పర్యాటక కేంద్రంగా పులిగుండాల ఎకో-టూరిజం ప్రాజెక్ట్: డిప్యూటీ సీఎం భట్టి విక్రమార్క
తెలంగాణ రాష్ట్రంలోని ఖమ్మం జిల్లా మారుమూల ప్రాంతాల సహజ సౌందర్యాన్ని ప్రపంచానికి పరిచయం చేస్తూ, ఒక నూతన పర్యాటక శోభ సంతరించుకుంది. జిల్లాలోని పులిగుండాల ఎకో-టూరిజం ప్రాజెక్టును రాష్ట్ర ఉప ముఖ్యమంత్రి మల్లు భట్టి విక్రమార్క బుధవారం ఘనంగా ప్రారంభించారు. పర్యావరణానికి ఎలాంటి హాని కలగకుండా, ప్రకృతి ఒడిలో పర్యాటకులకు సరికొత్త అనుభూతిని అందించడమే ఈ ప్రాజెక్టు ముఖ్య ఉద్దేశం.
ప్రజా ప్రభుత్వం రాష్ట్ర ప్రకృతి సంపదను పర్యాటక రంగానికి ఆభరణంగా మార్చాలని సంకల్పించిందని డిప్యూటీ సీఎం తెలిపారు. ఈ పర్యటనలో ఆయన పర్యాటకుల కోసం ఏర్పాటు చేసిన పలు వసతులను ప్రారంభించారు. కాటేజీలు, బోటింగ్ సౌకర్యం, సహజ జలపాతాలు, జంగిల్ సఫారీ వంటి ఆకర్షణలను ప్రారంభించారు. ఈ ప్రాజెక్టు, త్వరలోనే దేశవ్యాప్తంగా గుర్తింపు పొందిన పర్యాటక కేంద్రంగా మారుతుందని డిప్యూటీ సీఎం ధీమా వ్యక్తం చేశారు.
ఈ సందర్భంగా నిర్వహించిన సభలో మాట్లాడిన ఆయన, తెలంగాణ సహజ సౌందర్యాన్ని ప్రపంచానికి పరిచయం చేయడం ప్రభుత్వ లక్ష్యమని తెలిపారు. రాష్ట్ర బడ్జెట్లో ఎకో-టూరిజం అభివృద్ధికి ప్రాధాన్యత ఇచ్చి, ఖమ్మం జిల్లాలోని కనకగిరి ప్రాంతాన్ని ప్రముఖ పర్యాటక కేంద్రంగా అభివృద్ధి చేయడానికి నిధులు కేటాయించినట్లు వెల్లడించారు. పులిగుండాల అభివృద్ధి కోసం మొత్తం రూ. 4 కోట్లు కేటాయించనున్నట్లు డిప్యూటీ సీఎం ప్రకటించారు. ఇందులో రూ. 2 కోట్లు గ్రీన్ ఫండ్స్ నుంచి, మిగతా రూ.2 కోట్లు కార్పొరేట్ సోషల్ రెస్పాన్సిబిలిటీ (సీఎస్ఆర్) నిధుల ద్వారా సమకూరుస్తామని తెలిపారు. కనకగిరి వరకు డబుల్ రోడ్ నిర్మాణానికి వెంటనే ప్రతిపాదనలు సిద్ధం చేయాలని అధికారులకు ఆదేశాలు జారీ చేశారు.
పులిగుండాల ప్రాజెక్ట్తో పాటు కనకగిరి కొండలు, కల్లూరు కొండలను సమగ్రంగా అభివృద్ధి చేసి రాష్ట్రంలోనే కాక దేశవ్యాప్తంగా గుర్తింపు పొందే ప్రముఖ పర్యాటక వలయంగా తీర్చిదిద్దుతామని భట్టి విక్రమార్క హామీ ఇచ్చారు. అభివృద్ధి పనులు ప్రకృతికి భంగం కలగకుండా, సహజ వాతావరణాన్ని కాపాడుతూ చేపట్టాలని ఆయన తెలిపారు.
ఈ ప్రాజెక్ట్ ద్వారా స్థానిక యువతకు ఉపాధి అవకాశాలు పెరుగుతాయని, హోటళ్లు, చిన్న వ్యాపారాలు, గ్రామీణ ఆర్థిక వ్యవస్థకు ఊతమిస్తుందని పేర్కొన్నారు. పర్యాటక రంగం అభివృద్ధి చెందడం ద్వారా ప్రాంతీయ అభివృద్ధికి కూడా దోహదం అవుతుందని అన్నారు. ఈ కార్యక్రమంలో రెవెన్యూ మంత్రి పొంగులేటి శ్రీనివాస్ రెడ్డి, సత్తుపల్లి ఎమ్మెల్యే మట్టా రాగమయీ దయానంద్, వైరా ఎమ్మెల్యే మాలోత్ రామదాస్ నాయక్, ఖమ్మం కలెక్టర్ అనుదీప్ దురిశెట్టి తదితరులు పాల్గొన్నారు.