28న భారత్కు యుఎన్జీఏ అధ్యక్షురాలు అన్నాలెనా బేర్ బాక్
ఐక్యరాజ్యసమితి జనరల్ అసెంబ్లీ అధ్యక్షురాలు అన్నాలెనా బేర్ బాక్ వచ్చే వారం భారత్లో పర్యటించనున్నారు. భారత విదేశాంగ శాఖ మంత్రి ఎస్. జైశంకర్ ఆహ్వానం మేరకు ఆమె ఏప్రిల్ 28న దేశ రాజధాని న్యూఢిల్లీకి రానున్నారు. ఈ పర్యటనలో భాగంగా అంతర్జాతీయ ప్రాముఖ్యత కలిగిన పలు కీలక అంశాలపై ఇరు పక్షాల మధ్య చర్చలు జరగనున్నాయని భారత విదేశాంగ మంత్రిత్వ శాఖ శుక్రవారం ఒక ప్రకటనలో తెలిపింది.
గాంధీజీకి నివాళులు.. కీలక భేటీలు
భారత్కు చేరుకున్న అనంతరం అన్నాలెనా బేర్ బాక్ రాజ్ఘాట్ను సందర్శించి మహాత్మా గాంధీ సమాధి వద్ద నివాళులర్పించనున్నారు. అనంతరం విదేశాంగ మంత్రి జైశంకర్తో సమావేశమై పరస్పర ప్రయోజనాలున్న అంతర్జాతీయ సమస్యలు, బహుళపక్ష వేదికలపై భారత్ పోషిస్తున్న పాత్ర గురించి చర్చించనున్నారు. వీటితో పాటు కేంద్ర ఎలక్ట్రానిక్స్, ఐటీ మంత్రిత్వ శాఖ ప్రతినిధులతో ఆమె ప్రత్యేకంగా భేటీ కానున్నారు.
ఏఐ నియంత్రణపై చర్చలు
ప్రస్తుత కాలంలో అత్యంత కీలకంగా మారిన కృత్రిమ మేధ నిర్వహణ, దాని పాలన, నియంత్రణ అంశాలపై అన్నాలెనా ఐటీ శాఖ అధికారులతో ముఖాముఖి చర్చించనున్నారు. సాంకేతిక రంగంలో భారత్ సాధిస్తున్న ప్రగతిని అభినందిస్తూనే, ఏఐ దుర్వినియోగాన్ని అరికట్టేందుకు ప్రపంచ దేశాలు అనుసరించాల్సిన వ్యూహాలపై ఈ చర్చలు సాగనున్నాయి.
దౌత్యవేత్తలతో సమావేశం
ఐరాస అధ్యక్షురాలి అధికార ప్రతినిధి లా నీస్ కొలిన్స్ తెలిపిన వివరాల ప్రకారం.. అన్నాలెనా భారత్లో పలువురు ప్రభుత్వ ఉన్నతాధికారులను కలుస్తారు. అలాగే భారత్లోని ఐక్యరాజ్యసమితి రెసిడెంట్ కోఆర్డినేటర్ స్టీఫన్ ప్రిస్నర్ నేతృత్వంలోని యూఎన్ బృందంతో సమావేశమై ఇక్కడి అభివృద్ధి కార్యక్రమాలను సమీక్షిస్తారు.
తదుపరి పర్యటన చైనాలో..
భారత పర్యటన ముగిసిన వెంటనే, బుధ, గురువారాల్లో అన్నాలెనా బేర్ బాక్ చైనాలో పర్యటించనున్నారు. బీజింగ్లో అక్కడి ప్రభుత్వ అధికారులతో పాటు, ఐరాస రెసిడెంట్ కోఆర్డినేటర్ స్టీఫన్ జాక్సన్ నేతృత్వంలోని బృందంతో ఆమె సమావేశం కానున్నారు. భారత్, చైనా ప్రభుత్వాల ఆహ్వానం మేరకే ఈ పర్యటనలు జరుగుతున్నాయని ఐరాస ప్రతినిధి స్పష్టం చేశారు.