మహిళా బిల్లు ఆమోదం వెనుక కుట్ర జరుగుతోంది: కాంగ్రెస్ నేత వీహెచ్

మహిళా రిజర్వేషన్ బిల్లు అమలు తీరుపై కాంగ్రెస్ సీనియర్ నేత వి. హనుమంతరావు (వీహెచ్) తీవ్ర అభ్యంతరాలు వ్యక్తం చేశారు. మహిళల కోసం ప్రత్యేక జనగణన జరపకపోవడం, వెనుకబడిన వర్గాలకు సరైన అవకాశాలు కల్పించకపోవడం వంటి అంశాలపై ఆయన ప్రశ్నలు లేవనెత్తారు. శుక్రవారం న్యూఢిల్లీలో మీడియాతో మాట్లాడిన వీహెచ్, తమ పార్టీ మహిళా రిజర్వేషన్లకు వ్యతిరేకం కాదని, అయితే దీని అమలులో పారదర్శకత లేదని విమర్శించారు.

మహిళా రిజర్వేషన్లలో వెనుకబడిన వర్గాలకు ప్రత్యేక కోటా కల్పించాలని ఆయన డిమాండ్ చేశారు. బీసీలకు అవకాశం ఇవ్వకపోతే, కేవలం అగ్రవర్ణాల మహిళలకే ఈ రిజర్వేషన్లు దక్కుతాయి. ఇది సామాజిక న్యాయానికి విరుద్ధం అని ఆయన పేర్కొన్నారు. అసలు మహిళల సంఖ్య, వారి సామాజిక స్థితిగతులపై సర్వే చేయకుండానే బిల్లును ఎలా ఆమోదిస్తారని ప్రశ్నించారు. ఇది కేవలం ఎన్నికల ముందు ప్రజలను మభ్యపెట్టే కుట్ర అని ఆరోపించారు. మహిళా రిజర్వేషన్ బిల్లులోని లోపాలను నిరసిస్తూ తెలంగాణ భవన్ వెలుపల విపక్ష నేతలు ఆందోళన చేపట్టారు.

ప్రధాని మోడీ విజ్ఞప్తి

మరోవైపు, ప్రధాని నరేంద్ర మోడీ అన్ని రాజకీయ పార్టీలకు భావోద్వేగపూరిత విజ్ఞప్తి చేశారు. 'నారీ శక్తి వందన్ అధినియం' సవరణకు విభేదాలను పక్కన పెట్టి మద్దతు ఇవ్వాలని కోరారు. దేశంలోని కోట్లాది మంది మహిళల దృష్టి ప్రస్తుతం పార్లమెంట్ వైపు ఉన్నాయి. వారి మనోభావాలను దెబ్బతీసేలా ఏ పార్టీ ప్రవర్తించవద్దు. మహిళా శక్తికి అండగా నిలవండి అని ప్రధాని ఎక్స్ వేదికగా కోరారు.