమతా బెనర్జీకి ఇది గత దశాబ్దంలోనే అతిపెద్ద రాజకీయ ఎదురుదెబ్బగా భావిస్తున్నారు.సీఎం హిమంత బిశ్వ శర్మ నాయకత్వంలో బీజేపీ తన ఆధిపత్యాన్ని నిలబెట్టుకుంది. 82 సీట్లు గెలుచుకుని, 46-48 శాతం ఓట్లతో తిరుగులేని శక్తిగా నిలిచింది. బలమైన పాలన, సంక్షేమ పథకాలు బీజేపీని మళ్ళీ గెలిపించాయి.

అస్సాంలో బీజేపీ పట్టు..

అసోంలో భారతీయ జనతా పార్టీ మరోసారి తన ఆధిపత్యాన్ని బలపరిచింది. సీఎం హిమంత బిశ్వ శర్మ నాయకత్వంలో పార్టీ 82 సీట్లు గెలుచుకుని, 46-48 శాతం ఓట్లతో తిరుగులేని శక్తిగా నిలిచింది. సంక్షేమ కార్యక్రమాల అమలు, పాలనలో స్థిరత్వం, బలమైన సంస్థాగత నిర్మాణం బీజేపీ విజయానికి ప్రధాన కారణాలుగా నిలిచాయి. ప్రతిపక్షం విభజనలో ఉండటంతో బీజేపీకి మరింత అనుకూల పరిస్థితులు ఏర్పడ్డాయి.

కేరళలో కాంగ్రెస్ పునరాగమనం

కేరళలో కాంగ్రెస్ నేతృత్వంలోని కూటమి స్పష్టమైన ఆధిక్యంతో అధికారంలోకి వచ్చింది. కాంగ్రెస్ 63 స్థానాలు గెలుచుకోగా, ఇండియన్ యూనియన్ ముస్లిం లీగ్ వంటి మిత్రపక్షాలు కూడా కీలక పాత్ర పోషించాయి. ఎడమపక్ష ప్రభుత్వంపై ఉన్న వ్యతిరేకత ఈ ఫలితాల్లో స్పష్టంగా ప్రతిబింబించింది. దీంతో కేరళలో అధికార మార్పిడి అనే సంప్రదాయం మరోసారి కొనసాగింది.

పుదుచ్చేరి

పుదుచ్చేరిలో ఎన్. రంగస్వామి నేతృత్వంలోని ఆల్ ఇండియా ఎన్.ఆర్. కాంగ్రెస్, బీజేపీతో కలిసి మెజారిటీ మార్కును దాటింది. అధిక ఓటరు హాజరు, సవరించిన ఓటరు జాబితాలు కూటమికి స్థిరమైన ప్రజా మద్దతు అందించాయి. కేంద్రపాలిత ప్రాంతంలో కూటమి రాజకీయాల ప్రాధాన్యం మరోసారి రుజువైంది.

2026 ఫలితాలు 2029 సార్వత్రిక ఎన్నికలకు దిక్సూచిలా మారనున్నాయి. యువతరం ఓటింగ్ శాతంలో చూపిన చొరవ, కొత్త నాయకత్వాలపై ప్రజలు చూపిస్తున్న ఆసక్తి స్పష్టంగా కనిపిస్తోంది. ముఖ్యంగా తమిళనాడులో సినీ గ్లామర్ నుంచి రాజకీయ శక్తిగా ఎదిగిన విజయ్, బెంగాల్‌లో బీజేపీ సాధించిన చారిత్రాత్మక విజయం దేశ రాజకీయాల్లో కొత్త చర్చకు దారితీశాయి. మొత్తానికి, మేజిక్ నంబర్ ఆధారంగా సాగే అధికార పీఠాల వేటలో కూటమి వ్యూహాలు, క్షేత్రస్థాయి ఓటర్ల సమీకరణలు మరింత కీలకం కానున్నాయి.