సోనా పప్పు కేసు: కోల్కతా డీసీపీ ఇంటిపై ఈడీ దాడులు
పశ్చిమ బెంగాల్లో సంచలనం సృష్టించిన ‘సోనా పప్పు’ మనీలాండరింగ్ కేసులో దర్యాప్తు సంస్థ ఎన్ఫోర్స్మెంట్ డైరెక్టరేట్ (ఈడీ) వేగం పెంచింది. ఈ కేసుతో సంబంధం ఉన్నట్లు ఆరోపణలు ఎదుర్కొంటున్న కోల్కతా పోలీస్ డిప్యూటీ కమిషనర్ (డీసీపీ) శాంతాను సిన్హా బిస్వాస్, సన్ ఎంటర్ప్రైజెస్ మేనేజింగ్ డైరెక్టర్ జయ్ ఎస్. కమ్దార్కు చెందిన నివాసాలపై ఈడీ ఆదివారం ఏకకాలంలో దాడులు నిర్వహించింది. మొత్తం మూడు ప్రాంతాల్లో చేపట్టిన ఈ సోదాలు పోలీస్, అధికార వర్గాల్లో తీవ్ర కలకలం రేపాయి.
పోలీసు అధికారి లక్ష్యంగా ఈడీ ఆపరేషన్
కోల్కతాలోని ఈడీ యూనిట్ చేపట్టిన ఈ ఆపరేషన్లో భాగంగా.. డీసీపీ బిస్వాస్కు చెందిన రెండు నివాసాలు, వ్యాపారవేత్త కమ్దార్కు చెందిన ఒక నివాసంలో అధికారులు క్షుణ్ణంగా తనిఖీలు చేపట్టారు. విశ్వసనీయ సమాచారం మేరకు ఈ సోదాలు జరిగినట్లు దర్యాప్తు సంస్థ వెల్లడించింది. అంతకుముందు ఏప్రిల్ 1న ఇదే కేసులో కోల్కతా వ్యాప్తంగా ఎనిమిది చోట్ల దాడులు నిర్వహించి భారీ ఎత్తున నగదు, బంగారాన్ని స్వాధీనం చేసుకున్న విషయం తెలిసిందే.
పట్టుబడ్డ కోట్లు.. విదేశీ తుపాకీ
గత సోదాల్లో ఈడీ అధికారులు బిశ్వజిత్ పొద్దార్ అలియాస్ ‘సోనా పప్పు’, జయ్ కమ్దార్కు చెందిన నివాసాల నుంచి రూ.1.47 కోట్ల నగదు, రూ. 67.64 లక్షల విలువైన బంగారం, వెండి ఆభరణాలను స్వాధీనం చేసుకున్నారు. ముఖ్యంగా సోనా పప్పు నివాసంలో లభించిన ‘మేడ్ ఇన్ యూఎస్ఏ’ రివాల్వర్ను స్వాధీనం చేసుకున్న ఈడీ, దాన్ని రాష్ట్ర పోలీసులకు అప్పగించింది. అలాగే అతడు వాడుతున్న ఖరీదైన ఫార్చ్యూనర్ వాహనాన్ని, పలు కీలక డిజిటల్ ఆధారాలను సీజ్ చేశారు.
మాఫియా సామ్రాజ్యంపై ఈడీ నిఘా
నిందితులు సోనా పప్పు, జయ్ కమ్దార్ అక్రమ మార్గాల్లో భారీగా భూములు, భవనాలు కొనుగోలు చేసినట్లు ఈడీ గుర్తించింది. హత్యాయత్నం, నేరపూరిత కుట్ర, ఆర్మ్స్ యాక్ట్ కింద పశ్చిమ బెంగాల్ పోలీసులు గతంలో నమోదు చేసిన పలు ఎఫ్ఐఆర్ ఆధారంగా ఈడీ విచారణ ప్రారంభించింది. నిందితులు ఒక వ్యవస్థీకృత నేర ముఠాను నడుపుతూ బెంగాల్ వ్యాప్తంగా బెదిరింపులు, భూకబ్జాలు, అక్రమ భవన నిర్మాణాల ద్వారా కోట్లాది రూపాయల ‘క్రైమ్ ప్రొసీడ్స్’ను ఆర్జించినట్లు ఏజెన్సీ ఆరోపిస్తోంది.
పరారీలో ‘సోనా పప్పు’
కోల్కతాలోని గోల్పార్క్ సమీపంలో జరిగిన హింసాత్మక ఘటనలో ప్రధాన నిందితుడిగా ఉన్న సోనా పప్పు ప్రస్తుతం పరారీలో ఉన్నాడు. ఈడీ అధికారులు అతడిని పలుమార్లు సమన్లు జారీ చేసినప్పటికీ, విచారణకు హాజరుకాకుండా తప్పించుకు తిరుగుతున్నాడు. ఈ క్రమంలోనే అతడికి సహకరిస్తున్నారన్న అనుమానంతో పోలీస్ అధికారుల ఇళ్లపై ఈడీ దృష్టి సారించింది. తాజా సోదాల్లో లభించిన కీలక పత్రాలతో ఈ కేసులో మరిన్ని అరెస్టులు జరిగే అవకాశం ఉందని సమాచారం.
శాంతిభద్రతల పరిరక్షణే లక్ష్యంగా..
రాష్ట్రంలో త్వరలో జరగనున్న శాసనసభ ఎన్నికల నేపథ్యంలో.. నేరస్తుల వద్ద లభించిన మారణాయుధాలను స్వాధీనం చేయడం ద్వారా స్వేచ్ఛాయుత వాతావరణంలో ఎన్నికలు జరగడానికి తమ వంతు కృషి చేస్తున్నట్లు ఈడీ వర్గాలు తెలిపాయి. అక్రమంగా సంపాదించిన ఆస్తులను అటాచ్ చేసే ప్రక్రియ కూడా త్వరలోనే ప్రారంభం కానుంది.