నేటితో అమెరికా-ఇరాన్ కాల్పుల విరమణ ఒప్పందం ముగింపు

అమెరికా, ఇరాన్ దేశాల మధ్య గత 15 రోజులుగా కొనసాగుతున్న యుద్ధ విరామం ఈరోజు అర్ధరాత్రితో ముగియనుంది. ఈ రెండు దేశాల మధ్య ఉద్రిక్తతలను ఆపి శాంతిని తీసుకురావాలని పాకిస్థాన్ ప్రయత్నిస్తున్నప్పటికీ, పరిస్థితులు చూస్తుంటే మళ్లీ యుద్ధం మొదలయ్యేలా కనిపిస్తోంది. ఇప్పటికే అగ్ర దేశాలు హెచ్చరికలు జారీ చేస్తుండటంతో, గడువు ముగిసిన తర్వాత మళ్లీ బాంబుల దాడులు జరుగుతాయేమోనని ప్రపంచమంతా భయం భయంగా ఎదురుచూస్తోంది.

ఇరాన్ నాయకత్వానికి అగ్నిపరీక్ష

అమెరికా-ఇజ్రాయెల్ జరిపిన విధ్వంసకర దాడుల్లో ఇరాన్ సుప్రీం లీడర్ ఖమేనీ సహా అగ్రశ్రేణి నాయకత్వం తుడిచిపెట్టుకుపోయినా, ఆ దేశ వ్యవస్థ పూర్తిగా కుప్పకూలలేదు. ప్రస్తుతం ఆ దేశ పగ్గాలు 'సుప్రీం నేషనల్ సెక్యూరిటీ కౌన్సిల్' అనే కమిటీ చేతుల్లోకి వెళ్లాయి. ఖమేనీ వారసుడిగా ఆయన కుమారుడు మోజ్తబా ఖమేనీ బాధ్యతలు చేపట్టినట్లు వార్తలు వచ్చినా, ఆయన గాయపడి రహస్య ప్రాంతంలో ఉన్నట్లు తెలుస్తోంది. ప్రస్తుతం పార్లమెంట్ స్పీకర్ మొహమ్మద్ బాకర్ ఖలిబాఫ్ ప్రధాన పాత్ర పోషిస్తూ, అటు కరడుగట్టిన సైనిక వర్గాలను, ఇటు సంస్కరణవాదులను సమన్వయం చేసేందుకు ప్రయత్నిస్తున్నారు.

ఇరాన్ సైన్యం, పౌర నాయకత్వం మధ్య సమన్వయ లోపం స్పష్టంగా కనిపిస్తోంది. ముఖ్యంగా హార్ముజ్ జలసంధిని తెరవడం, తిరిగి మూసివేయడం వంటి నిర్ణయాలు అంతర్జాతీయంగా గందరగోళాన్ని సృష్టించాయి. ఇరాన్ ఆర్థిక వ్యవస్థ కుప్పకూలుతున్న తరుణంలో మనుగడ కోసం పశ్చిమ దేశాలతో ఒప్పందం కుదుర్చుకోవాలా లేక యుద్ధానికే సిద్ధపడాలా అన్న విషయంలో టెహ్రాన్ నాయకత్వం సందిగ్ధంలో ఉంది.

చర్చల చుట్టూ అయోమయం.. ఇరాన్ నిరాకరణ

పాకిస్థాన్ రాజధాని ఇస్లామాబాద్ వేదికగా నేడు జరగాల్సిన ఉన్నత స్థాయి శాంతి చర్చల విషయంలో తీవ్ర అనిశ్చితి నెలకొంది. ఇరు దేశాల ప్రతినిధి బృందాలు మంగళవారం నాటికే అక్కడకు చేరుకుంటాయని అంతర్జాతీయ మీడియా కోడై కూసింది. అయితే ఇరాన్ అధికారిక వార్తా సంస్థ 'ఐఆర్ఐబీ' మాత్రం దీనిని తోసిపుచ్చింది. తమ దేశం నుంచి ఎటువంటి దౌత్య బృందం ఇప్పటివరకు పాకిస్థాన్‌కు వెళ్లలేదని స్పష్టం చేసింది. ఒకవేళ ఇరాన్ బృందం రాకపోతే ఈ చర్చలు కేవలం నామమాత్రంగానే మిగిలిపోయే ప్రమాదం ఉంది.

అయినప్పటికీ, ఇరాన్ సుప్రీం లీడర్ మోజ్తబా ఖమేనీ చర్చలకు 'గ్రీన్ సిగ్నల్' ఇచ్చారని, చివరి నిమిషంలోనైనా వారి ప్రతినిధులు ఇస్లామాబాద్ చేరుకుంటారని పాక్ మధ్యవర్తులు ఆశాభావం వ్యక్తం చేస్తున్నారు. మరోవైపు అమెరికా బృందం ఇప్పటికే సిద్ధంగా ఉన్నట్లు సమాచారం. ఈ చర్చల ద్వారా ఏదైనా పరిష్కారం లభిస్తేనే కాల్పుల విరమణ పొడిగింపునకు అవకాశం ఉంటుంది.

సముద్ర జలాల్లో అమెరికా మెరుపు దాడులు

చర్చల ప్రయత్నాలు జరుగుతుండగానే అమెరికా దళాలు సముద్రంలో తమ ప్రతాపం చూపిస్తున్నాయి. క్షిపణుల తయారీకి కావాల్సిన రసాయనాలను తరలిస్తోందన్న అనుమానంతో గల్ఫ్ తీరంలో ఒక ఇరాన్ వాణిజ్య నౌకను అమెరికా మెరైన్లు సీజ్ చేశారు. ఈ నౌకకు చైనాతో సంబంధాలు ఉన్నాయన్న నిక్కీ హేలీ ఆరోపణలను బీజింగ్ ఖండించింది. తాము ఎటువంటి అక్రమ రవాణాకు పాల్పడటం లేదని, అమెరికా చేస్తున్న ఆరోపణలు అవాస్తవమని చైనా విదేశాంగ శాఖ స్పష్టం చేసింది.

అటు హిందూ మహాసముద్రంలోనూ అమెరికా దళాలు విరుచుకుపడ్డాయి. శ్రీలంక, ఇండోనేషియా మధ్య ప్రయాణిస్తున్న 'ఎమ్/టి టిఫానీ' అనే భారీ చమురు నౌకను తమ ఆధీనంలోకి తీసుకున్నాయి. ఇరాన్‌కు ఎటువంటి సైనిక, ఆర్థిక మద్దతు అందించే నౌకలనైనా ప్రపంచంలో ఎక్కడైనా అడ్డుకుంటామని పెంటగాన్ స్పష్టం చేసింది. అంతర్జాతీయ జలాలు ఇరాన్ అక్రమ రవాణాకు సురక్షిత ప్రాంతాలు కావని అమెరికా నావికాదళం హెచ్చరించింది.

ట్రంప్ ఆగ్రహం.. పవర్ ప్లాంట్లపై గురి!

అమెరికా అధ్యక్షుడు డోనాల్డ్ ట్రంప్ తన సోషల్ మీడియా వేదికగా ఇరాన్‌పై నిప్పులు చెరుగుతున్నారు. ఇరాన్ కాల్పుల విరమణ ఒప్పందాన్ని అనేకసార్లు ఉల్లంఘించిందని ఆయన ఆరోపించారు. "మా సైన్యం యుద్ధానికి సిద్ధంగా ఉంది. చర్చలు విఫలమైతే మళ్లీ బాంబుల వర్షం కురిపిస్తాం" అని హెచ్చరించారు. ముందస్తుగా దాడులకు సిద్ధమనే సంకేతాలతో చర్చలకు వెళ్లడమే సరైన పద్ధతి అని ట్రంప్ తనదైన శైలిలో వ్యాఖ్యానించారు.

ముఖ్యంగా ఈసారి ఇరాన్ విద్యుత్ కేంద్రాలను లక్ష్యంగా చేసుకుంటామని ట్రంప్ పేర్కొన్నారు. ఇప్పటికే 'ఆపరేషన్ మిడ్‌నైట్ హామర్' ద్వారా ఇరాన్ అణు కేంద్రాలను నామరూపాలు లేకుండా చేశామని, ఇప్పుడు ఆ దేశ మౌలిక సదుపాయాలను దెబ్బతీస్తామని ఆయన డెడ్ లైన్ విధించారు. అమెరికా సైన్యం కూడా మళ్లీ రంగంలోకి దిగేందుకు సిద్ధంగా ఉన్నట్లు ఆయన వెల్లడించారు.

లొంగుబాటుకు సిద్ధంగా లేము: ఖలిబాఫ్ హెచ్చరిక

అమెరికా బెదిరింపులపై ఇరాన్ కూడా ధీటుగా స్పందించింది. ట్రంప్ చర్చల వేదికను 'లొంగుబాటు వేదిక'గా మార్చాలని చూస్తున్నారని పార్లమెంట్ స్పీకర్ ఖలిబాఫ్ మండిపడ్డారు. బెదిరింపుల నీడలో తాము చర్చలు జరపబోమని, యుద్ధ రంగంలో తమ ప్రతాపం చూపడానికి కొత్త వ్యూహాలతో సిద్ధంగా ఉన్నామని ఆయన హెచ్చరించారు. ఇరాన్ ఆత్మగౌరవాన్ని తాకట్టు పెట్టి ఎటువంటి ఒప్పందం చేసుకోబోమని ఆయన స్పష్టం చేశారు.

అటు హోర్ముజ్ జలసంధిని మూసివేస్తామని ఇరాన్ సైన్యం హెచ్చరించడం ప్రపంచ చమురు మార్కెట్‌ను కలవరపెడుతోంది. నేటి రాత్రితో కాల్పుల విరమణ గడువు ముగియనుండటంతో, ప్రపంచ దేశాలన్నీ ఇస్లామాబాద్ వైపు ఆశగా చూస్తున్నాయి. ఏమాత్రం తేడా వచ్చినా పశ్చిమాసియా మరోసారి భీకర యుద్ధంలోకి జారుకోవడం ఖాయంగా కనిపిస్తోంది. నేడు జరిగే చర్చల ఫలితంపైనే లక్షలాది మంది ప్రజల ప్రాణాలు ఆధారపడి ఉన్నాయి.