పాకిస్తాన్ను మళ్లీ ఎఫ్ఏటీఎఫ్ ‘గ్రే లిస్ట్’లోకి చేర్చాలి: ఎంపీ అసదుద్దీన్
మనీ లాండరింగ్, ఉగ్రవాద నిధుల సరఫరాను అడ్డుకునే అంతర్జాతీయ సంస్థ అయిన 'ఫైనాన్షియల్ యాక్షన్ టాస్క్ ఫోర్స్' (ఎఫ్ఏటీఎఫ్) లో పాకిస్తాన్ను మళ్లీ "గ్రే లిస్ట్" లోకి చేర్చాలని ఏఐఎంఐఎం అధినేత, హైదరాబాద్ ఎంపీ అసదుద్దీన్ ఓవైసీ శనివారం ప్రధానమంత్రి నరేంద్ర మోడీ నేతృత్వంలోని ఎన్డీయే ప్రభుత్వాన్ని డిమాండ్ చేశారు.
ఈ మేరకు ఆయన సామాజిక మాధ్యమం ఎక్స్ (ట్విట్టర్) లో ఒక సుదీర్ఘమైన పోస్ట్ను పంచుకున్నారు. ఎఫ్ఏటీఎఫ్ ఉపాధ్యక్షుడిగా ఎన్నికైన మొదటి భారతీయుడిగా కేంద్ర సాంస్కృతిక శాఖ కార్యదర్శి వివేక్ అగర్వాల్ రికార్డు సృష్టించారని ఓవైసీ పేర్కొన్నారు. ఈ నేపథ్యంలో మోడీ ప్రభుత్వం వెంటనే చొరవ తీసుకుని, పాకిస్తాన్ను తిరిగి గ్రే లిస్ట్లో పెట్టేలా ఒత్తిడి తీసుకురావాలని ఆయన సూచించారు.
ఇటీవల పహల్గామ్ ఉగ్రదాడికి బాధ్యత వహించిన లష్కరే తోయిబా అనుబంధ సంస్థ అయిన 'ది రెసిస్టెన్స్ ఫోర్స్స (టీఆర్ఎఫ్) ను అమెరికా ప్రపంచ ఉగ్రవాద సంస్థగా ప్రకటించింది. అయితే, కేవలం అమెరికా జాబితాలో చేరిస్తే సరిపోదని, ఐక్యరాజ్యసమితి కూడా టీఆర్ఎఫ్ ను ఉగ్రవాద సంస్థగా గుర్తించాల్సిన అవసరం ఉందని ఓవైసీ అభిప్రాయపడ్డారు. భారత ప్రభుత్వం పాకిస్తాన్కు చెందిన గూఢచార సంస్థ ఐఎస్ఐ (ఐఎస్ఐ) ని కూడా ఈ జాబితాలో చేర్చడానికి గట్టి ప్రయత్నాలు చేయాలన్నారు. 2025 నవంబర్లో జరిగిన ఎర్రకోట ఆత్మాహుతి పేలుడు ఘటనా ఉదంతాన్ని మనం ఈ సందర్భంగా మర్చిపోకూడదని ఆయన గుర్తుచేశారు.
ఇటీవల పారిస్లోని ఎఫ్ఏటీఎఫ్ ప్రధాన కార్యాలయంలో జరిగిన ప్లీనరీ సమావేశంలో కేంద్ర సాంస్కృతిక శాఖ కార్యదర్శి వివేక్ అగర్వాల్ ఉపాధ్యక్షుడిగా ఎన్నికయ్యారు. 2010 నుంచి ఎఫ్ఏటీఎఫ్లో సభ్యత్వం కలిగిన భారత్కు ఈ కీలక పదవి తొలిసారిగా దక్కింది. ఉగ్రవాదానికి నిధులు సమకూర్చడం, మనీ లాండరింగ్ వంటి అక్రమాలను అరికట్టడంలో విఫలమయ్యే దేశాలను ఎఫ్ఏటీఎఫ్ తన ‘గ్రే లిస్ట్’లో చేర్చి పర్యవేక్షిస్తుంది. ఈ క్రమంలోనే, భారత దేశానికి దక్కిన ఈ కీలక పదవిని ఉపయోగించుకుని పాకిస్తాన్పై గట్టి చర్యలు తీసుకోవాలని ఓవైసీ కోరారు.
పాకిస్తాన్ 2018 నుంచి 2022 వరకు ఎఫ్ఏటీఎఫ్ గ్రే లిస్టులో ఉంది. ఉగ్రవాద నిధుల నియంత్రణకు సంబంధించి పలు షరతులను అమలు చేసిన తర్వాత 2022లో ఆ దేశాన్ని గ్రే లిస్టు నుంచి తొలగించారు.