దేశం జాతీయవాద శక్తుల వైపు పయనిస్తోంది: ఎన్. రామచందర్ రావు

అస్సాం, పశ్చిమ బెంగాల్ అసెంబ్లీ ఎన్నికల్లో భారతీయ జనతా పార్టీ సాధించిన చారిత్రాత్మక విజయంపై రాష్ట్ర బీజేపీ అధ్యక్షుడు ఎన్. రామచందర్ రావు హర్షం వ్యక్తం చేశారు. మంగళవారం ఆయన హైదరాబాద్‌లో మీడియాతో మాట్లాడుతూ, ఈ ఎన్నికల ఫలితాలు దేశవ్యాప్తంగా జాతీయవాద శక్తులకు పెరుగుతున్న ప్రజాదరణకు నిదర్శనమని పేర్కొన్నారు. ముఖ్యంగా బెంగాల్ ప్రజలు తుష్టీకరణ రాజకీయాలను ఇకపై సహించబోమని తమ తీర్పు ద్వారా స్పష్టం చేశారని ఆయన కొనియాడారు.

బెంగాల్‌లో చారిత్రక మార్పు.. ఈసీపై ప్రశంసలు

పశ్చిమ బెంగాల్‌లో బీజేపీ సాధించిన విజయం ఒక మైలురాయి అని రామచందర్ రావు అభివర్ణించారు. ఎన్నికల సంఘం చేపట్టిన ఓటర్ల జాబితా సవరణ (స‌ర్) ద్వారా దొంగ ఓట్లను తొలగించడమే కాకుండా, ప్రజలు నిర్భయంగా ఓటు వేసే వాతావరణాన్ని కల్పించారని ఆయన ప్రశంసించారు. తృణమూల్ కాంగ్రెస్ ఓటమిని అంగీకరించలేక ఈవీఎంలు, ఎన్నికల సంఘంపై నిందలు వేస్తోంది. కానీ వాస్తవం ఏమిటంటే, బెంగాల్ ప్రజలు అభివృద్ధిని, జాతీయవాదాన్ని ఎంచుకున్నారని ఆయన వ్యాఖ్యానించారు. తాజా గణాంకాల ప్రకారం, బెంగాల్‌లోని 294 స్థానాలకు గాను బీజేపీ 207 స్థానాల్లో ఘనవిజయం సాధించి, అక్కడ మొదటిసారి ప్రభుత్వాన్ని ఏర్పాటు చేయబోతోంది.

తమిళనాడు రాజకీయాల్లో నటుడు విజయ్ నేతృత్వంలోని టీవీకే పార్టీ అనూహ్య రీతిలో 108 స్థానాలను గెలుచుకుని అందరినీ ఆశ్చర్యపరిచింది. రెండు ప్రధాన ద్రవిడ పార్టీలను వెనక్కి నెట్టి విజయ్ సంచలనం సృష్టించారని రామచందర్ రావు పేర్కొన్నారు. ఇక పుదుచ్చేరిలో ఎన్. రంగస్వామి నేతృత్వంలోని ఏఐఎన్ఆర్సీ కూటమి అధికారాన్ని నిలబెట్టుకుంది. దేశవ్యాప్తంగా వచ్చిన ఈ మార్పులు సరికొత్త రాజకీయ సమీకరణాలకు దారితీస్తాయని ఆయన ధీమా వ్యక్తం చేశారు.