జపాన్‌లో భారీ భూకంపం.. సునామీ హెచ్చరికలు జారీ!

జపాన్‌లో ప్రకృతి మరోసారి కన్నెర్రజేసింది. సోమవారం సాయంత్రం ఉత్తర, ఈశాన్య జపాన్ తీర ప్రాంతాల్లో శక్తివంతమైన భూకంపం సంభవించింది. రిక్టర్ స్కేలుపై దీని తీవ్రత 7.5గా నమోదైనట్లు జపాన్ వాతావరణ సంస్థ వెల్లడించింది. భూకంపం ధాటికి సముద్రపు అలలు ఉవ్వెత్తున ఎగిసిపడుతుండటంతో అధికారులు తీర ప్రాంతాలకు సునామీ హెచ్చరికలు జారీ చేశారు. ముఖ్యంగా ఇవాటే, అమోరి, హక్కైడో ప్రాంతాల్లో 3 మీటర్ల ఎత్తు వరకు అలలు వచ్చే ప్రమాదం ఉందని హెచ్చరించడంతో ప్రజలు భయాందోళనలకు గురవుతున్నారు.

సముద్ర గర్భంలో ప్రకంపనలు

స్థానిక కాలమానం ప్రకారం సోమవారం సాయంత్రం 4:53 గంటలకు ఈ భూకంపం సంభవించింది. సముద్ర మట్టానికి సుమారు 10 కిలోమీటర్ల లోతులో భూమి కంపించినట్లు అధికారులు గుర్తించారు. తొలుత దీని తీవ్రత 7.4గా ఉన్నప్పటికీ, తర్వాతి విశ్లేషణలో అది 7.5గా తేలింది. భూకంపం సంభవించిన కొద్దిసేపటికే ఇవాటే ప్రిఫెక్చర్‌లోని కుజి పోర్ట్ వద్ద సుమారు 80 సెంటీమీటర్ల ఎత్తులో సునామీ అలలు కనిపించాయి. మరికొన్ని ప్రాంతాల్లో 40 సెంటీమీటర్ల మేర అలలు తీరాన్ని తాకాయి.

యుద్ధప్రాతిపదికన తరలింపు ప్రక్రియ

భూకంప తీవ్రత దృష్ట్యా జపాన్ ప్రధాని సనా తకైచి తక్షణమే స్పందించారు. తీర ప్రాంతాల్లో ఉన్న ప్రజలు ఏమాత్రం ఆలస్యం చేయకుండా ఎత్తైన ప్రాంతాలకు చేరుకోవాలని ఆమె విజ్ఞప్తి చేశారు. ఇవాటే సహా నాలుగు ఉత్తర ప్రిఫెక్చర్లలో సుమారు 1.28 లక్షల మందికి తరలింపు ఆదేశాలు జారీ అయ్యాయి. టోక్యో - షిన్ అమోరి మధ్య నడిచే 'తోహోకు షింకన్సెన్' బుల్లెట్ రైలు సర్వీసులను జెఆర్ ఈస్ట్ నిలిపివేసింది. టీవీ ఛానళ్లలో నిరంతరం హెచ్చరికలు జారీ చేస్తూ, ప్రజలను నదులు, తీరాలకు దూరంగా ఉండాలని సూచించారు.

మెగా భూకంపం ముప్పు?

తాజా భూకంపం నేపథ్యంలో జపాన్ ప్రభుత్వం మరో కీలక హెచ్చరిక జారీ చేసింది. ఉత్తర జపాన్ తీరంలోని చిషిమా ట్రెంచ్ వద్ద రాబోయే వారం రోజుల్లో మరో భారీ 'మెగా భూకంపం' సంభవించే అవకాశం 1 శాతం మేర ఉందని కేబినెట్ కార్యాలయం తెలిపింది. ఇది కేవలం హెచ్చరిక మాత్రమేనని, ప్రజలు నిత్యావసరాలు, అత్యవసర కిట్‌లతో సిద్ధంగా ఉండాలని సూచించింది. గతేడాది డిసెంబర్‌లో కూడా ఇలాగే 7.5 తీవ్రతతో భూకంపం సంభవించిన విషయాన్ని అధికారులు గుర్తు చేస్తున్నారు.

క్షేమంగా అణు విద్యుత్ కేంద్రాలు

2011 నాటి చేదు అనుభవాల దృష్ట్యా అణు విద్యుత్ కేంద్రాల భద్రతపై ఆందోళన వ్యక్తమైంది. అయితే అమోరిలోని హిగాషిడోరి, మియాగిలోని ఒనాగావా ప్లాంట్లతో పాటు.. గతంలో దెబ్బతిన్న ఫుకుషిమా దైచీ, దైని కేంద్రాల్లో ఎటువంటి అసాధారణ పరిస్థితులు తలెత్తలేదని ప్లాంట్ నిర్వాహకులు స్పష్టం చేశారు. ఇప్పటివరకు ఎటువంటి భారీ ఆస్తి, ప్రాణ నష్టం సంభవించినట్లు సమాచారం అందలేదు.

గుర్తుకొస్తున్న 2011 నాటి విషాదం

సరిగ్గా 15 ఏళ్ల క్రితం (మార్చి 11, 2011) జపాన్‌ను అతలాకుతలం చేసిన 9.0 తీవ్రత భూకంపం, సునామీ చేదు జ్ఞాపకాలు ఈ ఘటనతో మళ్ళీ మెదిలాయి. ఆనాడు 22,000 మందికి పైగా ప్రాణాలు కోల్పోగా, ఫుకుషిమా రేడియేషన్ వల్ల వేలాది మంది నిరాశ్రయులయ్యారు. నేటికీ సుమారు 26,000 మంది తమ సొంత ఊళ్లకు చేరుకోలేకపోయారు. ప్రస్తుతానికి పసిఫిక్ సునామీ హెచ్చరికల కేంద్రం 'ప్రమాదం తప్పిందని' ప్రకటించినప్పటికీ, జపాన్ అధికారులు మాత్రం మరో వారం పాటు ప్రకంపనలు వచ్చే అవకాశం ఉందని అప్రమత్తం చేశారు.