అమెరికా పాస్పోర్ట్లపై ట్రంప్ ఫొటో
అమెరికా ఆవిర్భవించి 250 వసంతాలు పూర్తి చేసుకుంటున్న చారిత్రాత్మక సందర్భాన్ని పురస్కరించుకుని అధ్యక్షుడు డోనాల్డ్ ట్రంప్ చిత్రంతో కూడిన ప్రత్యేక పరిమిత ఎడిషన్ పాస్పోర్ట్లను తీసుకురావాలని స్టేట్ డిపార్ట్మెంట్ నిర్ణయించింది. ఈ ఏడాది జూలైలో జరగనున్న 'అమెరికా250' ఉత్సవాల జ్ఞాపకార్థం ఈ సరికొత్త పాస్పోర్ట్లను విడుదల చేయనున్నారు.
పాస్పోర్ట్ రూపకల్పన విశేషాలు
ఈ ప్రత్యేక పాస్పోర్ట్లలో అమెరికా వ్యవస్థాపక పితామహుల చిత్రాలతో పాటు డోనాల్డ్ ట్రంప్ ఫొటోను కూడా ముద్రించారు. ఒక పేజీలో ట్రంప్ చిత్రం చుట్టూ 'డిక్లరేషన్ ఆఫ్ ఇండిపెండెన్స్' పాఠ్యం, అమెరికా జాతీయ జెండా ఉంటాయి. వీటిపై ట్రంప్ సంతకం బంగారు వర్ణంలో మెరిసిపోతుంటుంది. మరో పేజీలో స్వాతంత్య్ర ప్రకటనపై సంతకాలు చేస్తున్న వ్యవస్థాపక పితామహుల ప్రసిద్ధ పెయింటింగ్ను పొందుపరిచారు. ఈ కొత్త డిజైన్లలో అద్భుతమైన కళాకృతి ఉన్నప్పటికీ, ప్రపంచంలోనే అత్యంత సురక్షితమైన డాక్యుమెంట్గా పేరున్న అమెరికా పాస్పోర్ట్ భద్రతా ప్రమాణాల్లో ఎలాంటి మార్పులు ఉండవని అధికారులు స్పష్టం చేశారు.
ఎక్కడ లభిస్తాయి?
ఈ ప్రత్యేక పాస్పోర్ట్లు దేశవ్యాప్తంగా అందుబాటులో ఉండవు. కేవలం వాషింగ్టన్ పాస్పోర్ట్ ఏజెన్సీకి వ్యక్తిగతంగా వెళ్లిన వారికి మాత్రమే వీటిని జారీ చేస్తారు. స్టాక్ ఉన్నంత వరకు ఏ అమెరికా పౌరుడైనా వీటి కోసం దరఖాస్తు చేసుకోవచ్చని విదేశాంగ శాఖ ప్రతినిధి టామీ పిగోట్ వెల్లడించారు.
డాలర్ కాయిన్పై 'ఫైట్.. ఫైట్..'
పాస్పోర్ట్లే కాకుండా, ట్రంప్ చిత్రంతో కూడిన ఒక డాలర్ కాయిన్ను కూడా ట్రెజరీ విభాగం ప్రతిపాదించింది. నాణేనికి ఒకవైపు ట్రంప్ ప్రొఫైల్ చిత్రంతో పాటు 'లిబర్టీ', 'ఇన్ గాడ్ వి ట్రస్ట్' అనే పదాలు ఉంటాయి. రెండో వైపు.. గతంలో పెన్సిల్వేనియాలోని బట్లర్లో తనపై జరిగిన హత్యాయత్నం తర్వాత ట్రంప్ ఇచ్చిన పిలుపు 'ఫైట్.. ఫైట్.. ఫైట్..' అనే పదాలతో పాటు, ఆయన పిడికిలి బిగించిన చిత్రం ఉంటుంది.
గ్రాండ్ ప్రిక్స్, యూఎఫ్సీ ఫైట్..
అమెరికా 250 ఏళ్ల వేడుకలను ట్రంప్ సర్కార్ అత్యంత వైభవంగా నిర్వహిస్తోంది. కేవలం పాస్పోర్ట్లు, నాణేలే కాకుండా.. ఆగస్టులో నేషనల్ మాల్ వద్ద 'గ్రాండ్ ప్రిక్స్ రేస్', జూన్ నెలలో వైట్ హౌస్ సౌత్ లాన్లో 'యూఎఫ్సీ' ఫైట్ వంటి వినూత్న కార్యక్రమాలను కూడా ఈ సంబరాల్లో భాగంగా ఏర్పాటు చేస్తున్నారు.
అమెరికా 1776 జూలై 4న బ్రిటన్ పాలన నుండి విముక్తి పొందింది. 2026 జూలై నాటికి దేశం ఏర్పడి 250 ఏళ్లు పూర్తవుతున్న సందర్భంగా 'అమెరికా250' పేరుతో ఏడాది పొడవునా ఉత్సవాలు నిర్వహిస్తున్నారు. ఈ మైలురాయిని పురస్కరించుకుని, దేశ చరిత్రలో తన పాత్రను శాశ్వతం చేసేలా పాస్పోర్ట్లు, కరెన్సీ నాణేలపై తన చిత్రాన్ని చేర్చాలని ట్రంప్ యంత్రాంగం ఈ నిర్ణయం తీసుకుంది.