ఎన్టీఆర్‌కు ‘భారత రత్న’ ఇవ్వాలని మహానాడులో ఏకగ్రీవ తీర్మానం: సీఎం

దేశ రాజకీయ ముఖచిత్రాన్ని మార్చడంలో కీలక పాత్ర పోషించిన తెలుగుదేశం పార్టీ (టీడీపీ) వ్యవస్థాపకుడు, మాజీ ముఖ్యమంత్రి స్వర్గీయ నందమూరి తారక రామారావు (ఎన్టీఆర్) కు దేశ అత్యున్నత పౌర పురస్కారమైన ‘భారత రత్న’ను ప్రకటించాలని ఆంధ్రప్రదేశ్ ముఖ్యమంత్రి నారా చంద్రబాబు నాయుడు డిమాండ్ చేశారు. ఈ మేరకు ప్రతిపాదనను ఏకగ్రీవంగా ఆమోదించారు. ప్రపంచవ్యాప్తంగా ఉన్న కోట్లాది మంది తెలుగు ప్రజల భావోద్వేగాలు, ఆకాంక్షలను గౌరవిస్తూ కేంద్ర ప్రభుత్వం ఎన్టీఆర్‌కు ఈ అత్యున్నత గౌరవాన్ని అందించాలని కోరారు.

గురువారం ఎన్టీఆర్ జయంతిని పురస్కరించుకుని జరిగిన టీడీపీ వార్షిక పండుగ 'మహానాడు' రెండో రోజు ఉత్సవాలలో చంద్రబాబు నాయుడు ప్రసంగించారు. ఈ సందర్భంగా ఆయన మాట్లాడుతూ.. "భారతదేశ రాజకీయ రంగంలో పెను మార్పులకు నాంది పలికిన ఎన్టీఆర్ లాంటి గొప్ప నాయకుడికి భారత రత్న పురస్కారాన్ని ఇవ్వాలని మేము కేంద్ర ప్రభుత్వానికి విజ్ఞప్తి చేస్తున్నాము" అని పేర్కొన్నారు. తెలుగు ప్రజల ఐక్యత కోసం అహర్నిశలు శ్రమించిన ఎన్టీఆర్, వారి గుండెల్లో చిరస్థాయిగా నిలిచిపోతారని కొనియాడారు.

ఎన్టీఆర్ జీవిత ప్రస్థానాన్ని గుర్తుచేసుకుంటూ.. ఒక సాధారణ ప్రభుత్వ ఉద్యోగిగా తన కెరీర్‌ను ప్రారంభించిన ఎన్టీఆర్, ఆ తర్వాత చిత్ర పరిశ్రమలోకి ప్రవేశించి అగ్ర కథానాయకుడిగా ఎదిగారని చంద్రబాబు చెప్పారు. ఆపై 1982లో తెలుగుదేశం పార్టీని స్థాపించిన కేవలం తొమ్మిది నెలల స్వల్ప వ్యవధిలోనే ఉమ్మడి ఆంధ్రప్రదేశ్‌కు ముఖ్యమంత్రిగా బాధ్యతలు చేపట్టి చరిత్ర సృష్టించారని కొనియాడారు. అంతేకాకుండా, కేంద్రంలో జాతీయ ప్రభుత్వాల ఏర్పాటులో (కూటమి రాజకీయాలలో) కూడా ఎన్టీఆర్ అత్యంత కీలక పాత్ర పోషించారని చంద్రబాబు నాయుడు ఈ సందర్భంగా గుర్తుచేశారు.

మహిళా రిజర్వేషన్లపై కీలక ప్రకటన

చట్టసభలలో (పార్లమెంట్, అసెంబ్లీలలో) మహిళలకు 33 శాతం సీట్లను కేటాయించాలని కేంద్ర ప్రభుత్వాన్ని టీడీపీ మరోసారి కోరుతుందని చంద్రబాబు వెల్లడించారు. ఈ కోటాను క్షేత్రస్థాయిలో అమలు చేసే మొదటి రాజకీయ పార్టీగా టీడీపీ నిలుస్తుందని ఆయన స్పష్టం చేశారు. మహానాడు మొదటి రోజున పార్టీ జాతీయ ప్రధాన కార్యదర్శి నారా లోకేష్ మాట్లాడుతూ.. రాబోయే 2029 సాధారణ ఎన్నికల్లోనే పార్టీ తరపున మహిళలకు 33 శాతం సీట్లు కేటాయిస్తామని ప్రతిపాదించిన సంగతిని ఈ సందర్భంగా ప్రస్తావించారు.

ఈ సందర్భంగా ఆంధ్రప్రదేశ్ మంత్రి డోలా బాల వీరాంజనేయస్వామి మాట్లాడుతూ.. ఎన్టీఆర్‌కు భారత రత్న ఇవ్వాలనేది కేవలం ఒక పార్టీ డిమాండ్ కాదని, ప్రపంచవ్యాప్తంగా ఉన్న తెలుగువారందరి ఆకాంక్ష అని స్పష్టం చేశారు. ఎన్టీఆర్ ఆంధ్రప్రదేశ్ ప్రజల ఆత్మగౌరవ ప్రతీక. తెలుగు భాషకు, తెలుగు జాతికి ఆయనే పెద్ద గుర్తింపు తెచ్చారు. అందుకే ప్రపంచవ్యాప్తంగా ఉన్న తెలుగువారంతా ఆయనకు భారత రత్న ఇవ్వాలని కోరుకుంటున్నారు. ఈ ప్రజా డిమాండ్‌ను మేము ప్రధానమంత్రి నరేంద్ర మోదీ దృష్టికి తీసుకెళ్తాం అని చెప్పారు.

ట్విట్టర్ వేదికగా పీఎం మోడీ ఘన నివాళులు

ఎన్టీఆర్ జయంతి సందర్భంగా ప్రధానమంత్రి నరేంద్ర మోడీ సామాజిక మాధ్యమం ‘ఎక్స్’ ద్వారా ఘనంగా నివాళులర్పించారు. మహోన్నత వ్యక్తి ఎన్టీఆర్ జయంతి సందర్భంగా ఆయనకు నా నివాళులు. ప్రజా సంక్షేమం, సుపరిపాలన పట్ల ఆయనకున్న నిబద్ధత పేదలు, బలహీన వర్గాలకు ఆత్మగౌరవాన్ని అందించింది. సినీ రంగానికి ఆయన చేసిన కృషి తరతరాలకు స్ఫూర్తిదాయకం. నా మిత్రుడు చంద్రబాబు నాయుడి నాయకత్వంలోని ఆంధ్రప్రదేశ్ ఎన్డీయే ప్రభుత్వం.. ఎన్టీఆర్ ఆశయాలను, ప్రజల కోసం ఆయన కన్న కలలను నెరవేర్చడానికి పూర్తిగా కట్టుబడి ఉందని పీఎం మోడీ రాసుకొచ్చారు.

ఎన్టీఆర్ ప్రస్థానం

1923 మే 28న జన్మించిన నందమూరి తారక రామారావు, 1996 జనవరి 18న తన 72వ ఏట కన్నుమూశారు. దాదాపు 300 చిత్రాలలో నటించి తెలుగు చలనచిత్ర పరిశ్రమలో తిరుగులేని నటుడిగా నిలిచారు. 1982లో టీడీపీని స్థాపించి ఉమ్మడి ఆంధ్రప్రదేశ్‌కు మూడు పర్యాయాలు ముఖ్యమంత్రిగా సేవలందించారు. ప్రస్తుతం చంద్రబాబు నాయుడి నేతృత్వంలోని తెలుగుదేశం పార్టీ.. కేంద్రంలోని ఎన్డీయే కూటమిలో 16 మంది లోక్‌సభ ఎంపీలతో అత్యంత కీలక భాగస్వామిగా కొనసాగుతోంది.