ఒపెక్ కూటమికి యూఏఈ గుడ్బై
అంతర్జాతీయ చమురు మార్కెట్లో పెను మార్పులు చోటుచేసుకోనున్నాయి. చమురు ఉత్పత్తి చేసే దేశాల శక్తివంతమైన కూటమి 'ఒపెక్' నుంచి వైదొలగాలని యునైటెడ్ అరబ్ ఎమిరేట్స్ సంచలన నిర్ణయం తీసుకుంది. మే 1వ తేదీ నుంచే ఈ నిర్ణయం అమల్లోకి వస్తుందని అధికారికంగా ప్రకటించింది. కేవలం ఒపెక్ మాత్రమే కాకుండా, రష్యాతో కూడిన 'ఒపెక్ ప్లస్' గ్రూపు నుంచి కూడా తప్పుకుంటున్నట్లు వెల్లడించింది. దశాబ్దాలుగా ఈ కూటమిలో కీలక సభ్యదేశంగా ఉన్న యూఏఈ.. ఇప్పుడు హఠాత్తుగా బయటకు రావడం ప్రపంచ ఆర్థిక రంగంలో చర్చనీయాంశమైంది.
ఎందుకీ దూరం?
చాలా కాలంగా సౌదీ అరేబియా ఆధ్వర్యంలోని ఒపెక్ కూటమి విధిస్తున్న చమురు ఉత్పత్తి ఆంక్షల పట్ల యూఏఈ అసంతృప్తిగా ఉంది. తమ దేశంలో చమురు ఉత్పత్తి సామర్థ్యాన్ని పెంచుకున్నప్పటికీ, కూటమి నిబంధనల వల్ల ఆశించిన స్థాయిలో ఎగుమతులు చేయలేకపోతున్నామని ఎమిరేట్స్ భావిస్తోంది. దీనికి తోడు పొరుగు దేశమైన సౌదీ అరేబియాతో గత కొంతకాలంగా సంబంధాలు అంత ఆశాజనకంగా లేవు. ఆర్థిక లాభాలు, విదేశీ పెట్టుబడుల విషయంలో రెండు దేశాల మధ్య పోటీ పెరగడం కూడా ఈ నిర్ణయానికి ఒక ప్రధాన కారణమని విశ్లేషకులు భావిస్తున్నారు.
అరవై ఏళ్ల బంధం కట్..
యూఏఈకి ఒపెక్తో సుదీర్ఘ అనుబంధం ఉంది. 1967లో అబుదాబి ఎమిరేట్ ద్వారా ఈ కూటమిలో చేరగా, 1971లో యూఏఈ దేశంగా ఏర్పడిన తర్వాత కూడా సభ్యత్వాన్ని కొనసాగించింది. అయితే తన భవిష్యత్ అవసరాలు, ఆర్థిక వ్యూహాలకు అనుగుణంగా ఇకపై స్వతంత్రంగా వ్యవహరించాలని నిర్ణయించుకుంది. తమ దేశ ప్రయోజనాల దృష్ట్యా, మరింత బాధ్యతాయుతంగా చమురు ఉత్పత్తిని పెంచడమే లక్ష్యంగా ముందుకు సాగుతామని యూఏఈ స్పష్టం చేసింది.
పెరుగుతున్న రాజకీయ సెగలు
కేవలం చమురు విషయంలోనే కాకుండా, ప్రాంతీయ రాజకీయాల్లోనూ సౌదీ-యూఏఈ మధ్య దూరం పెరుగుతోంది. ముఖ్యంగా యెమెన్ యుద్ధం విషయంలో గతంలో కలిసి పనిచేసిన ఈ రెండు దేశాలు, ఇటీవల ఒకరిపై ఒకరు విమర్శలు చేసుకునే స్థాయికి చేరాయి. యెమెన్లోని వేర్పాటువాదులకు యూఏఈ మద్దతు ఇస్తోందని, వారికి ఆయుధాలు సరఫరా చేస్తున్నారని ఆరోపిస్తూ గత డిసెంబర్లో సౌదీ అరేబియా దాడులు కూడా చేసింది. ఈ క్రమంలోనే దుబాయ్ కేంద్రంగా పనిచేసే సౌదీ మీడియా సంస్థలు కూడా తమ కార్యాలయాలను తిరిగి సౌదీకి తరలించడం ఉద్రిక్తతలకు అద్దం పడుతోంది.
ప్రపంచ మార్కెట్పై ప్రభావం ఎంత?
యూఏఈ నిష్క్రమణతో ఒపెక్ కూటమి పట్టు సడలే అవకాశం ఉంది. ఇప్పటికే అమెరికా తన చమురు ఉత్పత్తిని భారీగా పెంచడంతో ఒపెక్ ప్రభావం తగ్గింది. ఇప్పుడు యూఏఈ వంటి దేశం బయటకు వచ్చి తన ఇష్టానుసారం మార్కెట్లోకి చమురును విడుదల చేస్తే, అంతర్జాతీయంగా ధరల్లో హెచ్చుతగ్గులు వచ్చే అవకాశం ఉంది. అయితే తాము బాధ్యతాయుతంగానే వ్యవహరిస్తామని, మార్కెట్ డిమాండ్ను బట్టే చమురు సరఫరాను క్రమంగా పెంచుతామని యూఏఈ ప్రజలకు, అంతర్జాతీయ సమాజానికి భరోసా ఇచ్చింది.