అగ్నిప్రమాదాలపై అప్రమత్తతే రక్ష: విజయవాడ పీవీపీ మాల్లో అగ్నిమాపక శాఖ మాక్ డ్రిల్
అగ్నిప్రమాదాలు సంభవించినప్పుడు ప్రజలు ప్రాణాపాయం నుంచి ఎలా తప్పించుకోవాలి ఆస్తి నష్టాన్ని ఎలా తగ్గించాలనే అంశాలపై విజయవాడలోని పీవీపీ మాల్ వేదికగా అగ్నిమాపక శాఖ భారీ అవగాహన కార్యక్రమాన్ని నిర్వహించింది. రాష్ట్రవ్యాప్తంగా సాగుతున్న భద్రతా చైతన్య యాత్రలో భాగంగా నిర్వహించిన ఈ 'మాక్ డ్రిల్' సందర్శకులను విశేషంగా ఆకట్టుకుంది. అకస్మాత్తుగా మంటలు చెలరేగితే భయాందోళనకు గురికాకుండా ప్రశాంతంగా ఎలా వ్యవహరించాలో అధికారులు ప్రత్యక్షంగా చేసి చూపారు.
నిరంతర నిఘా - నిరంతర భద్రత
ప్రస్తుతం రాష్ట్ర ప్రభుత్వం “సేఫ్ స్కూల్ – సేఫ్ హాస్పిటల్ – ఫైర్ సేఫ్టీ సొసైటీ” అనే నినాదంతో ముందుకు సాగుతోంది. ముఖ్యంగా పాఠశాలలు, ఆసుపత్రులు, భారీ షాపింగ్ మాల్స్ వంటి జనసమ్మర్థం గల ప్రాంతాల్లో అగ్ని భద్రతా నియమాలు నిక్కచ్చిగా అమలు కావాలని అధికారులు స్పష్టం చేస్తున్నారు. కేవలం నోటీసులతో సరిపెట్టకుండా క్షేత్రస్థాయిలో ప్రజలకు, విద్యార్థులకు, సిబ్బందికి అత్యవసర పరిస్థితులను ఎదుర్కోవడంపై శిక్షణ ఇవ్వడమే ఈ కార్యక్రమ ప్రధాన ఉద్దేశమని వెల్లడించారు.
ప్రత్యక్షంగా భద్రతా విన్యాసాలు
ఈ కార్యక్రమంలో అగ్నిమాపక సిబ్బంది ప్రదర్శించిన సాహసోపేత విన్యాసాలు ఆలోచింపజేశాయి. భవనం పై అంతస్తుల్లో చిక్కుకున్న వారిని సురక్షితంగా కిందకు దించడం, పొగతో నిండిన గదుల నుంచి బయటకు వచ్చే మార్గాలను గుర్తించడం వంటి అంశాలను ప్రయోగాత్మకంగా వివరించారు. అగ్నిమాపక యంత్రాలను ఎలా ఆపరేట్ చేయాలి ఫైర్ ఎక్స్టింగిషర్లను ఎలా వాడాలి అనే విషయాలపై మాల్ సిబ్బందికి, ప్రజలకు శిక్షణ ఇచ్చారు.
కార్యక్రమంలో పాల్గొన్న ఫైర్ సేఫ్టీ అదనపు డైరెక్టర్ జ్ఞాన సుందరం మాట్లాడుతూ ఇల్లు, వాణిజ్య సముదాయాల్లో జరిగే ప్రమాదాల్లో అధిక శాతం మానవ తప్పిదాల వల్లనే జరుగుతున్నాయని ఆవేదన వ్యక్తం చేశారు. గ్యాస్ లీకేజీలు, షార్ట్ సర్క్యూట్ల పట్ల అజాగ్రత్తగా ఉండటం వల్ల భారీ నష్టాలు సంభవిస్తున్నాయని హెచ్చరించారు. ఫైర్ సర్వీస్ వీక్ సందర్భంగా రాష్ట్రవ్యాప్తంగా ప్రతి గ్రామం, పట్టణంలో అవగాహన సదస్సులు నిర్వహిస్తున్నట్లు ఆయన తెలిపారు.
మంటలు అంటుకున్నప్పుడు ఎలివేటర్లను వాడకుండా మెట్ల మార్గాన్నే ఎంచుకోవాలని వీలైనంత త్వరగా అగ్నిమాపక కేంద్రానికి సమాచారం అందించాలని అధికారులు సూచించారు. ప్రతి భవనంలో ఫైర్ సేఫ్టీ పరికరాలు పని చేసే స్థితిలో ఉండాలని సిబ్బందికి వాటిపై కనీస అవగాహన ఉండాలని స్పష్టం చేశారు. ఈ కార్యక్రమంలో అగ్నిమాపక శాఖ అధికారులు, పీవీపీ మాల్ ప్రతినిధులు మరియు పెద్ద సంఖ్యలో ప్రజలు పాల్గొన్నారు.