ఘాజీపూర్ ఘటనపై రాజకీయ వాగ్వాదం

ఉత్తరప్రదేశ్‌లోని ఘాజీపూర్ జిల్లాలో బాలిక మృతదేహం లభ్యమైన ఘటన రాజకీయ దుమారం రేపుతోంది. సమాజ్‌వాది పార్టీ అధినేత అఖిలేశ్‌ యాదవ్‌ రాష్ట్ర ప్రభుత్వంపై తీవ్ర విమర్శలు చేస్తూ, ఈ కేసును హత్రాస్ కేసుతో పోల్చారు. మరోవైపు భారతీయ జనతా పార్టీ ఈ ఆరోపణలను ‘విభజన రాజకీయాలు’గా ఖండించింది. ఈ నెల ప్రారంభంలో ఘాజీపూర్ జిల్లాలోని కరండా పోలీస్ స్టేషన్ పరిధిలో గంగా నదిపై ఉన్న వంతెన కింద బాలిక మృతదేహం లభ్యమైంది. ఈ ఘటనపై స్పందించిన అఖిలేశ్ యాదవ్, బాధిత కుటుంబం ప్రకటనలు మారుతున్నాయని ఆరోపిస్తూ, వాస్తవాలను దాచే ప్రయత్నం జరుగుతోందన్నారు. సోషల్ మీడియాలో బాలిక తండ్రి మాట్లాడిన వీడియోను పంచుకున్న ఆయన, గ్రామ సర్పంచ్ బెదిరించారని, సమాజ్‌వాది పార్టీ ప్రతినిధులు వెళ్లినప్పుడు రాళ్లదాడి జరిగిందని వీడియోలో పేర్కొన్నారని చెప్పారు. పోలీసు అధికారి ఒకరు గాయపడ్డారని కూడా ఆరోపించారు. అయితే శనివారం మీడియాతో మాట్లాడిన బాలిక తండ్రి, రాజకీయ నేతలు తన ఇంటికి రావద్దని, రాజకీయ ప్రయోజనాల కోసం ఈ ఘటనను వాడుకోవద్దని కోరారు. జిల్లా అధికారులు నిందితులపై కఠిన చర్యలు తీసుకుంటామని హామీ ఇచ్చారని, పోలీసు దర్యాప్తుపై సంతృప్తిగా ఉన్నానని తెలిపారు.

ఈ నేపథ్యంలో అఖిలేశ్ యాదవ్ పలు ప్రశ్నలు లేవనెత్తారు. కేసులో ఎఫ్‌ఐఆర్‌‌ నమోదు ఆలస్యానికి కారణం ఏమిటి? ప్రకటనలు ఎందుకు మారాయి? కుటుంబంపై ఒత్తిడి ఎందుకు ఉందని ప్రశ్నించారు. పోస్ట్‌మార్టం నివేదికపై కూడా సందేహాలు వ్యక్తం చేశారు. గ్రామంలో నిజం అందరికీ తెలుసు. నివేదిక ఏం చెబుతున్నా, వాస్తవ పరిస్థితి వేరేలా ఉందని ఆయన అన్నారు. ఈ ఘటనలో కూడా హత్రాస్ కేసులాగే పేద, అణగారిన వర్గాల కుటుంబాలు బాధితులై, ప్రభావం చూపే వ్యక్తులు నిందితులుగా ఉన్నారని ఆయన ఆరోపించారు.

విభజన రాజకీయాలు చేస్తున్నారు

ఇదిలా ఉండగా, బీజేపీ నాయకుడు నవీన్‌ శ్రీవాస్తవ స్పందిస్తూ ప్రభుత్వంపై, పోస్ట్‌మార్టం నివేదికపై, బాధిత తండ్రిపై కూడా విశ్వాసం లేకుండా కేవలం విభజన రాజకీయాలు చేస్తున్నారని విమర్శించారు. పోలీసుల వివరాల ప్రకారం, బాలిక ఏప్రిల్ 14 రాత్రి కనిపించకుండా పోయి, మరుసటి రోజు ఉదయం ఇంటి నుంచి సుమారు 3 కిలోమీటర్ల దూరంలో గంగానదిలో మృతదేహంగా లభించింది. కుటుంబ సభ్యుల ఫిర్యాదు మేరకు కేసు నమోదు చేసి, ప్రధాన నిందితుడిని అరెస్టు చేసినట్లు అధికారులు తెలిపారు. సీనియర్ పోలీస్ అధికారి ప్రకారం బాధిత కుటుంబాన్ని ఉన్నతాధికారులు కలిసి, వేగవంతమైన విచారణ చేపట్టి నిందితులకు కఠిన శిక్షలు విధించాలని వారు కోరారు. గ్రామంలో కొంతమంది బయటి వ్యక్తులు అశాంతి సృష్టించేందుకు ప్రయత్నించినట్లు కూడా తెలిపారు. మొత్తంగా, ఈ ఘటనపై రాజకీయ ఆరోపణలు, ప్రత్యారోపణలతో పరిస్థితి ఉద్రిక్తంగా మారింది.