మెట్రో ఫేజ్-1 విలువ నిర్ధారణ వేగవంతం చేయండి.. కేంద్ర మంత్రులకు సీఎం రేవంత్ రెడ్డి లేఖ!

హైదరాబాద్ మెట్రో రైల్ ఫేజ్-1ను తెలంగాణ ప్రభుత్వం స్వాధీనం చేసుకునే ప్రక్రియను వేగవంతం చేయాలని, అందుకోసం ఎస్‌బీఐ క్యాపిటల్ మార్కెట్స్ లిమిటెడ్‌ను వెంటనే కన్సల్టెంట్‌గా నియమించాలని తెలంగాణ ముఖ్యమంత్రి ఎ. రేవంత్ రెడ్డి కేంద్ర పట్టణాభివృద్ధి శాఖ మంత్రి మనోహర్ లాల్, కేంద్ర బొగ్గు శాఖ మంత్రి జి. కిషన్ రెడ్డికి లేఖలు రాశారు. గత నెల ఢిల్లీలో జరిగిన సమావేశంలో తీసుకున్న నిర్ణయాలు ఇప్పటికీ అమలు కాలేదని ఆయన ఆందోళన వ్యక్తం చేశారు.

సీఎం రేవంత్ రెడ్డి తన లేఖల్లో జూన్ 24న ఢిల్లీలో జరిగిన కీలక సమావేశాన్ని ప్రస్తావించారు. ఆ సమావేశంలో కేంద్ర పట్టణాభివృద్ధి శాఖ మంత్రి మనోహర్ లాల్, కేంద్ర బొగ్గు శాఖ మంత్రి జి. కిషన్ రెడ్డి, కేంద్ర రైల్వే మంత్రి అశ్విని వైష్ణవ్ పాల్గొన్నారని తెలిపారు. ఆ సమావేశంలో హైదరాబాద్ మెట్రో ఫేజ్-1 విలువ నిర్ధారణ, ఆర్థిక పరిస్థితుల పరిశీలన కోసం ఎస్‌బీఐక్యాప్స్‌ను కన్సల్టెంట్‌గా నియమించాలని నిర్ణయించినట్లు గుర్తు చేశారు. ఈ ప్రక్రియ పూర్తయితే ఫేజ్-1ను తెలంగాణ ప్రభుత్వం స్వాధీనం చేసుకునే మార్గం సుగమం అవుతుందని పేర్కొన్నారు.

అలాగే ప్రస్తుతం ఫేజ్-1పై ఉన్న అధిక వడ్డీ రుణాలను తక్కువ వడ్డీతో రీఫైనాన్స్ చేసే అవకాశాలను కూడా ఎస్‌బీఐక్యాప్స్ పరిశీలించాలని సమావేశంలో నిర్ణయించారని సీఎం తెలిపారు. అంతేకాకుండా హైదరాబాద్ మెట్రో ఫేజ్-2 విస్తరణకు అవసరమైన ఆర్థిక నమూనా, దీర్ఘకాలిక రుణాలు, నిధుల సమీకరణ మార్గాలు, ఫైనాన్సింగ్ నిర్మాణంపై కూడా సమగ్ర అధ్యయనం చేయాల్సి ఉందని వివరించారు.

ఈ మొత్తం బాధ్యతలను ఎస్‌బీఐక్యాప్స్‌కు తక్షణమే అప్పగించాలని సమావేశంలో అంగీకరించినప్పటికీ, ఇప్పటివరకు ఆ సంస్థకు అధికారికంగా పనులు అప్పగించలేదని సీఎం ఆవేదన వ్యక్తం చేశారు. అలాగే టర్మ్స్ ఆఫ్ రిఫరెన్స్ కూడా ఇప్పటికీ ఖరారు కాలేదని లేఖలో పేర్కొన్నారు.

ఫేజ్-1 విలువ నిర్ధారణ, రుణాల రీఫైనాన్సింగ్, ఫేజ్-2 ఆర్థిక నిర్మాణం వంటి అంశాలు పరస్పరం అనుసంధానమై ఉన్నాయని, అందువల్ల ఈ మూడు అంశాలను ఒకేసారి సమగ్రంగా పరిశీలించడం అత్యంత అవసరమని సీఎం స్పష్టం చేశారు. ఈ నేపథ్యంలో ఎస్‌బీఐక్యాప్స్ నియామకంలో మరింత జాప్యం జరిగితే మొత్తం ప్రాజెక్టు అమలుపై ప్రతికూల ప్రభావం పడుతుందని హెచ్చరించారు.

ఫేజ్-1 స్వాధీనం ప్రక్రియ ఆలస్యం కావడం వల్ల ప్రస్తుతం మెట్రో నిర్వహణలో రోజువారీ పరిపాలనా సమస్యలు, ఆర్థిక అనిశ్చితి నెలకొంటున్నాయని సీఎం పేర్కొన్నారు. దీంతో భవిష్యత్ ప్రణాళికలు కూడా ముందుకు సాగడం లేదని వివరించారు.

అదే సమయంలో హైదరాబాద్ మెట్రో ఫేజ్-2కు సంబంధించిన డీటైల్డ్ ప్రాజెక్ట్ రిపోర్టులు (డీపీఆర్‌లు) కేంద్ర ప్రభుత్వ ఆమోదం పొందడంలో కూడా జాప్యం జరుగుతోందని తెలిపారు. ప్రాజెక్టుకు అవసరమైన నిధుల సమీకరణ కూడా నిలిచిపోవడంతో పనులు ప్రారంభం కావడం ఆలస్యం అవుతోందని చెప్పారు. ఈ ఆలస్యం కొనసాగితే సమయ వ్యత్యాసం కారణంగా నిర్మాణ వ్యయం గణనీయంగా పెరిగే అవకాశం ఉందని సీఎం హెచ్చరించారు. దీంతో రాష్ట్ర ప్రభుత్వంపై అదనపు ఆర్థిక భారం పడే అవకాశముందని కూడా ఆయన లేఖలో పేర్కొన్నారు.

అందువల్ల ఎస్‌బీఐక్యాప్స్‌కు వెంటనే బాధ్యతలు అప్పగించి, టర్మ్స్ ఆఫ్ రిఫరెన్స్‌ను ఖరారు చేసి తెలంగాణ ప్రభుత్వానికి తెలియజేయాలని కేంద్ర పట్టణాభివృద్ధి శాఖ మంత్రి మనోహర్ లాల్‌ను కోరారు. అలాగే కేంద్ర గృహనిర్మాణ, పట్టణాభివృద్ధి శాఖ, రైల్వే మంత్రిత్వ శాఖలతో సమన్వయం చేసి ఈ ప్రక్రియను వేగవంతం చేయాలని, వ్యక్తిగతంగా జోక్యం చేసుకుని ఎస్‌బీఐక్యాప్స్ నియామకాన్ని త్వరగా పూర్తి చేయాలని కేంద్ర మంత్రి జి. కిషన్ రెడ్డిని కూడా సీఎం రేవంత్ రెడ్డి ప్రత్యేకంగా విజ్ఞప్తి చేశారు.