ఎస్పీ-సంపర్క్ ద్వారా పోలీసు సిబ్బంది సమస్యల పరిష్కారం:అనకాపల్లి జిల్లా అదనపు ఎస్పీ
అనకాపల్లి జిల్లా పోలీసు శాఖలో సిబ్బంది సంక్షేమానికి అత్యంత ప్రాధాన్యతనిస్తూ జిల్లా ఎస్పీ తుహిన్ సిన్హా, ఐపీఎస్ ఆలోచనతో ప్రారంభించిన ‘ఎస్పీ-సంపర్క్’ ఫోన్-ఇన్ కార్యక్రమం అనూహ్య స్పందనతో విజయవంతంగా కొనసాగుతోంది. క్షేత్రస్థాయిలో విధులు నిర్వహిస్తున్న కానిస్టేబుల్ నుంచి హోమ్ గార్డు వరకు ప్రతి ఒక్కరూ తమ సమస్యలను నేరుగా ఉన్నతాధికారుల దృష్టికి తీసుకువెళ్లేందుకు ఈ కార్యక్రమం ఒక వేదికగా నిలుస్తోంది. నాయకత్వానికి మరియు సిబ్బందికి మధ్య ఉన్న అంతరాన్ని తగ్గించడమే ఈ వినూత్న కార్యక్రమం ముఖ్య ఉద్దేశ్యం.
తాజాగా జిల్లా పోలీసు కార్యాలయంలో నిర్వహించిన ఈ కార్యక్రమంలో అదనపు ఎస్పీ ఎల్. మోహనరావు స్వయంగా పాల్గొని సిబ్బంది నుండి ఫోన్ ద్వారా వినతులను స్వీకరించారు. జిల్లా వ్యాప్తంగా వివిధ విభాగాల్లో పనిచేస్తున్న పోలీసులు 93469 12011 నంబర్ ద్వారా అదనపు ఎస్పీతో మాట్లాడారు. ఈ సందర్భంగా సిబ్బంది ప్రధానంగా తమ పోస్టింగ్స్, అంతర్గత బదిలీలు, సెలవుల మంజూరు, తమ కుటుంబ సభ్యుల ఆరోగ్య సమస్యలకు సంబంధించిన ఇబ్బందులను ఆయన దృష్టికి తీసుకువచ్చారు.
సిబ్బంది వ్యక్తం చేసిన ప్రతి సమస్యను సావధానంగా విన్న అదనపు ఎస్పీ, వాటి పరిష్కారం కోసం తక్షణ చర్యలు చేపట్టారు. ఫిర్యాదులను లోతుగా పరిశీలించి, ఒక నిర్దిష్ట గడువులోగా వాటిని పరిష్కరించాలని సంబంధిత విభాగాల అధికారులకు ఆదేశాలు జారీ చేశారు. సిబ్బంది తమ సమస్యల కోసం కార్యాలయాల చుట్టూ తిరగాల్సిన అవసరం లేకుండా పారదర్శకంగా, గోప్యంగా తమ గోడును వెళ్లబోసుకునే అవకాశం కల్పిస్తున్నామని ఆయన పేర్కొన్నారు.
ఈ ‘ఎస్పీ-సంపర్క్’ కార్యక్రమం ప్రతి శుక్రవారం ఉదయం 11 గంటల నుండి మధ్యాహ్నం 12 గంటల వరకు నిరంతరాయంగా నిర్వహించబడుతోంది. ప్రతి ఫిర్యాదును డిజిటల్ రిజిస్టర్లో నమోదు చేసి, ఆ సమస్య పూర్తిగా పరిష్కారం అయ్యే వరకు ఉన్నతాధికారులు పర్యవేక్షిస్తున్నారు. ఈ కార్యక్రమంలో ఇన్స్పెక్టర్లు బాల సూర్యారావు, లక్ష్మి, ఏవో సి.హెచ్. తిలక్ బాబు, ఆఫీస్ సూపరింటెండెంట్ ప్రతాప్ శేషయ్యతో పాటు ఇతర పోలీసు సిబ్బంది పాల్గొన్నారు.