మానవతా దృక్పథంతో ప్రజా సమస్యలను పరిష్కరించండి: అధికారులకు సీఎం చంద్రబాబు ఆదేశం

ప్రజల సమస్యల పరిష్కారంలో అధికారులు మానవతా దృక్పథంతో వ్యవహరించాలని ఆంధ్రప్రదేశ్ ముఖ్యమంత్రి నారా చంద్రబాబు నాయుడు సూచించారు. ప్రజా ఫిర్యాదుల పరిష్కార వ్యవస్థ (పీజీఆర్‌ఎస్) ద్వారా వచ్చే వినతులతో పాటు అన్ని రకాల ఫిర్యాదులను సానుభూతితో పరిశీలించి త్వరితగతిన పరిష్కరించాలని ఆయన ఆదేశించారు.

సోమవారం రాష్ట్ర సచివాలయంలోని రియల్ టైమ్ గవర్నెన్స్ సొసైటీ (ఆర్‌టీజీఎస్) కేంద్రంలో వివిధ శాఖల పనితీరుపై సమీక్ష నిర్వహించిన ముఖ్యమంత్రి, అధికారుల పనితీరులో సానుకూల మార్పులు తీసుకురావాల్సిన అవసరాన్ని నొక్కిచెప్పారు. ఫిర్యాదు చేసేందుకు ప్రభుత్వ కార్యాలయాలకు వచ్చే ప్రజలను గౌరవంగా, మర్యాదపూర్వకంగా చూడాలని సూచించిన ఆయన, అధికారులు తాము ఫిర్యాదుదారుల స్థానంలో ఉన్నట్లు భావించి సమస్యలను అర్థం చేసుకుని పరిష్కరించేందుకు కృషి చేయాలని చెప్పారు. ప్రజలకు ప్రభుత్వంపై సానుకూల అభిప్రాయం ఏర్పడేందుకు ఈ విధానం దోహదపడుతుందని పేర్కొన్నారు.

ఉద్యోగులు వినూత్న ఆలోచనలను ప్రోత్సహించాలని, వారి పనితీరు ఆధారంగా బాధ్యతలు అప్పగించే విధానాన్ని అమలు చేస్తామని సీఎం తెలిపారు. మానవ వనరులను సమర్థవంతంగా వినియోగించుకోవడం, పరిపాలనా సామర్థ్యాలను నిరంతరం పెంపొందించుకోవడం, మారుతున్న పరిస్థితులకు అనుగుణంగా పని విధానాలను మార్చుకోవడం అవసరమని చెప్పారు.

సాంకేతికత వల్ల పరిపాలనా ప్రక్రియలు మరింత సులభతరమయ్యాయని, ఫైళ్ల పరిష్కారం వేగవంతమైందని పేర్కొన్న చంద్రబాబు, సృజనాత్మక ఆలోచనలకు ప్రాధాన్యం ఇవ్వకపోతే వ్యవస్థలు నిరుపయోగంగా మారే ప్రమాదం ఉందని హెచ్చరించారు. పరిపాలనా సామర్థ్యాల పెంపు కోసం ఉద్యోగులు, అధికారులకు పాలన సంస్కరణలపై ప్రత్యేక శిక్షణ అందిస్తున్నట్లు తెలిపారు.

నకిలీ ప్రచారాలపై అప్రమత్తత

సామాజిక మాధ్యమాల్లో తప్పుడు ప్రచారం, అపోహలు వ్యాప్తి చెందుతున్న నేపథ్యంలో కొన్ని సంఘటనలకు రాజకీయ, కుల, మత రంగులు పులుముతూ వివాదాలు సృష్టించే ప్రయత్నాలు జరుగుతున్నాయని సీఎం ఆందోళన వ్యక్తం చేశారు. ఇటువంటి ప్రచారాన్ని అరికట్టేందుకు అధికారులు అప్రమత్తంగా వ్యవహరించాలని సూచించారు.

మానసిక ఆరోగ్య సమస్యలు, మాదకద్రవ్యాలు, గంజాయి వ్యసనాల కారణంగా కొందరు నేరాలకు పాల్పడుతున్నారని పేర్కొన్న ఆయన, 2019 నుంచి పెండింగ్‌లో ఉన్న పాత కేసులను గుర్తించి నిందితులను అరెస్టు చేస్తున్నట్లు వెల్లడించారు. నేరస్తులు ఎంతకాలమైనా శిక్ష నుంచి తప్పించుకోలేరని స్పష్టం చేసిన ముఖ్యమంత్రి, వాహనాల నంబర్ ప్లేట్ల నిబంధనలను కచ్చితంగా అమలు చేయాలని ఆదేశించారు.

రాష్ట్రంలో క్వాంటమ్ కంప్యూటర్ ప్రారంభానికి ముందుగానే క్వాంటమ్ పార్క్, సెమీకండక్టర్ పార్క్‌ల ఏర్పాటుపై దృష్టి సారించాలని అధికారులకు సూచించిన సీఎం, పచ్చదనం పెంపు, పరిశుభ్రత, నీటి భద్రత, భూగర్భ జలాల సంరక్షణ, నదుల కాలుష్య నియంత్రణ వంటి అంశాలపై ప్రత్యేక కార్యాచరణ చేపట్టాలని ఆదేశించారు.