సాయి సుదర్శన్‌ ధనాధన్.. గుజరాత్ ఘన విజయం

ఐపీఎల్ 2026లో భాగంగా ఆదివారం చెపాక్ వేదికగా జరిగిన పోరులో గుజరాత్ టైటాన్స్ అదరగొట్టింది. బౌలర్లు సెట్ చేసిన వేదికపై సాయి సుదర్శన్ మెరుపులు మెరిపించడంతో చెన్నై సూపర్ కింగ్స్‌పై టైటాన్స్ 8 వికెట్ల తేడాతో ఘన విజయం సాధించింది. ఈ గెలుపుతో పాయింట్ల పట్టికలో గుజరాత్ ఏడో స్థానం నుండి ఐదో స్థానానికి ఎగబాకింది.

తడబడ్డ చెన్నై.. నిలబడ్డ కెప్టెన్

టాస్ ఓడి తొలుత బ్యాటింగ్‌కు దిగిన చెన్నై సూపర్ కింగ్స్‌కు ఆదిలోనే చుక్కెదురైంది. పిచ్‌పై ఉన్న బౌన్స్‌ను అంచనా వేయడంలో చెన్నై బ్యాటర్లు పూర్తిగా విఫలమయ్యారు. మహమ్మద్ సిరాజ్ తన స్పెల్‌తో చెన్నైని వణికించాడు. సంజూ శాంసన్ (11) ఐపీఎల్‌లో 5000 పరుగుల మైలురాయిని అందుకున్నప్పటికీ, రబడ బౌలింగ్‌లో వెనుదిరిగాడు. అదే ఓవర్‌లో ఊర్విల్ పటేల్ (4), తర్వాత సిరాజ్ బౌలింగ్‌లో సర్ఫరాజ్ ఖాన్ (0) పెవిలియన్ చేరడంతో చెన్నై 28 పరుగులకే 3 వికెట్లు కోల్పోయి కష్టాల్లో పడింది.

ఒకవైపు వికెట్లు పడుతున్నా కెప్టెన్ రుతురాజ్ గైక్వాడ్ (60 బంతుల్లో 74 నాటౌట్; 6 ఫోర్లు, 4 సిక్సర్లు) పట్టుదలతో ఆడాడు. నెమ్మదిగా మొదలుపెట్టినా, చివర్లో సిక్సర్లతో విరుచుకపడి జట్టుకు 158 పరుగుల గౌరవప్రదమైన స్కోరు అందించాడు. శివం దూబేకు మూడుసార్లు లైఫ్ లభించినా దాన్ని భారీ స్కోరుగా మలచలేకపోయాడు.

సుదర్శన్ 'మాస్టర్ క్లాస్' ఇన్నింగ్స్

159 పరుగుల లక్ష్యంతో బరిలోకి దిగిన గుజరాత్ టైటాన్స్‌కు ఓపెనర్లు అదిరిపోయే ఆరంభాన్ని ఇచ్చారు. కెప్టెన్ గిల్ (33) దూకుడుగా ఆడుతూ పవర్‌ప్లేలోనే జట్టుకు గట్టి పునాది వేశాడు. గత మ్యాచ్‌లో సెంచరీ బాదిన ఫామ్‌ను కొనసాగిస్తూ సాయి సుదర్శన్ (46 బంతుల్లో 87) చెన్నై బౌలర్లపై విరుచుకపడ్డాడు. పిచ్ పరిస్థితులను చక్కగా అర్థం చేసుకున్న అతడు 7 భారీ సిక్సర్లతో స్కోరు బోర్డును పరిగెత్తించాడు. గిల్ ఔటైన తర్వాత జోస్ బట్లర్ (39 నాటౌట్)తో కలిసి సుదర్శన్ లక్ష్యాన్ని ఛేదించాడు. మరో 20 బంతులు మిగిలి ఉండగానే గుజరాత్ కేవలం రెండు వికెట్లు కోల్పోయి లక్ష్యాన్ని చేరుకుంది.

సంక్షిప్త స్కోర్లు:

చెన్నై సూపర్ కింగ్స్:

158/7 (20 ఓవర్లలో) - గైక్వాడ్ 74, రబడ 3/25, సిరాజ్ 1/21.

గుజరాత్ టైటాన్స్:

159/2 (16.4 ఓవర్లలో) - సాయి సుదర్శన్ 87, బట్లర్ 39, నూర్ అహ్మద్ 1/25.