నిరుపేదల సాధికారతకు విద్యను వినియోగించండి: రాష్ట్రపతి పిలుపు

విద్య అనేది వ్యక్తిగత అభివృద్ధికే కాకుండా సమాజ శ్రేయస్సుకు కూడా ఉపయోగపడాలని, ముఖ్యంగా వెనుకబడిన వర్గాల సాధికారతకు తమ జ్ఞానాన్ని వినియోగించాలని భారత రాష్ట్రపతి ద్రౌపది ముర్ము పిలుపునిచ్చారు. సమాజానికి తిరిగి ఏదో ఒకటి ఇవ్వాల్సిన కనీస బాధ్యత విద్యార్థులపై ఉందని ఆమె గుర్తుచేశారు. బుధవారం ఆంధ్రప్రదేశ్ రాష్ట్రం అనంతపురంలో జరిగిన ‘కేంద్రీయ విశ్వవిద్యాలయం’ తొలి స్నాతకోత్సవ సదస్సుకు ఆమె ముఖ్యఅతిథిగా హాజరై ప్రసంగించారు.

ఈ సందర్భంగా రాష్ట్రపతి మాట్లాడుతూ.. సమాజానికి తిరిగి సేవ చేయాల్సిన బాధ్యత మీపై ఉంది. మీ చదువు, జ్ఞానం వెనుకబడిన వర్గాలకు ఒక గొప్ప కొండంత బలంగా మారాలని ఆకాంక్షించారు. ప్రతి విద్యార్థి జీవితంలోనూ స్నాతకోత్సవం అనేది ఎంతో కీలకమైన ఘట్టమని, ఎన్నో ఏళ్ల కృషి, పట్టుదలకు ఇది నిదర్శనమని పేర్కొన్నారు. విద్యార్థులు ఎన్నో కలలతో విశ్వవిద్యాలయంలో అడుగుపెడతారని, నేడు వారు జ్ఞానం, ఆత్మవిశ్వాసం, కొత్త అవకాశాల వైపు భవిష్యత్తుకు మార్గం చూపే డిగ్రీపట్టాతో బయటకు వెళ్తున్నారని కొనియాడారు.

వికసిత్ భారత్ 2047 లక్ష్య సాధనలో కీలక పాత్ర

భవిష్యత్తు సవాళ్లను ఎదుర్కొనేందుకు వీలుగా ఈ విశ్వవిద్యాలయం సుదూర ప్రణాళికతో ముందుకు సాగడం పట్ల రాష్ట్రపతి సంతోషం వ్యక్తం చేశారు. రాబోయే రోజుల్లో ఈ కేంద్రీయ విశ్వవిద్యాలయం ఒక అద్భుతమైన ‘సెంటర్ ఆఫ్ ఎక్సలెన్స్’ గా ఎదుగుతుందని, ‘వికసిత్ భారత్ 2047’ స్వప్నాన్ని సాకారం చేయడంలో కీలక పాత్ర పోషిస్తుందని ధీమా వ్యక్తం చేశారు. ముఖ్యంగా ఐక్యరాజ్యసమితి నిర్దేశించిన సుస్థిరాభివృద్ధి లక్ష్యాలలోని ‘నాణ్యమైన విద్య’కు ఈ సంస్థ కట్టుబడి ఉండటం.. సమగ్ర, సమానమైన అభివృద్ధి పట్ల దానికున్న బాధ్యతను తెలియజేస్తోందన్నారు.

విద్యార్థుల విజయాల వెనుక వారి స్వంత కష్టంతో పాటు, తల్లిదండ్రుల త్యాగాలు, గురువుల మార్గదర్శకత్వం, సమాజం యొక్క మద్దతు ఎంతో ఉందన్నారు. భవిష్యత్తులో విద్యార్థులు ఉద్యోగాలు సృష్టించే పారిశ్రామికవేత్తలు అయినా, ఆవిష్కరణలు చేసే శాస్త్రవేత్తలు అయినా, ప్రజల కోసం పనిచేసే ప్రభుత్వ ఉద్యోగులు లేదా సమాజ సేవ చేసే దాతలు అయినా.. తమ బాధ్యతను మరువకూడదని సూచించారు.

సాంకేతిక మార్పులు – నిరంతర అభ్యాసం

ప్రస్తుత ఆధునిక ప్రపంచంలో సాంకేతిక పురోగతి ప్రతి రంగాన్ని వేగంగా మారుస్తోందని, అందువల్ల విద్య అనేది కేవలం ఒక డిగ్రీ పట్టా అందుకోవడంతోనే ముగిసిపోకూడదని రాష్ట్రపతి స్పష్టం చేశారు. కొత్త సాంకేతికతలకు అనుగుణంగా నిరంతరం మారుతూ, కొత్త ఆలోచనలను అన్వేషించే ధైర్యాన్ని, నిరంతర అభ్యాస గుణాన్ని విద్యార్థులు పెంపొందించుకోవాలని, అదే వారికి లభించే అతిపెద్ద బలమని చెప్పారు. నిరంతరం నేర్చుకునే తత్వం, స్థితిస్థాపకత, నూతన ఆవిష్కరణలు చేసే మన యువతే దేశానికి అత్యంత విలువైన జాతీయ సంపద అని ద్రౌపది ముర్ము అన్నారు.

యువత తమ జ్ఞానానికి సృజనాత్మకత, పట్టుదల, బాధ్యతాయుతమైన ఆలోచనలను జోడిస్తే ఎలాంటి సవాళ్లనైనా అవకాశాలుగా మార్చుకోవచ్చని, మరింత సంపన్నమైన భారతదేశాన్ని నిర్మించవచ్చని తెలిపారు. నిజాయితీ, కరుణ, సానుభూతి, ప్రకృతి పట్ల గౌరవం అనేవి కేవలం నైతిక విలువలు మాత్రమే కావని.. అవి సంపూర్ణ మానసిక, సామాజిక వికాసానికి పునాదులని వివరించారు. ఈ లక్షణాలే జీవితాలను సుసంపన్నం చేసి దేశ ప్రగతికి తోడ్పడతాయన్నారు. యువత తమ ప్రతిభ, అంకితభావంతో తాము ఎంచుకున్న రంగంలో అత్యున్నత ప్రమాణాలను సాధించాలని పిలుపునిచ్చారు.

ఈ ప్రతిష్టాత్మక కార్యక్రమంలో ఆంధ్రప్రదేశ్ గవర్నర్ ఎస్. అబ్దుల్ నజీర్, రాష్ట్ర మానవ వనరుల అభివృద్ధి శాఖ మంత్రి నారా లోకేష్, ఆర్థిక శాఖ మంత్రి పయ్యావుల కేశవ్ పాల్గొని విద్యార్థులను అభినందించారు.