సౌదీ అరేబియాలో ఎన్ఎస్ఏ అజిత్ దోవల్ పర్యటన
భారత జాతీయ భద్రతా సలహాదారు అజిత్ దోవల్ సౌదీ అరేబియా పర్యటన సందర్భంగా అక్కడి ఉన్నత స్థాయి నాయకులతో కీలక సమావేశాలు నిర్వహించారు. ఈ సమావేశాల్లో భారత్-సౌదీ ద్వైపాక్షిక సంబంధాలను మరింత బలోపేతం చేయడం, పశ్చిమ ఆసియాలో నెలకొన్న తాజా ప్రాంతీయ పరిస్థితులు, అలాగే పరస్పర ప్రయోజనాలకు సంబంధించిన అంశాలపై విస్తృతంగా చర్చించినట్లు సమాచారం.
ఆదివారం రియాద్కు చేరుకున్న దోవల్కు రియాద్ విమానాశ్రయంలో భారత రాయబారి సుహేల్ ఖాన్, సౌదీ అరేబియా రాజకీయ వ్యవహారాల ఉప మంత్రి సౌద్ అల్-సాతి ఘన స్వాగతం పలికారు. అనంతరం దోవల్ తన పర్యటనలో భాగంగా సౌదీ విదేశాంగ మంత్రి ఫైసల్ బిన్ ఫర్హాన్, ఇంధన శాఖ మంత్రి అబ్దుల్ అజీజ్ బిన్ సల్మాన్, సౌదీ జాతీయ భద్రతా సలహాదారు ముసాయెద్ అల్-ఐబాన్లతో వేర్వేరుగా సమావేశమయ్యారు.
ఈ చర్చల్లో భారత్, సౌదీ మధ్య వ్యూహాత్మక భాగస్వామ్యాన్ని మరింతగా విస్తరించడం, భద్రత, ఇంధన సహకారం, ఆర్థిక భాగస్వామ్యం వంటి కీలక రంగాలపై దృష్టి సారించారు. ముఖ్యంగా పశ్చిమ ఆసియాలో కొనసాగుతున్న ఉద్రిక్త పరిస్థితులు, భద్రతా సవాళ్లు, శాంతి స్థాపనకు తీసుకోవాల్సిన చర్యలపై అభిప్రాయాలను పంచుకున్నట్లు భారత రాయబార కార్యాలయం వెల్లడించింది.
ఇటీవల అమెరికా, ఇరాన్ మధ్య సంబంధాలు ఉద్రిక్తంగా మారిన నేపథ్యంలో, ఈ ప్రాంతంలో శాంతి స్థిరత్వం సాధించేందుకు జరుగుతున్న చర్చల ప్రాధాన్యం కూడా ఈ సమావేశాల్లో ప్రస్తావనకు వచ్చినట్లు తెలుస్తోంది. ముఖ్యంగా పాకిస్తాన్లో అమెరికా–ఇరాన్ మధ్య రెండో దశ చర్చలు జరగనున్న అవకాశాల నేపథ్యంలో, ప్రాంతీయ పరిణామాలపై భారత్, సౌదీ అరేబియా సమన్వయం కొనసాగించడం అవసరమని భావిస్తున్నారు.
గత ఏప్రిల్ 11, 12 తేదీల్లో పాకిస్తాన్లో జరిగిన అమెరికా–ఇరాన్ తొలి విడత చర్చలు ఎలాంటి ఒప్పందం లేకుండానే ముగిశాయి. ఈ నేపథ్యంలో దోవల్ పర్యటనకు ప్రత్యేక ప్రాధాన్యం ఏర్పడింది. ఈ పర్యటన భారత్–సౌదీ సంబంధాలను మరింత బలోపేతం చేయడంతో పాటు, పశ్చిమ ఆసియాలో శాంతి, స్థిరత్వం సాధనకు రెండు దేశాలు కలిసి పనిచేయాలనే సంకల్పాన్ని ప్రతిబింబిస్తోందని విశ్లేషకులు భావిస్తున్నారు.