బండి సంజయ్ కుమారుడి కేసులో బాధితురాలి వివరాలు వెల్లడించిన వారిపై పోలీసుల ఉక్కుపాదం!
కేంద్ర మంత్రి బండి సంజయ్ కుమారుడిపై నమోదైన పోక్సో కేసులో బాధితురాలు, ఆమె తల్లిదండ్రుల వివరాలను సామాజిక మాధ్యమాల్లో వెల్లడించిన వారిపై హైదరాబాద్ పోలీసులు కఠిన చర్యలు చేపట్టారు. నిబంధనలకు విరుద్ధంగా బాధితురాలి ఫోటోలు, వీడియోలు, ఇతర వ్యక్తిగత సమాచారాన్ని షేర్ చేసిన సోషల్ మీడియా వినియోగదారులపై పేట్-బషీరాబాద్ పోలీస్ స్టేషన్లో కేసులు నమోదయ్యాయి.
మేడ్చల్-మల్కాజిగిరి జిల్లా చైల్డ్ వెల్ఫేర్ కమిటీ ఛైర్పర్సన్ ఇచ్చిన ఫిర్యాదు మేరకు ఈ చర్యలు తీసుకున్నట్లు పోలీసులు తెలిపారు. నిందితులపై జువైనల్ జస్టిస్ యాక్ట్, పోక్సో చట్టంలోని సంబంధిత సెక్షన్ల కింద కేసులు నమోదు చేశారు. బాధితురాలి గుర్తింపును బయటపెట్టడం చట్టరీత్యా నేరమని అధికారులు స్పష్టం చేశారు.
ఈ కేసులో ప్రమేయం ఉన్న సోషల్ మీడియా అకౌంట్లు, ఐడీలు, సంబంధిత యుఆర్ఎల్ లను పోలీసులు ఇప్పటికే గుర్తించారు. ఈ ఖాతాలను నిర్వహిస్తున్న వ్యక్తులను పట్టుకునేందుకు ఆ వివరాలను సంబంధిత సాంకేతిక విభాగాలకు పంపినట్లు పేట్-బషీరాబాద్ ఎస్హెచ్ఓ వెల్లడించారు. బాధ్యులను త్వరలోనే గుర్తించి న్యాయస్థానం ముందు ప్రవేశపెడతామని పేర్కొన్నారు.
పోక్సో కేసుల్లో బాధితులైన బాలికల లేదా వారి కుటుంబ సభ్యుల వివరాలను బహిర్గతం చేయడం వల్ల వారు తీవ్రమైన మానసిక వేదనకు గురవుతారని పోలీసులు హెచ్చరించారు. ఇలాంటి చర్యలు బాధితుల గోప్యతను దెబ్బతీయడమే కాకుండా, వారి భవిష్యత్తుపై తీవ్ర ప్రభావం చూపుతాయని, అందుకే చట్టం దీనిని తీవ్రమైన ఉల్లంఘనగా పరిగణిస్తుందని వారు వివరించారు.
గత వారం కేంద్ర మంత్రి బండి సంజయ్ కుమారుడిపై ఒక మైనర్ బాలికను వేధించారనే ఆరోపణలతో పోక్సో కేసు నమోదైన సంగతి తెలిసిందే. అయితే ఈ ఆరోపణలను నిందితుడు తోసిపుచ్చారు. సదరు బాలిక, ఆమె తల్లిదండ్రులు తనను బెదిరించి, డబ్బులు వసూలు చేసేందుకు ప్రయత్నిస్తున్నారని ఆయన ఎదురు ఫిర్యాదు చేశారు.
ప్రస్తుతం ఈ రెండు అంశాలపై పోలీసులు లోతైన విచారణ జరుపుతున్నారు. అయితే కేసు విచారణలో ఉన్న సమయంలో సోషల్ మీడియాలో జరుగుతున్న తప్పుడు ప్రచారాలు, బాధితుల గుర్తింపును వెల్లడించే పోస్టులపై పోలీసులు నిఘా ఉంచారు. చట్టాన్ని అతిక్రమించి పోస్టులు పెట్టే ఎవరినైనా వదిలిపెట్టబోమని, కఠిన చర్యలు తప్పవని పోలీసులు పత్రికా ప్రకటన ద్వారా హెచ్చరించారు.