డిజిటల్ అరెస్ట్ పేరిట రూ.1.6 కోట్ల దోపిడీ..బ్యాంకు అధికారి సహా ముగ్గురు నిందితుల అరెస్ట్
తెలుగు రాష్ట్రాల్లో సంచలనం సృష్టించిన ‘డిజిటల్ అరెస్ట్’ మోసం కేసులో సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) ఉక్కుపాదం మోపింది. తెలంగాణ, ఆంధ్రప్రదేశ్ రాష్ట్రాల్లోని ఐదు ప్రాంతాల్లో శనివారం ఏకకాలంలో దాడులు నిర్వహించిన అధికారులు ఒక బ్యాంకు అధికారి సహా ముగ్గురు కీలక నిందితులను అరెస్టు చేశారు. ఒక సీనియర్ పౌరుడిని లక్ష్యంగా చేసుకుని ఏకంగా రూ. 1.6 కోట్లకు పైగా దోచుకున్న ఈ ముఠా ఉదంతం ఇప్పుడు దేశవ్యాప్తంగా చర్చనీయాంశమైంది.
సుప్రీంకోర్టు మార్గదర్శకాలతో రంగంలోకి సీబీఐ
దేశంలో పెరుగుతున్న సైబర్ ఎక్స్టోర్షన్ (బెదిరింపుల ద్వారా వసూళ్లు) కేసులపై దేశ అత్యున్నత న్యాయస్థానం సుప్రీంకోర్టు తీవ్ర ఆగ్రహం వ్యక్తం చేస్తూ ఇటీవల కీలక మార్గదర్శకాలను జారీ చేసింది. ఈ నేపథ్యంలో సైబర్ నేరగాళ్లపై కఠిన చర్యలు తీసుకోవాలన్న ఆదేశాలతో సీబీఐ రంగంలోకి దిగింది. తాజా కేసులో బాధితుడిని వీడియో కాల్ ద్వారా సంప్రదించిన నిందితులు తాము చట్ట అమలు సంస్థల అధికారులమని నమ్మబలికారు. బాధితుడిని మానసిక ఒత్తిడికి గురిచేసి ‘డిజిటల్ అరెస్ట్’ చేస్తున్నామని భయపెట్టి తక్షణ అరెస్ట్ నుంచి తప్పించుకోవడానికి ‘సెటిల్మెంట్’ పేరుతో రూ.1.6 కోట్లను వసూలు చేసినట్లు దర్యాప్తులో వెల్లడైంది.
బ్యాంకు అధికారి అండతోనే అక్రమాలు
ఈ నేరంలో బ్యాంకింగ్ వ్యవస్థలోని లోపాలను నిందితులు అత్యంత చాకచక్యంగా వాడుకున్నారు. అరెస్టయిన వారిలో ఇండస్ఇండ్ బ్యాంక్ అసిస్టెంట్ మేనేజర్ పాత్ర కీలకంగా ఉన్నట్లు అధికారులు గుర్తించారు. నిందితులకు సహకరిస్తూ మోసపూరితంగా ఒక కార్పొరేట్ బ్యాంక్ ఖాతాను తెరిచిన సదరు అధికారి దోపిడీ సొమ్మును ఆ ఖాతా ద్వారానే మళ్లించినట్లు సీబీఐ స్పష్టం చేసింది. మిగిలిన ఇద్దరు నిందితులు ‘మ్యూల్ అకౌంట్స్’ (బినామీ ఖాతాలు) నెట్వర్క్ను నిర్వహిస్తూ దోచుకున్న డబ్బును మనీలాండరింగ్ ప్రక్రియ ద్వారా చేతులు మార్చినట్లు విచారణలో తేలింది.
అప్రమత్తతే రక్షణ - సీబీఐ హెచ్చరిక
సోదాల సందర్భంగా నిందితుల నివాసాల నుంచి కీలక పత్రాలు, స్మార్ట్ఫోన్లు, లాప్టాప్లను సీబీఐ స్వాధీనం చేసుకుంది. ఈ సందర్భంగా అధికారులు ప్రజలకు కీలక సూచనలు చేశారు. "భారతదేశంలో ‘డిజిటల్ అరెస్ట్’ అనే నిబంధన లేదు. వీడియో కాల్ లేదా ఫోన్ ద్వారా ఎవరినీ అరెస్ట్ చేసే అధికారం ఏ దర్యాప్తు సంస్థకూ లేదు అని సీబీఐ కుండబద్దలు కొట్టింది. ఎవరైనా అధికారులుగా చెప్పుకుంటూ డబ్బులు డిమాండ్ చేస్తే భయపడకుండా వెంటనే నేషనల్ సైబర్ క్రైమ్ రిపోర్టింగ్ పోర్టల్ లేదా స్థానిక పోలీసులకు ఫిర్యాదు చేయాలని కోరారు. ఈ ముఠా వెనుక ఇంకా పెద్ద నెట్వర్క్ ఉండే అవకాశం ఉందని దర్యాప్తు కొనసాగుతోందని అధికారులు వెల్లడించారు.