సర్కార్ ఎక్స్ప్రెస్లో దొంగల బీభత్సం.. పోలీసులపై రాళ్లదాడి
ఆంధ్రప్రదేశ్లోని గుంటూరు జిల్లా పరిధిలో శనివారం అర్ధరాత్రి నుంచి ఆదివారం తెల్లవారుజామున మధ్య సర్కార్ ఎక్స్ప్రెస్లో దొంగతనానికి యత్నించిన ఘటన కలకలం రేపింది. బాపట్ల–అప్పికట్ల రైల్వే స్టేషన్ల మధ్య ఈ సంఘటన చోటుచేసుకున్నట్లు అధికారులు తెలిపారు.
పోలీసుల వివరాల ప్రకారం, రాత్రి వేళల్లో రైలులో ప్రయాణిస్తున్న ప్రయాణికులను లక్ష్యంగా చేసుకున్న దుండగులు ఎస్-3, ఎస్-6 బోగీల్లోకి ప్రవేశించి ప్రయాణికుల బ్యాగులను దొంగిలించి, మరి కొంతమంది ప్రయాణికుల సామాన్లను దోచుకుని పరారయ్యేందుకు యత్నించినట్లు సమాచారం. ఈ క్రమంలో ఓ మహిళా ప్రయాణికురాలి మెడలోని బంగారు గొలుసును లాక్కొనేందుకు దుండగులు ప్రయత్నించగా, ఆమె వెంటనే అప్రమత్తమై గట్టిగా కేకలు వేయడంతో పరిస్థితి ఉద్రిక్తంగా మారింది. ప్రయాణికుల నుంచి సమాచారం అందుకున్న ప్రభుత్వ రైల్వే పోలీసు (జీఆర్పీ) సిబ్బంది వెంటనే ఘటనాస్థలికి చేరుకుని నిందితులను అదుపులోకి తీసుకునేందుకు ప్రయత్నించారు.
అయితే, దుండగులు పోలీసులకు తిరగబడి రాళ్లతో దాడికి పాల్పడినట్లు అధికారులు వెల్లడించారు. నిందితులు తప్పించుకోకుండా అడ్డుకునేందుకు, పరిస్థితిని అదుపులోకి తీసుకురావడానికి పోలీసులు గాల్లోకి హెచ్చరిస్తూ కాల్పులు జరిపినట్లు తెలిపారు. అయినప్పటికీ, నిందితులు అక్కడి నుంచి పరారయ్యారు. ఘటన అనంతరం ప్రత్యేక బృందాలు గాలింపు చర్యలు చేపట్టి నిందితుల కోసం పరిసర ప్రాంతాల్లో విస్తృతంగా తనిఖీలు నిర్వహిస్తున్నాయి.
దర్యాప్తులో భాగంగా, ఘటనా స్థలం పరిసరాల్లో దొంగలు వదిలివెళ్లిన రెండు బ్యాగులను పోలీసులు స్వాధీనం చేసుకున్నారు. ఈ ఘటనపై జీఆర్పీ డీఎస్పీ అక్కేశ్వరరావు మాట్లాడుతూ.. దోపిడీ ప్రయత్నానికి పాల్పడిన దొంగలను గుర్తించి, వారిని అరెస్ట్ చేయడానికి ప్రత్యేక బృందాలతో గాలింపు చర్యలు ముమ్మరం చేశామని తెలిపారు. స్వాధీనం చేసుకున్న బ్యాగులను సీజ్ చేశామని, తదుపరి విచారణ కొనసాగుతోందని ఆయన వెల్లడించారు. రైల్వే పోలీసులు నిందితుల కోసం ఆధారాలను సేకరిస్తూ దర్యాప్తును వేగవంతం చేశారు.