ముంబైపై పంజాబ్ కింగ్స్ ఘన విజయం

ఐపీఎల్‌లో పంజాబ్ కింగ్స్ తమ జైత్రయాత్రను కొనసాగిస్తూ ముంబై ఇండియన్స్‌పై ఘనవిజయం సాధించింది. గురువారం వాంఖడే వేదికగా జరిగిన పోరులో పంజాబ్ 7 వికెట్ల తేడాతో ముంబైని మట్టికరిపించింది. ముంబై బ్యాటర్ క్వింటన్ డికాక్ (112 నాటౌట్) మెరుపు సెంచరీతో అదరగొట్టినప్పటికీ, పంజాబ్ బ్యాటర్ల ధాటికి ముంబై బౌలర్లు చేతులెత్తేశారు. ఈ ఓటమితో ముంబై ఇండియన్స్ ఈ సీజన్‌లో వరుసగా నాలుగో పరాజయాన్ని మూటగట్టుకుంది.

ఆదుకున్న డికాక్ - ధీర్ జోడీ

టాస్ ఓడి బ్యాటింగ్‌కు దిగిన ముంబైకి ఆరంభంలోనే గట్టి షాక్‌లు తగిలాయి. పంజాబ్ పేసర్ అర్ష్‌దీప్ సింగ్ ధాటికి మూడు ఓవర్లకే ముంబై 15 పరుగులకే 2 వికెట్లు కోల్పోయి కష్టాల్లో పడింది. ఓపెనర్ ర్యాన్ రికెల్టన్ (2) తక్కువ స్కోరుకే వెనుదిరగగా, భారత టీ20 కెప్టెన్ సూర్యకుమార్ యాదవ్ గోల్డెన్ డక్ (0)గా వెనుదిరిగి అభిమానులను నిరాశపరిచాడు. ఈ దశలో జట్టును ఆదుకునే బాధ్యతను వెటరన్ బ్యాటర్ క్వింటన్ డికాక్, యువ ఆటగాడు నమన్ ధీర్ (50) భుజానికెత్తుకున్నారు. వీరిద్దరూ మూడో వికెట్‌కు 68 బంతుల్లో 132 పరుగుల భారీ భాగస్వామ్యాన్ని నెలకొల్పారు. డికాక్ కేవలం 60 బంతుల్లో 8 ఫోర్లు, 7 సిక్సర్లతో అజేయంగా 112 పరుగులు చేసి జట్టుకు గౌరవప్రదమైన స్కోరును అందించాడు. నమన్ ధీర్ 3 ఫోర్లు, 3 సిక్సర్లతో అర్ధసెంచరీ పూర్తి చేసుకున్నాడు. నిర్ణీత 20 ఓవర్లలో ముంబై 6 వికెట్ల నష్టానికి 195 పరుగులు చేసింది. పంజాబ్ బౌలర్లలో అర్ష్‌దీప్ సింగ్ 22 పరుగులకే 3 వికెట్లు తీసి అత్యుత్తమ ప్రదర్శన కనబరిచాడు.

పంజాబ్ విధ్వంసం

196 పరుగుల లక్ష్యంతో బరిలోకి దిగిన పంజాబ్ కింగ్స్ ఆరంభం నుంచే విరుచుకుపడింది. దీపక్ చాహర్ వేసిన మొదటి ఓవర్లోనే 21 పరుగులు రాబట్టి పంజాబ్ తన ఉద్దేశ్యాన్ని స్పష్టం చేసింది. అయితే పీఎస్ గజన్‌ఫర్ ఒకే ఓవర్లో ప్రియాంశ్ ఆర్య (15), కూపర్ కానలీ (17)లను అవుట్ చేసి ముంబైకి బ్రేక్ ఇచ్చాడు. కానీ ఆ సంతోషం ముంబైకి ఎంతోసేపు నిలవలేదు. స్టార్ పేసర్ జస్ప్రీత్ బుమ్రా చేతిలో చిక్కిన క్యాచ్‌ను జారవిడవడం ప్రభ్‌సిమ్రన్ సింగ్‌కు వరమైంది. ఆ అవకాశాన్ని అందిపుచ్చుకున్న ప్రభ్‌సిమ్రన్ 31 బంతుల్లోనే 11 ఫోర్లు, 2 సిక్సర్లతో 80 పరుగులు చేసి అజేయంగా నిలిచాడు.

కెప్టెన్ ఇన్నింగ్స్‌తో మెరిసిన అయ్యర్

మరోవైపు పంజాబ్ కెప్టెన్ శ్రేయస్ అయ్యర్ తన హోమ్ గ్రౌండ్ వాంఖడే స్టేడియంలో అద్భుత ఫామ్‌ను కొనసాగించాడు. వరుసగా మూడో అర్ధసెంచరీ బాదిన అయ్యర్.. 35 బంతుల్లో 5 ఫోర్లు, 4 సిక్సర్లతో 66 పరుగులు చేశాడు. ప్రభ్‌సిమ్రన్, అయ్యర్ జోడీ కేవలం 67 బంతుల్లోనే 139 పరుగుల భాగస్వామ్యాన్ని నెలకొల్పి ముంబై విజయావకాశాలను దెబ్బతీశారు. శార్దూల్ ఠాకూర్ బౌలింగ్‌లో అయ్యర్ అవుట్ అయినప్పటికీ, అప్పటికే పంజాబ్ విజయం ఖాయమైపోయింది. పంజాబ్ కింగ్స్ ఇంకా 21 బంతులు మిగిలి ఉండగానే 3 వికెట్లు కోల్పోయి 198 పరుగులు చేసి లక్ష్యాన్ని ఛేదించింది. ముంబై బౌలర్లలో గజన్‌ఫర్ 2 వికెట్లు తీయగా, బుమ్రా (0/41) సహా ఇతర బౌలర్లు విఫలమయ్యారు.