కర్ణాటకలో మళీ సీఎం మార్పు ఊహాగానాలు

కర్ణాటకలో కాంగ్రెస్ ప్రభుత్వంలో మంత్రివర్గ పునర్వ్యవస్థీకరణ (క్యాబినెట్ రీషఫుల్), ముఖ్యమంత్రి పదవి మార్పు చర్చలు మళ్లీ వేడెక్కుతున్నాయి. మంత్రిపదవులు ఆశిస్తున్న నేతలు, అలాగే ఉప ముఖ్యమంత్రి డీకే.శివకుమార్‌‌ను ముఖ్యమంత్రిగా చూడాలనుకునే వర్గాలు వచ్చే మే నెలలో ‘హ్యాపీ న్యూస్’ వస్తుందని ఆశాభావం వ్యక్తం చేస్తున్నాయి. మే 4న నాలుగు రాష్ట్రాలు, ఒక కేంద్రపాలిత ప్రాంత అసెంబ్లీ ఎన్నికల ఫలితాలు, అలాగే కర్ణాటకలో రెండు అసెంబ్లీ ఉపఎన్నికల ఫలితాల తర్వాత నేతృత్వ మార్పు లేదా మంత్రివర్గ మార్పుపై నిర్ణయం వచ్చే అవకాశముందని రాజకీయ వర్గాల్లో చర్చ జరుగుతోంది.

సీనియర్ కాంగ్రెస్ ఎమ్మెల్యే, లెజిస్లేటివ్ అసెంబ్లీ చీఫ్ విప్ అశోక పటన్ మాట్లాడుతూ, ఈ నెల ప్రారంభంలో ఢిల్లీ వెళ్లి కాంగ్రెస్ అధిష్ఠానాన్ని కలిసి మంత్రివర్గ మార్పు కోరామని తెలిపారు. పార్టీ కర్ణాటక ఇన్‌ఛార్జ్ రణదీప్‌ సింగ్‌ సుర్జేవాలా మే రెండో లేదా మూడో వారంలో ‘స్వీట్ న్యూస్’ ఇస్తామని హామీ ఇచ్చారని చెప్పారు. పార్టీ అధ్యక్షుడు మల్లికార్జున్‌ ఖర్గే కూడా ఈ విషయాన్ని రాహుల్‌గాంధీతో చర్చిస్తామని హామీ ఇచ్చారని తెలిపారు. ఎన్నికల ఫలితాల తర్వాత సుమారు 40 మంది ఎమ్మెల్యేలతో కలిసి ఢిల్లీ వెళ్లి మంత్రివర్గ మార్పు కోసం ఒత్తిడి తీసుకువస్తామని చెప్పారు. పార్టీ వర్గాల సమాచారం ప్రకారం, ప్రస్తుత ముఖ్యమంత్రి సిద్ధరామయ్య మంత్రివర్గ మార్పుకు అనుకూలంగా ఉండగా, డి.కె. శివకుమార్ ముందుగా నేతృత్వ మార్పుపై స్పష్టత రావాలని భావిస్తున్నట్లు తెలుస్తోంది. ఒకవేళ అధిష్ఠానం కేవలం క్యాబినెట్ రీషఫుల్‌కు గ్రీన్ సిగ్నల్ ఇస్తే, సిద్ధరామయ్య పూర్తి ఐదేళ్ల పదవీకాలాన్ని కొనసాగించే అవకాశం ఉండి, శివకుమార్‌కు సీఎం అవకాశం తగ్గవచ్చని పార్టీ వర్గాలు చెబుతున్నాయి.

శివకుమార్‌‌కు తగిన గుర్తింపు ఇవ్వాలి

కునిగల్ ఎమ్మెల్యే హెచ్.డి. రంగనాథ్ మాట్లాడుతూ, మే 15న శివకుమార్ పుట్టినరోజు సందర్భంగా ఆయనకు ‘హ్యాపీ న్యూస్’రావాలని పార్టీ కార్యకర్తలు ఆశిస్తున్నారని చెప్పారు. పార్టీ కోసం శివకుమార్ చేసిన కృషికి తగిన గుర్తింపు ఇవ్వాలని అభిప్రాయపడ్డారు. ఈ నేపథ్యంలో, శివకుమార్ స్పందిస్తూ, తాను, సీఎం సిద్ధరామయ్య ఇద్దరూ అధిష్ఠానం తీసుకునే నిర్ణయాన్ని గౌరవిస్తామని తెలిపారు. పార్టీ నాయకత్వంపై చర్చల వివరాలను వెల్లడించకుండా, సరైన సమయంలో నిర్ణయం వస్తుందని విశ్వాసం వ్యక్తం చేశారు. అత్యంత వెనుకబడిన వర్గాల మఠాధిపతుల ఫోరం అధ్యక్షుడు ప్రణవానంద స్వామీజీ నేతృత్వంలోని స్వామీజీల బృందం, శివకుమార్‌ను వెంటనే ముఖ్యమంత్రిగా నియమించాలని డిమాండ్ చేస్తూ సోమవారం ఆయనను నివాసంలో కలిసింది. త్వరలోనే ఢిల్లీ వెళ్లి కాంగ్రెస్ నాయకత్వాన్ని కలిసి తమ డిమాండ్‌ను వినిపిస్తామని వారు తెలిపారు. అలాగే, సిద్ధరామయ్యకు సమీపంగా భావించే కొంతమంది సీనియర్ మంత్రులు, ముఖ్యంగా సతీష్ జార్కిహోలీ తదితరులు ప్రస్తుతం ఢిల్లీలో ఉన్నారని, వారు కూడా పార్టీ అధిష్ఠానాన్ని కలిసే అవకాశం ఉందని సమాచారం.