అవయవదానంతో పలువురికి పునర్జన్మ: ఎమ్మెల్యే గళ్ళా మాధవి

అవయవదానం ద్వారా ఒకరి మరణానంతరం పలువురికి కొత్త జీవితాన్ని అందించడం అత్యంత గొప్ప మానవతా సేవ అని గుంటూరు పశ్చిమ నియోజకవర్గ ఎమ్మెల్యే గళ్ళా మాధవి అన్నారు. గుంటూరు అబ్దుల్ కలాం నగర్‌కు చెందిన చల్లా శివ నాగరాజు కుటుంబం తీసుకున్న అవయవదాన నిర్ణయం సమాజానికి ఆదర్శంగా నిలిచిందని ఆమె కొనియాడారు.

చల్లా శివ నాగరాజు మే 31న బుడంపాడు సమీపంలో జరిగిన రోడ్డు ప్రమాదంలో తీవ్రంగా గాయపడి చికిత్స పొందుతూ మృతి చెందారు. కుటుంబానికి తీరని విషాదం ఎదురైనప్పటికీ, ఆయన భార్య లావణ్య గొప్ప మనసుతో భర్త అవయవాలను దానం చేయాలని నిర్ణయించారు. శివ నాగరాజు కళ్లతో పాటు కిడ్నీలు, గుండె, కాలేయాన్ని దానం చేయడంతో ప్రైవేటు ఆసుపత్రుల్లో చికిత్స పొందుతున్న పలువురు రోగులకు కొత్త జీవితం లభించే అవకాశం ఏర్పడింది. తీవ్ర వ్యక్తిగత విషాదాన్ని పక్కనబెట్టి సమాజం పట్ల బాధ్యతతో తీసుకున్న ఈ నిర్ణయం ఎంతో ప్రశంసనీయమని ఎమ్మెల్యే పేర్కొన్నారు.

ఈ సందర్భంగా శివ నాగరాజు కుటుంబ సభ్యులను పరామర్శించిన గళ్ళా మాధవి, లావణ్యను ప్రత్యేకంగా అభినందించారు. భర్తను కోల్పోయిన బాధలోనూ మరికొందరి జీవితాల్లో వెలుగులు నింపేలా అవయవదానం చేయడం గొప్ప త్యాగమని కొనియాడారు. ఇలాంటి నిర్ణయాలు సమాజంలో మానవత్వానికి ప్రతీకగా నిలుస్తాయని చెప్పారు. అవయవదానం ద్వారా అనేక మంది ప్రాణాలను కాపాడవచ్చని, ఈ అంశంపై ప్రజల్లో మరింత అవగాహన పెరగాల్సిన అవసరం ఉందని ఎమ్మెల్యే పిలుపునిచ్చారు. చల్లా శివ నాగరాజు కుటుంబం చూపించిన మానవతా దృక్పథం మరెందరికో స్ఫూర్తిగా నిలుస్తుందని పేర్కొంటూ, కుటుంబ సభ్యులకు ప్రగాఢ సానుభూతి తెలియజేసి మనోధైర్యం కలగాలని ఆకాంక్షించారు.